مرحبا بنات

بنات ممكن تقولولي بالنسبه للسكن في القاهره لمده اسبوعين او شهر
ايش احسن يكون اوتيل والا شقه مفروشه والاسعار ما تكون غاليه
يعني يا ريت تعطوني اماكن وعنواين للشقق او الاوتيلات اللي مش غاليه كثير وتكون كويسه وامان وقريبه من الاسواق
اختي هبه قلتي عندك سواق كويس وامين ممكن حبيبتي تزوديني بمعلومات اكثر وتسلمي
بنات نسيت الله يسعدكم قولولي كم تقريبا تكفي ميزانيه لمده اسبوعين الى شهر يعني بس بالنسبه للسكن والمواصلات
ومشكورات خواتي مقدمااااا واسفه على كثره الاسئله

عزيزتي انا كل صيف في القاهره شهرين وزياده
ومافي شي من الكلام اللي قلتيه
السرقات ماهي موجوده والبوليس السياحي مليان في كل مكان ولا احد يضايقك ابدا ابدا
هو اللي فيه بصراحه الاستغلال من البعض لانك خليجيه ومع كذا صراحه رخيصصصصصه جدا ووناسه واهلها حبوبين وراعين سوالف ومزح
واذا تبين معلومات زياده او اي استفسار انا حاضره يالغاليه
الاسعار او الاماكن او اي شي مايردك الا لسانك يالغاليه

والله اول مرة اسمع الكلام ده يا اختي مصر بلد الغريب فيها سلطان وصاحب بيت

من ناحية الاستغلال انا معك ايوة ساعات في ناس ما عندهاش ذمة بس مش بس بتستغل اهل الخليج واحنا كمان نفسنا لو البائع حس انك مش فاهمة سعر الحاجة بيغلي عليك لو كنت من فين حتى

عموما لو عاوزة نصيحتي شوفي شقة انزلي فيها وبلاش اوتيل لأنه هياخد معظم الفلوس لو اوتيل حلو والشقق سهلة عن طريق أى سمسار

بصي لو عاوزة حاجة للهدايا وسعرها حلو ورخيص هتلاقي في روكسي لو انت مثلا ساكنة في جاردن سيتي وهتاخدي تاكسي لروكسي اكثر حاجة ممكن تدفعيها 25 جنيه وما تزيديش ويستحسن تتفقي مع السائق قبلها وتسألوه عاوز كم ولو عاوزة نصيحتي بصراحة شوفي سائق أمين ورتبي معاه الفترة اللي هتقعدوها في القاهرة يجيبكم ويوديكم زى ما تحبوا واتفقي معاه على سعر معين في اليوم او في الشهر

وبعدين يا أختي مصر نصف ستاتها اليوم منتقبات والله ولا سمعت عمري ولا شفت حد يكلم منقبة علشان انقاب ويشتمها هى وزوجها

شوفي عندك في الأسواق المولات والمحلات هناك أسعارها ثابتة لك ولغيرك ومافيش فصال

المكان الوحيد اللي فيه فصال هو في الحسين وخان الخليلي لأنهم عايشين على السياحة وانت وشطارتك في الشرا بقى يعني مثلا الفضة دلوقت سعر الجرام 3 جنيه افتكر وشوفي لو هتجيبي حاجة فضة ممكن ياخد منك كم مصنعية زيادة وخلاص

الملايات والمفروشات في الأزهر (انا باقوللك على الأماكن اللي ممكن تكون فيها اسعار متفاوتة ولازم تفاصلي فيها ) عندك الملايات من سعر 50 جنيه لـ 250 وطبعا كل حاجة بيبان سعرها وما اعتقدش انهم ممكن يستغلوك لأنك خليجية لأن الأماكن دي بيكون فيها اسعار الحاجة مكتوبة عليها في اغلب الأوقات

اللي ممكن يضايق فعلا هم الشحاتين ودول بيضايقونا احنا اولاد البلد فما بالك بالعرب والأجانب وأحسن حل انك تقولي الله يسهلك وتمشي وتسيبيهم لأنك لو عطيتي حد الكل هيتلم عليك، طبعا الشحاتين في كل مكان في الدنيا وفي كل بلد مش مصر بالذات يعني

مش قادرة افكر في مكان تاني يستغلوك فيه بصراحة

نكمل

عندك في روكسي محلات لانجيريهات وصنادل وشنط وابقي اسألي على شارع بطرس غالي لو بتدوري على صنادل رخيصة

في المولات عندك مدينة نصر (سيتي ستارز، سيتي سنتر، طيبة، العقاد، شارع عباس العقاد نفسه مشهور) وزى ما قلت لك أغلى تاكسي ياخدك من وسط البلد لمدينة نصر باقصى حاجة 30 جينه طبعا روكسي قبل مدينة نصر علشان كده أرخص

