السلام عليكم ورحمة الله وبركاته
أم منة ميرسى على ذوقك ورقتك
سبانش الحمد لله على سلامة والدتك ربنا يتم شفاها على خير.
كلبيزو اللى مش كلبيزو فى الوزن بس كلبيزو فى الروح الحلوة ميرسى على سؤالك ملك الحمد الله كويسة ونزلت النيرسرى النهاردة علشان عندها حفلة.
أم اكرم الجميلة ألف سلامة على جوزك ربنا يشفيه.
كنزى ايه النشاط والمعلومات المفيدة دى.
كتكوتة : الف سلامة على جوزك
مليسا انت هتنورى الامارات كلها زى ما اوزا وام مكرم قالولك على الحاجات اللى تجبيها معاكى بس الدوا مش بس لانه غالى لان فى اسماء تانية والواحد بيكون متعود على نوع معين فبيتلخبط، انا فى حاجة باحب اجيبها من مصر هى النعناع المجفف لانى باموت فى الشاى بنعناع ولا يعلى على النعناع المصرى.
ام اسمت وحشتينا والبقاء لله
لوشا البقاء لله

شوفوا انا عاوزة اتكلم فى موضوع حاجة حسيت بيها وعاوزة تشاركونى فيها امبارح حصلى موقف فى الشغل وعلى اثره كتبت استقالتى مش ده المهم ، المهم ان شطورة كانت على الماسنجر فقلتلها واتكلمنا فى التليفون وقعدت تهدينى وتنصحنى ان مسيبش الشغل لغاية ما الاقى شغل تانى لانى هازهق وحاجات كده.

النهاردة أم منة بعثت لى رسالة على الخاص بتسأل عنى وعن ملك وكمان كل البنات مشكورين فى الملف سألوا عن ملك لما كانت تعبانة ، اوزا اتصلت تطمن عليها مع انها هى شخصيا تعبانة.
ده فكرنى بأول ما كنت جديدة فى البلد وحصلى ابورشن وقضيت الليلة فى المستشفى لوحدى ولما خرجت مكنش فيه حد بيسأل على غير أهلى واصحابى من مصر لان ببساطة معرفش حد هنا، دلوقتى انا حاسة بشعور تانى خالص على الرغم من ان بقالى اصحاب وباشتغل بس حاسة ان عندى ناس تانية أخوات ( انا معنديش أخوات بنات) على الرغم من بعد المسافة اللى بينا والانشغال اليومى بامور الحياة بس لازم يسألوا ويطمنوا باختصار عندى ضهر اتسند عليه والله مش مجاملة بس فعلا وجودى معاكم فرق فى حياتى ربنا يخليكوا ليا وكفاية كده أحسن هعيط بجد.:icon33

و بعدين بقى يا جولدى
و الله الواحد مش ناقص الكلام اللى بيحرك القنوات الدمعية دة
دة انا حتى انا كان كرتى فاضى و انتى اللى اتصلتى ( يا كسوفى يانا)
و بعدين دة انتى طلعتى من ريحة الغالية "نغم" ههههههههههههههههه

بعد ما نكدت عليكوا هصالحكوا

- مره واحدة عجوزة عندها 80 سنه لقت مصباح علاء الدين طلع لها الجنى
طلبت منه تصغر 30 سنه بقى عندها 50 سنه وطلبت منه يصغرها 20 سنه
بقى عندها 30 سنه طلبت منه يصغرها 10 سنين بقى عندها 20سنه طلبت منه
يصغرها 10 سنين جلها الحصبه ماتت.

- واحد بتاع فيديو جيم مات كتب علي قبره جيم أوفر

- طفل صغير سال امة ازاى انا جيت الدنيا قالت له حطيت شوية سكر تحت
السجادة لاقيتك جيت ... راح الطفل حاطط شوية سكر تحت السجادة... يومين و
لاقى صرصار فقال له لو مكنتش ابنى كنت قتلتك

- تلاته اندال اتفقوا يشوفوا مين اكتر نداله الاول شاف راجل عجوز
عايز يعدي الشارع مسك ايده و سابه في نصف الشارع واتاني عداه وضربه
التالت ضحك وقال انا اكتر نداله الراجل ده يبقي ابويه

- مرة اتنين مساطيل قاعدين بيحششوا قدام نشرة الأخبار في التليفزيون
فنشرة الأخبار طولت، راح الأول قال للثاني: هيه ليه نشرة الأخبار طولت النهاردة
كدة؟ رد عليه الثاني و قال: معلش أصل شكلها كدة النهاردة آخر حلقة.

