ضحى أحمد :

ألف مبروك ياجماعة على الصفحة الجديدة دي ماشاء الله شرحة وبرحه والفيو بتاعها يجنن .. بس مش كنتوا تستنوا شويه على النقل لما البياض ينشف .. على سيرة البياض انا كنت عاوزه عنوان الراجل بتاع الدوكو الي دهن الجدران شغله ماشاء الله حلو اوي كنت محتاجاه عشان بقالي مدة بدور على نجار بس يكون معرفه يركب لي البلاطين المخلوعين من جدار اوضة النوم . قبل كل حاجه شكرا قوي قوي لكل الي سألوا علي واخص بالذكر تيته بطه وطنط نعمة وجدوا حسنين وعم ابراهيم بتاع الجرايد .. سكرة هانم .. انا ياستي من محافظة الغربية .. وبالمناسبة دي ابقي فكريني اقولك على موقف حصل لي مرة زمان بسبب حكاية انتي منين دي .. هبه.. والله زمان كان رأيي زي رأيك ده بالظبط لغايه ماحصل لي موقف .. طلبت خدمة من وحده اعرفها خدمتها كتير جدا وتملصت مع انها تقدر تعملها.. فحز في نفسي جدا موقفها .. وقعدت اقول في نفسي نفس الكلام الي انتي بتقوليه دلوقت بالظبط .. بالحرف .. ليه انا دايما اخدمهم وهم لاه .. ليه مبيتصلوش غير لو عاوزين خدمة .. .نفس الكلام .. المهم رحت حالفه وقلت والله ماعدت اساعدهم في حاجه تاني لاهم ولا غيرهم وهبقى زي كل الناس واتبع نفس المنطق .. فوجئت وفي نفس اليوم بناس تانيين تطوعوا لتخليص الخدمة الي كنت عوزاها وكمان لقيوا واسطه تممت لي بقية الاجراءات .. شفتي .. انا كنت محتاجه من قريبتي شئ صغير وهي رفضت فربنا بعت لي الي عمل لي الشئ ده وزيادة كمان .. من وقتها تاكدت انه ولو كنت بخدم الناس قيراط فربنا بيرده لي اربعه وعشرين .. مش شرط على يد نفس الناس .. المهم انه بيترد ومن عند الي مبيضيعش حق .. هيكون ايه اكتر من ان الرسول عليه الصلاة والسلام قال في مامعنى الحديث .. إن لله خلقا اختصهم لحوائج الناس .. أولائك الآمنون من عذابه يوم القيامة .. وفي احسن من كده جزاء .. الخلاصة .. سيبك من كلام الدكتور ( أمبير) وخليكي مع كلام ربنا واكيد هتبقى انتي الكسبانة.. وصدقيني ياهبة .. والله الدنيا لسه بخير .. أم حبيبة .. والله كلامك صح مية في المية .. انا كنت عاوزه اقول الحكايه دي من فترة بس كنت محرجة اوي وخايفه كلامي يتفهم غلط او حد ياخذه ككلام موجه له شخصيا .. فقررت اسكت خاصة وان الموضوع حساس ويلزمه جراح متمكن .. فعلا ساعات بلاقي صفحة كاملة شات بس والمشكلة مش ببقى فاهمه بيتكلموا عن ايه وده بيخلي من الصعوبة اني اتابع في بعض الاحيان .. وعلى هذا فأنا بضم صوتي لصوتك في بقجه وحده وبطالب واناشد السادة المسؤولين عن هذه الصفحة بالنظر في الموضوع بعين الرأفة وأن يشملوه باهتمامهم بما يصب في النهاية لمصلحة الوطن والمواطنين .. وعشان نمسك العصاية من النص .. بصوا ياجماعه ارغوا زي ماانتم عايزين ( خاصة ان الواحد اخذ على الرغي وبقيت اول وحده برغي ) بس بشرط ياريت كل مشاركة يكون فيها شئ مفيد .. يعني قولي كل الي نفسك فيه لاصحابك وشاتي زي ماانتي عاوزه بس حطي في الآخر لينك لحاجة مفيدة او معلومة صغنونه او حتى نكتة بايخة اي حاجه المهم متخليش المكالمة تروح هدر .. ولو مفيش في بالك حاجه مفيدة يبقى على الاقل نخلي كل يوم شاته وحده بس لكل عضوه يعني اكتبي كل سلاماتك وتحياتك واحتراماتك في مشاركة وحده وابعتيها وحاولي متبعتيش تاني غير اليوم الي بعده ... وبالمناسبة ياجماعه مش عارفه بقالي يومين كده عندي الظاهر فايروس ولا ايه الكيبورد بتكتب حاجات لوحدها كده . .. حاجه غريبة .. ومنها شويه الكلام الي فوق ده دي تصاريف كيبود.. يعني مش مسؤوليتي واعترض عليه جملة وتفصيلا .. وابراءا للذمة فانا سجلت محضر بالواقعه دي 36 أ قسم الخانكة .. ده للعلم بس وقبل مانسى .. سؤال والله في بالي من امبارح وانا قاعده اغسل الاطباق كده جالي خاطر .. هي الصفحة دي للعرايس ومستلزماتهم بس ولا ممكن نتكلم فيها عن اي حاجه تانيه مثلا مش شرط تكون تهم العرايس .. بيتهئ لي ممكن صح؟

ألف مبروك ياجماعة على الصفحة الجديدة دي ماشاء الله شرحة وبرحه والفيو بتاعها يجنن .. بس مش كنتوا...