نورتي الموضوع يا دكتورة فايزة
يا ريت فعلا نتجمع كلنا فكرة حلوة جدا
اهلا يا راويه
احنا ممكن نحاول نذلل العقبات يعني بالنسبة لتكلفة اقامة المعرض ممكن في الاول نكون جزء من معرض كبير وناجر الارضية
وممكن في الاول ما نبصش للربح المادي لحد ما نعمل اسم ونتعرف واكيد هنتفوق بالجوده العاليه والتصميم المتميز والشغل المتقن
نختار مكان راقي يقدر الخامات الغالية لاننا بنقدم حاجات متميزة
ايوة كده نبتدي نفتح مواضيع ونناقشها ونحاول نجد الحلول
في انتظار المزيد من المشاركات والاخوات اللي عندهم خبرة ممكن يساعدونا حتى لو من خارج مصر

والله الفكرة بجد حلوة اوى وياريت فعلا تتنفذ وانا ان شاء الله معاكم

أختى العزيزة الفكرة حلوة كثيرا
وبالنسبة للمكان ممكن لو أحد فينا مشترك فى نادى يعرضهم هناك على الطرابيزة اللى قاعدة عليها أو لو فيه فى النادى معرض وتأجير الطرابيزة فى حالة وجود معرض حوالى 60 جنية ده فى نادى الزمالك ولكن لا أعرف باقة النوداى أيه بالظبط وممكن لو فينا واحدة جريئة تعرض هذه المعروضات فى المحلات فيه محلات كثيرة بتعرض حاجات الكروشية
وممكن لو لكل محافظة تتجمع البنات وتعمل نظام الأوبن داى فى شقة واحدة منهم
وممكن أيضاً تعرضوهم الأول على الأهل والأصحاب
أنا خالتى ساعات بتعمل الأوبن داى فى شاقتها بس بتبقى ملابس مستعملة أستعمال خفيف ودى فكرة مش بطالة ممكن لو وافقتوا على نظام الأوبن داى نعرض مع الكروشية ملابس مستعملة أو أى شئ تكون الواحدة منا مستغنيه عنه
ومستنيه ردكم أو عروض أخرى

الفكرة جميلة لك الشكراقترح ان نكون فريقين فريقمن القاهرة وفريق من الاسكندرية او على حسب التجمع من المحافظات وكل فريق ينسق مع بعض نقطة البداية الاول هو تكويين الفرق

والله الفكره خطيره وعمليه جدا شوفتى البساطه والطموح اللى فى كلام دهب يا راويه ممكن يكون عندك طموح كبير جدا وعشان كده بيعطلك
المكان مش مشكله اذا اجتمعتم فعلا ممكن تلاقوا الف فكره وممكن تلاقوا واحده عندها المكان ووحده تانيه عندها الامكانيات الماديه وواحده تالته عندها تخطيط حلو لطريقة العرض ياااااااااااه
اذا اجتمعتم هتلاقوا ابواب كتير اتفتحت ولا تنسوا يد الله مع الجماعه ومش ممكن هتسعوا وتجتهدوا وربنا ما يساعدكمش توكلوا على الله الفكره هايله
بس القاهره والاسكندريه الاتنين بعيد عنى انا من دمياط ويا ريت الاقى غيرى كتير ويراسلونى على الخاص ونشوف هنتقابل فين