- مرة واحد فشار قوي قاعد على القهوة مع واحد صاحبه وقالوا إن أبو جهل كان بيتعشى معاه أمبارح في البيت فرد صاحبه وقالو يا كداب أبو جهل مات من الف وربعميت سنه قام الفشار منادي على جاره قالوه مش أبو جهل كان بيتعشى معايا أمبارح جاره قال الكدب خيبه .... بس كان فيه عربيه راكنه هنا أمبارح نمرها ملاكي قريش

- أغبيه راحو يلعبو بلياردو، واحد منهم وقف فوق الترابيزة وقال لهم انا الجوووووون

- واحدة حامل فى ثلاث توائم يوم الولادة الدكتور بيطلع العيل الأول لقاه نايم وساكت
قعد يضريه على وشه حتى صرخ الطفل ركنه على جنب وطلع الطفل الثانى لقاح زى أخوه قعد يضربه لما فاق وركنه
جه الدكتور يدور على الطفل الثالث مش لاقيه راح ماشى وقال للممرضة كملى لأنهم اثنين بس
الممرضة جت تكمل لقت الطفل الثالث طالع براسه بالراحة وبيسألها
هو الراجل اللى بيضرب العيال مشى ولا لسة

- واحد عصبى إتجوز واحده عصبيه الدكتور بيولد مراته..نزل الواديقول للدكتور إبعد إنت أنا هانزل لوحدى

- مرة ضابط مصري
وضابط اسرائيلي دار بينهم هذا الحوارالاسرائيلي: الا قوللي يا
انتم بتاكلوا ايه ع الفطار؟؟
المصري: فول بالزيت .
الاسرائيلي: طب بتاكلوا ايه ع الغدا؟؟؟
المصري: فول بالطماطم .
الاسرائيلي: أمال بتاكلوا ايه بقى ع العشا؟؟
المصري: فول بالبيض .
الاسرائيلي (بتريقة): أمال ايه الفرق بينكم
وبين البهايم؟؟
المصري: سيناء

- تلاته خرجوا فرحلة سفاري..واحد مصري والتاني صومالي والتالت أمريكاني..دخلوا
كهف وناموا..وصحيوا بعد 300سنة!..كل واحد فيهم قام رجع بلدة ..
الصومالي شغل الراديو
سمع: (الصومال لن تتنازل أبدا عن حقها الشرعي والتاريخي
في ولاية
نيوجيرسي ) الأمريكي شغل الراديو سمع: (سيدافع الجيش الأمريكي عن
البلاد لآخر جندي !)
المصري شغل الراديو سمع:
(إخترناه..وبايعناه...وعشان كده احنا
اخترناااااااااااااااااااه !)

- ايه أسرع ثلاث وسائل للاتصالات؟
Telephone
Television
Tell -a- Woman

- واحد بلدياتنا اتعزم
فى حفلة تنكرية قام غسل وشه

- صعيدي سألوه ماهو
السيفون؟؟
قال:صندوق بحبل لما تشده يا تلحق تشرب يا
متلحقش .

- مره اتنيين مساطيل ماشيين على شريط القطر فواحد بيقول للتاني
يآخي السلم ده طويل بشكل ....
رد التاني عليه
الي مضايقني ان الدربزيين
واطي أوي ....

- صعيدي اخد شهادة الدكتوراة قال لمراته والله ما خبرشي ليه الناس بيضحكوا
عالصعايدة؟ اديني جبت الدكتوراة فقالت له مراته : دق عالخشب لا تصيبك عين قام
دق عالخشب قالت : مين عالباب؟
قالها خليكي هنه حشوف مين

- واحد محشش راح يخطب واحده ..
ابوها قاله:" انا عليا الشقة .."
رد عليه وقاله :" وانا عليا البنات
والبيره !"

-

السلام عليكم ورحمه الله وبركاته
ازيكوا يا بنات عاملين ايه؟يارب كلكوا بخير
جولدي:والله الشعور متبادل ,معلش ماكنتش اعرف ان ملك تعبانه انا كنت غايبه شويه عشان ابني بردوا جالو دور برد محترم وربنا يشفيهم
كنزي:ازيك عامله ايه
ايناس:ازيك يا جميل
لوشا:البقاء لله
سبانيش:حمداا لله علي سلامه ماما
ام اكرم :سلامه جوزك الف سلامه عليه
اوزا:وحشتيني
ام منه:انا هنا ياستي وداخله من خط التليفون انشاء الله الدي اس ال يتركب النهارده
ميايسيا:ياارب تروحي لجوزك بالسلامه
شيرين:طمنينا علي حملك ايه الاخبار؟
شطوره:انتي بتقواي ف حاجات فيكتوريا سيكرت التانيه مش الانجيري لأ انا العكس:22: يا حبيبتي,وبعدين علي فكره اللوشنز بتاعه فيكتوريا سيكريت ريحتها مش اوي ,باث اند بودي ووركس احلي بكتيييييير لو جربتيها هتعجبك ممووت
وباقي القمرات
كلبوزه
وسام الشارقه
كتكوته
سما سحاب
:26:

السلام عليكم ورحمه الله وبركاته
ازيكوا يا بنات عاملين ايه؟يارب كلكوا بخير
جولدي:والله الشعور متبادل ,معلش ماكنتش اعرف ان ملك تعبانه انا كنت غايبه شويه عشان ابني بردوا جالو دور برد محترم وربنا يشفيهم

الف سلامة على ابنك يا رنونا، ربنا يشفيهم ، أنا باقول شوية برد وعملوا فينا العمايل دى كلها لكن يا حرام انتوا اللى قاعدين فى تلاجة تعملوا ايه.