بسأل اختى عن الموضوع اكثر ان شاء الله

واظن لو اتصلتى على خدمه اهلا دبي

او غرفه صناعه وتجاره دبي تحصلى معلومات

وممكن تلحقى بعدها القريه وممكن تأجرى اذا توفقتى اى عدد من الايام اللى يناسبج

:)

مرحبا

و الله موضوع حلو و مفيد و حابة اشارككم

انا العام فكرت في فتح كشك في القرية العالمية
و طبعا قبل المهرجان بفترة طويلة اتصلت فيهم و ساليتهم

المهم قالو ان الكشكات احجام بس و الله الحين ما اتذكر المقاسات اللي قالولي اياهن
و ممكن تاخذينه من عندهم او اتسوينه بروحج عن اي نجار

بس بالمواصفات و المقاسات اللي هم يحددونها

و بالنسبة للموقع :

هم قاللولي ان هاذي الكشكات تتوزع في شارع الرقة و القرية العالمية

يعني مثلا لو تبين في العالمية بيراوونج المواقع اللي تنحط فيها الكشكات في القرية و هم بيختارون لج المكان

يعني مب انت اللي تختارين المكان اللي بينحط فيه الكشك

و بعد يعتمد على نوع البضاعة اللي بيتبيعينها

و الله هاذا كل اللي اتذكره اللحين


بس ما ادري اذا قوانينهم بهاذا الخصوص تغيرت

لاني انا ما خذه هاذي المعلومات العام اللي فات

و تدرون المهرجان كل سنه يتطور للاحسن و تتغير اشاء وايده فيه

يمكن قوانينهم و شروطهم تغيرت بهاذا الخصوص و الله ما عندي علم

الاحسن تتصلون فيهم و بخيرونكم بكل شئ


بس في حالة انكم فكرتو في بيع اي نوع من البضائع لازم اتحطون في الاعتبار اشياء كثيرة :

ان لا تكون البضاعة مكررة او موجود منها بكثرة في الاسواق ( يعني الناس شبعت عينها من ها النوع من البضاعة )

ان تكون جذابة م مغرية ( لان الكشك حجمه صغير و مب كلحد بتلفته البضاعة و خاصة اذا كانت عادية)

تحطين في الاعتبار انج تغطين المصاريف مال ( ايجار الكشك + قيمة البضاعة + راتب او عمولة الشخص اللي بيقعد ايبيع لج هاذا اذا ما كنت انتي اللي بتيلسيين فيه ) و بالاضافة للفايده

سعر البضاعة ما يكون مبالغ فيه لان اغلب الناس تتفرج مب كل حد يشتري

مراعات حجم الادوات و الاشياء اللي راح تنباع في الكشك بحيث يسهل عرضها و و ضعها في الكشك


اتمنى اني قدرت اوفر لكم معلومات مفيده من خلال دراستس لموضوع فتح كشك في القرية العالمية

مشكوووووووره ام الجواهر كفيتي ووفيتي :27:

مشكورة اختي ام الجواهر والله انج كفيتي ووفيتي بس ما قلتيلي انتي فتحتي كشك والا بس سألتي واذا فتحتي شو بعتي وهل رحبتي والا خسرتي وتقريبا كم بيكلف الكشك الصغير يعني ايجاره كم والعامل كم ياخذ انا ابغي اعرف اذا ما عليج كلافه لاني اول مره ادخل عالم التجاره وما اعرف شي ابد

لاشكر على واجب


الصراحة انا احب البيزنيس و عندي افكار كثيرة بهاذا الخصوص

و لكن كل مشروع يحتاج له دراسة جيده قبل البدء فيه

المهم

بالنسبة للكشك( طبعا هاذا مثل ما ذكرت سابقا )انا جمعت معلومات عنه وهااالكلام كان العام الماضي

لاكني ما فتحت كشك

ان شاء الله مستقبلا

لاني حاليا عندي بيزنيس و ابغي يكبر شوي

و بعديين بالتفت للاشياء الثانية

و شكرا