روحي مستشفى الملك فيصل التخصصي في الرياض في دكاتره ممتازين

هلا اختي تنيل ولدي عنده ضمور في البطين الايمن وسوى عملية الفونتان واللي اجرى العمليه الدكتور يحيى الفرايضي في مركز سلطان لامراض القلب والان هو ماشي معهم مواعيد وادويه وبالنسبه للتعب معليش انا شفت شي الله لايوريكم اياه انشالله وعلى فكرة سبق انة سوى عمليه قلب وفشلت وعادوها له بس هو عملياته بالتدريج لانه صغير وجسمه ما يتحمل


الله يعوض تعبكم انشالله ويشفيه لكم واخر الشر انشالله ولا تنسو انكم تتدامون على الرقيه الشرعيه يوميا


يارب يشفيه ويشفي كل مريض ويفرحكم بعافيته

هلا اختي تنيل ابي اقولك حاجه مهمه ترى الامراض تختلف حتى لو كانت في نفس المكان يعني القلب له الف مرض وعيوب يعني مو كلها واحد انا حالة ولدي تختلف كليا
عن اخوك وفشل عمليته لان اللي سواها المرة الاولى جراحه متسرعه بس الحمدالله المرة الثانيه اخترنا جراح شاطر وبعدين هذاشي بيد الله في جراحين ممتازين ويسوون عملايات لحالات سهله بس للاسف تفشل او يتوفى وانا هالشي شايفته بعيوني مئات المرضى يوميا كنت اشوفهم لما اكون مع ولدي
بس اهم شي اتبعو كلام الاطباء وترى في اشياء ينسونها مثل..

الملح انتبهو من الملح ممنوووووووووووع

اذا صحى انشالله من العنايه لازم يمشي كل يوم شوي

الغذا ابعدوة عن الدهون والشكولاته لازم اكله خفيف يعني شوربه والمسلوق



والله يطلعه بالسلامه

واذا طلعتو علميني عشان اقولك كيف تتعاملو معاه في البيت



يارب يفرحكم بعافيته واسفه على الاطاله

المهم كل هذا بيد الله انتم اتكلو على الله وبس ماله دخل حالة المريض صدقيني انا اشوف حالات ميؤس منها والحمدالله ربي يطلعهم ما فيهم الا العافيه

هلا اختي طمنيني على اخوك انشالله تحسن

بالنسبه للنصايح انا بقولك اللي اعرفها واللي تناسب ابني وللاهميه تسالو الطبيب قبل الخروج من المستشفى انشالله انا بالاول قالو لي لا يروح اماكن مرتفعه مثل المناطق الجبليه لا يزعل كثير لا يركض بعد الخروج من المستشفى انشالله حاولو انه ما يختلط بالناس على الاقل مدة شهر يعني حتى الزوار لا يدخلو عليه تدرين ليش؟؟


عشان الفايروسات لانه بيكون بهالحضات ماعنده اي مناعه وجسمه يلقط اي فايروس وطبعا خطر جدا عليه حاولو اذا نام يرفع رجوله على مخده عشان الدم يدور في جسمه

الدواء الدواء الدواء انتبهو للدواء التزمو الدقه في اعطائه الدواء والوقت والملي يعني ادويه قلب تختلف عن البنادول وغيرها اي لخبطه زياده او نقص يروح فيها بسم الله عليه
يعني شخص منكم ثقه حريص يكون مسؤل عن الدواء

حاولو انه مايخاف عاملوة معامله سويه يعني لا تدلعونه بزياده عشان ما تتعبون معاه بعدين وتتعب نفسيته اذا كبر لا تحسسونه انه مريض اضهرو له انه طبيعي واللي صار له شي عادي يصير لاي طفل يعني اكذبو (كذبه بيضاء معليش) :) قولو له ولد الفلان اي اسم سوا عمليه مثلك صاخبتي فلانه لما كانت بسنك سوت نفس عمليتك ترى كذا تخلونه واثق بنفسه يحس انه مثل الناس مرضه عادي مو غريب
حركات البكاء والدموع لاااااااااااااااا يشوفها بتتا المهم الولد اهم شي نفسيته وهي بيدكم


بالطايرة لا تستغربو لما يرجع لانه يهبط الضغط عنده عشان كذا لا ياكل شي لمده ساعتين قبل الصعود للطائرة حتى وانتم بالطائرة لا يكل شي الا خبزة صغيرة او بسكوت لانه مع طلوع وهبوط الطائرة احتمال يرجع



والله ودي اقولك كل شي بس هذا اللي في بالي الحين وعلى العموم


اتاكدي من الطبيب من كلامي عشان يمكن في اشياء مسموحة لاخوك وممنوعه على ابني



هذا الحين اللي في قريحتي اذا بغيتي شي انا جاهزة ورهن اشارتك ولا فيها اي شي ا عتبريني اختك وانا حاضرة

المهم ابيك تدعين لاخوك ولولدي وكل مريض وادعي لي بعد اني انحف :)) بالعافيه