صباح الخير عليكم ياحلوين
فيه موضوع ودي اكلمكم فيه كلكم وخصوصا الي عندها اخت او بنت بسن مراهقه ومو شرط مراهقه الموضوع يخص أي بنت في أي عمر لكن المراهقه مرحله حساسه وتتوقف عليها اشياء كثير في شخصية البنت عشان كذا بخصها بكلامي
كثير اسمع مشاكل بالنت وغيره من الامهات او الاخوات الكبار من اخواتهم المراهقات الي تكتشف ان عندها جوال والي سمعتها تكلم واحد او تحب صاحبتها او مرسله صورتها يعني اتجهت لطريق غلط والعياذ بالله او يكون ماحصل شي من هذا كله مجرد شك او ممكن مخاوف من انه يصير شي زي كذا فتبي وقايه
واسمع معظم النصايح تنهال عليها اسحبي منها الجوال اضربيها احبسيها امنعيها من النت امنعيها تكلم تلفون امنعيها تزور صاحبتها الجوال ماينفع بيد البنات
ويصير قدام المراهقه لسته ممنوعات مالها اول ولا اخر
خير؟ معتقل هو والا سجن؟ متوقعين هذا بيجيب نتيجه بالعكس سياسة المنع من اسوا السياسات وتجيب نتيجه عكسيه غالبا لانه في هالسن بالذات كل ممنوع مرغوب ودايما راح تلاحظون الشي الي تمنعونها منه تصر انها تسويه وتشوفه هو الصح بكل بساطه لانك انتي الي مانعتها لا تمنعينها من شي عشان ماترتكب الغلط لا خليها هي الي تمنع نفسها وماترضى لنفسها الغلط وممكن يصير هالشي وهي عندها جوال ونت وتزور صاحباتها
انا مااقول اتركو لها الحبل عالغارب لا قصدي تراقبونها بس بدون ماتحس انها مراقبه في كل حركه حسسوها بالثقه وانها قد المسئولية
غير موضوع الممنوعات عندي موضوع ثاني
الحين البنت ليش تكلم شاب؟ وليش تذوب اقل كلمه يرميها عليها احد باي مكان؟ وممكن للاسف تصير مصااايب من ورى انها خفيفه وقلبها رهيف تتوقعون وش السبب؟
صرنا نجاوب على هالسؤال تلقائيا ونقول الفراغ العاطفي
هذا الي ابي اوصله وش يعني فراغ عاطفي ؟:(
الحين البنت الي من اقل كلمه تضعف وتكون علاقه مع شاب وتنبسط من كلام معسول ومدح وهدايا تتوقعون هالبنت في بيئتها مع اهلها فيه ود ومحبه فيه عاطفه وتسمع كلام حلو:26:
عجبتني حلقة الحب للشيخ محمد العريفي في برنامج ضع بصمتك وبالتحديد نقطه كانت موجهه للوالدين انه لاتحرمون ابنائكم من العاطفه وتخلونهم متعطشين لها بكذا ماراح تقدرون تمنعونهم يدورون عليها عند ناس عارضين بضاعتهم من الحب والكلام المعسول وعلى قفا من يشيل
يعني تلقين الام او الاب جامدين وجافين في تعاملهم مع البنت يالطيف حتى مافيه يعطيك العافيه او تسلم يدك كل كلامهم مع البنت اوامر و لوم وسوي ولاتسوين واهمال للبنت في الاخير تصيح الام وتقول انا مربيتها احسن تربيه حتى الجوال ماتعرفه؟ طبعا هذا غلط
لان البنت تروح برا وتسمع اشكال والوان من الكلام المعسول وان كان مغشوش لكنه يشبع عاطفتها والله يعلم وين يوصلها :icon33:
كلنا نعرف ان الانثى مخلوق سماعي يحب يسمع المدح والاطراء ويرضي غرورها هالكلام حتى لو كان من اهلها مو شرط حبيب مافيها شي لو الاب او الام او حتى الاخوان يمدح البنت في طبخها لبسها شكلها قصة شعر سوتها لا نجحت بنتك باركيلها سويلها حفله صغيرونه وجيبيلها هديه وابسطيها لو ابوها او احد اخوانها طلعها يمشيها يعزمها على مطعم
او يدخل البيت كل فتره متذكرها باي شي تحبه والله بيكون اثره كبير على نفسها حسسوها بالاهتمام وانها شخص غالي عليهم هالفتره البنت تحس ان الكل ضدها وان اهلها مايبونها تنبسط وان البنات المفلوتات عايشين مبسوطين ويسوون الي يبون لاتنكرون هالشعور يمر على الاغلبيه بس الاهل يقدرون يقتلون احساسها هذا وعلى فكره في الاشياء هذي تاثير الاب اكثر فيها يعني سبحان الله البنت دايما تميل لوالدها ودلع الابو لبنته غيييييير لكن مايمنع ان الام كمان دورها مهم ولو عندها اخوان كبار كمان دورهم اهم واهم لانهم اقرب في السن ويفهمون بعض
هذا هو بالضبط حسسو بنتكم بالاهتمام مو تسوون شغل عساكر وابراج مراقبه ووين ماتتحرك تراقبون وش تسوي ومن تكلم واش تقول بالتلفون وتسالون وتستفسرون كانه تحقيق صادقوها يعني لمن تجي تقولك ماما عندنا بنت في الفصل تكلم واحد وتطلع معاه ومن هالكلام بدل ماتعصبين وتقولين لها وش معرفك عليها اقطعي علاقتك لو ادري انك تكلمينها ياويلك وتخلينها تتوب تقولك أي شي :icon33: يخصها لا استنكري بلطف فهميها انه شي غلط ويترتب عليه كذا وكذا وخليها ترتاح بالكلام معك عشان تعرفين هي كيف تفكر
لاتستهونون بهالموضوع احنا في زمن يخوف انتشرت فيه الفتن وكل وسائل الخراب متاحه للاسف تلقين بنت بعمر 12 تسوي الهوايل:09:
والمنع ماعاد ينفع ابداااااا بالعكس انا شفت خصوصا في ايام المدرسه بنات محرومااااااات من كل شي من اهلهم لكن والله انهم مصايب ويسوون اشياء البنات الي عندهم حريه مطلقه مايسوونها لان الكبت يولد الانفجار شوفي الطفل اذا منعتيه اتذكر وحده بالثانويه كانوا هلها ماشالله مررررررررره اغنياء لكن سبحان الله فيهم بخل مو طبيعي كانت متعرفه على واحد وتقابله وتورينا هدايا يعطيها اياها وهي مبسوطه وطاااايره لمن اشوفها القاها اشياء مرررره عاديه اكسسوار عطر رخيص يعني اشياء والله ماتسوى لكن الي خلاها تفرح فيها انها محرومه منها
لاتخلين بنتك اذا جاها رقم يعاكس على جوالها يفز قلبها من كلمه حلوه او مسج خليها تتعود على هالكلام منكم وتشبع منه عشان لمن تسمعه من احد ثاني يكون شي عادي وماتعطيه اهتمام
طبعا انا مااقول افلتوهم لكن ربوهم تربيه سليمه ممكن تقدرين تحرمين بنتك من كل شي وتمنعينها توقع في شي غلط وانتي كاتمه على نفسها لكن صدقيني مجرد ماتلقى مجال لو بسيط انها تغلط راح تغلط فنمو عند بناتكم الرادع الذاتي وخليها بنفسها تبعد عن هالامور
اسفه لو طولت عليكم واتمنى تعطوني رايكم وتناقشوني
مسرع يابنات طار ورا :(