طبعا في وسط البلد عندك محلات في 26 يوليو كلها لبس بس مش قد كده أفضل المولات طبعا ويا اختي طالما داخلة محل لا يمكن يغلي الحاجة عن تمنها لأن المحلات أسعارها ثابتة

عندك محل شنط ماركة في المهندسين في شارع سليمان اباظة اسمه مومنتس تحفة
وعندك في طيبة مول محل اسمه فورتين وفي شارع عباس العقاد في مدينة نصر محل اسمه ألدو هتلاقي عنده صنادل وشنط حلوة

في وسط البلد عندك أركيديا مول على كورنيش النيل من وسط البلد لهناك 10 جنيه التاكسي ومن التحرير جنب المتحف لهناك 6 جنيه بالكثير

عندك رمسيس هيلتون بجوار ماسبيرو في التحرير جنب وسط البلد فيه حاجات حلوة وظريفة

عندك محلات أقمشة تحفة ومستورد في وكالة البلح (لازم تفاصلي كويس جدا يعني يقوللك المتر بـ 50 قولي له 25 جنيه على طول) وكالة البلح مكانها على كورنيش النيل والتاكسي من التحرير لهناك 4 جنيه او من وسط البلد لهناك 6 جنيه بالكثير

عندك في صلاح سالم (طريق مشهور قوي بيربط القاهرة ببعضها) في حديقة الأزهر انصحك تزوريها هناك في محل استوديو مصر مطعم لذيذ قوي والقعدة حلوة وجميلة بالذات في الصيف بالليل وافتكر الفرد بوفيه مفتوح 70 جنيه تقريبا

اما في الاسكندرية فالدنيا احلى كثير

عندك في بحري مطعم اسمه حسني هتلاقي عنده احلى سمك وكباب وسعره حلو قوي ومكتوب في المنيو ما يقدرش يغشك طبعا

لو عاوزة تاكلي سمك في عندك الفيش ماركيت لو انه غالي حبتين

طبعا شوفي القلعة في راس التين ناحية المنتزه وتاكسي من اى مكان لهناك يعني من بحري اللي في آخر اسكندرية للقلعة اللي في أولها تدفعي 30 جنيه بالكثير 50 جنيه

وما تنسيش تروحي دريم بلازا في سموحة حلو جدا ومليان محلات جميلة لكن أسعارها غالية شوية

احلى قعدة بتكون على النيل لكن انصحك تقعدي في الأماكن النظيفة يعني بلاش المحلات البسيطة عندك مثلا البواخر في الفرعونية وفي ذا بليس كل ده قريب من وسط البلد طبعا

وفي الاسكندرية عنك اوتيل فلسطين حلو واسعاره حلوة وعلى المنتزه ولو هتأجري شقة كل مكان وله سعره يعني مثلا عندك الشقق في مكان على البحر مثلا الليلة مش هتزيد عن 150 -200 جنيه تقريبا

ممكن تاخدي حنتور يلفي بك اسكندرية كلها ب30 او 35 جنيه ومكانهم في بحري بجوار المتحف المائي

اتمنى اكون افدتك وغيرت فكرتك عنا ربنا يسامحهم بقى اللي بيقولوا الكلام ده ، عموما الخلاصة علشان تضمني عدم الاستغلال اشتري من مكان او محل اسعاره معروفة وثابتة

والتاكسي انا قلت لك على اللي فيها ويستحسن تشوفي حد لكم مخصوص

عندك المتحف في التحرير، حديقة الأزهر في صلاح سالم، مطاعم الكباب في الحسين، والمطاعم العادية في شارع جامعة الدول العربية في المهندسين

ويا ستي تنورينا وتشرفينا

نسيت اقوللك ان حساب التاكسي بيعتمد على عدد الناس يعني لما يكون راكب لوحده غير لما يكون 3 او 4 يعني انا مثلا لو لوحدي ورايحة مشوار تمنه 2 جنيه غير لما يكون معي حد ورايحة نفس المشوار بازود شوية يعني ادفع 2.5 او 3 جينه ومتسألنيش ليه هى كده بصرحة انا نفسي محتارة في امرهم لكن هو ده اسلوبهم وطبعا مش كلهم زى بعض

لو احتجتي تسألي على أى حاجة انا في الخدمة ولو تحبي اعطيك رقمي لما تنزلي مصر اساعدك بالتليفون

عموما اسعار الشقق ممكن تجيبي جريدة الأهرام نسخة يوم الجمعة اعتقد بتنزل في الدول العربية وهتلاقي فيها نمر سماسرة واعلانات شقق مفروشة بالهبل وممكن تتصلي بالناس من بلدك وترتبي معهم من قبل ما تجيي

عفوا لسة واخدة بالي انك من المدينة المنورة

امانة عليك السلام لصاحب المدينة عليه الصلاة والسلام ولو قلتي لمسلم في مصر انك من المدينة مش عارفة ممكن يحطوكي في عينهم او على راسهم اكراما لرسول الله