بنتى سبب مشكلتى (ربنا يهديها ويخليها)

السلام عليكم
اخباركم ايه
معلش انا النهارده نفسيتى صابحه وحشه اوى سامحونى مليش غيركم افضفض ليكم
تعبانه ومحتاجة مشورتكم
انا بحب بنتى جداهى عمرها اربع سنين ونص
لكن بنتى قرفانىىىىىىىىىىىىىىىى اوىىىىىىىىىىىىىىىىى
هتقولوا ليه طالما بتحبيها
المشكله ابوها دلعها زياده
هو وزنه زياده وبقت فى نفس عاداته فى الاكل بتاكل بنهم مثله وبطريقته وبعدين ترجع تقريبا كل يوم وبتحرجنى قدام اى ضيوف بتحسسهم انى مجوعاها رغم انى طول النهار مليش هم غير التنظيف وعمل الاكل
والله تعبت
ويجى ابوها بعد كده ويفرض عضلاته عليه ويقولى انتى السبب نظملها اكلها وان البنت بتحرجه قدام الناس وبترجع وبترد عليه وحش
رغم انه هو السبب فى كل ده
وعلى سبيل المثال لا الحصر النهارده الصبح قايمين من النوم تمام رغم انى سهرانه مع اخوها طول الليل لسه شهرين وكمان تعبان
قمنا من سته قعدت تتفرج على التليفزيون وانا دخلت اعمل السندوتشات ليها ولبابها
وجينا للجزء الصعب تلبيسها وتسريحها للمدرسة زى كل يوم نفس الكارثة
وانا بلبسها تفضل تضحك من غير سبب زى المجانين وتنطت وتقولى رجلى وجعتنى لبسينى وانا قاعده مش بقولكوا مليانه اقولها يعنى عمالة تتنطتى وجيتى على البس ورجلك وجعتك البسك الكلون ازاى وانتى قاعده
طبعا تقعد تزن وابوها بيلبس فى الغرفة المجاورة يدخل يزعقلى ويقولى انتى زعلتيها ليه هى بتعيط ليه وطبعا تشوف كده تزيد فى العياط اقوله متعملش كده قدامها كذا مرة مش بيسمع الكلام والله قرفت
وبعد كده التسريح واه من التسريح تزود فى العياط وتبربر وكانى بقتلها رغم انى بسرحها براحه وكمان تتنك وتقولى مش عاجبنى شعرى كده ازعقلها واقولها
هو حلو كده الباص تحت البيت
تفضل تعيط وطبعا ابوها يتجنن ويقولى صوتك عالى عملتى فيها ايه
ولما اقوله اعملها ايه هو شعرها افضل كده وانا تعبت
راح مصوت وقايل مش عاوز اسمعلك صوت وضرب بنتى على ايديها وقالها بطلى عياط طبعا قعدت تبص ليه وتتشحتف تصوروا عمل ايه
جيه وخبطنى انا على كتفى وقالى منك لله خليتنى ضربت بنتى على الصبح
قولتله اناتعبت حرام عليكوا
نزل وخدها ورزع الباب وراه
انا حاسه ان هو السبب انه السبب فى ان بنتى بتعمل كده بتشوفه باستمرار بيدافع عنها فبتزيد فى الهبل وبيرجع يقولى تربيتك
ويقولى البنت اسلوبها وحش فى الرد وبتبهدل هدوما ما هو السبب
عارفين انا اكتشفت ان حوالى 80 % من مشاكلى مع جوزى سببها بنتى
هتقولوا ليه
كل ما نخرج تزن يزعقلى انا
نروح عند حد تحرجه فيزعقلى انا ويرمى اللوم عليه
طبعا بناءا على كده انا بقيت بتعامل معاها بعصبية شديده بسبب انها بتجيبلى المشاكل مع ابوها
تصوروا بنتى وحبيبتى وسبب مشاكلى
انا بقت نفسيتى منها هى وابوها فى الارض
اعمل ايها علشان اظبطها
واخليها تبطل تبقى زنانه وتبطل تعمل كده قصاد ابوها
المشكله انها مش بتعمل كده غير قصاد ابوها يعنى طول النهار تسمع كلامى وما بتزنش
بس تشوف ابوها تتغير 180 درجه
انا تعبت اعمل ايه :angry2:
انتوا عارفين انا كان عندى ولد جميل توفى من سنه
مات وهو عنده سنه ونص
كان عنده نزله معويه بسيطة بس قدر الله وماشاء فعل
اليوم اللى مات فيه قبل ما يموت بساعتين دروخ فافتكرته عاوز ينام وهى قعدت تعك فى الاكل وانا قعدت ازعقلها وبعدين رجعت ركزت معاها وقعدت الم فى ترجيعها وازعقلها وغيرت ليها وعلى ما رحتله لقيته نام
او افتكرته نام اتاريه كان بيموت وعلا صحيته بعد ساعه لقيته مش دارى بالدنيل وعلى ما جرينا بيه على الدكتور كان مات
ان لله وان اليه راجعون
انا حاسه انها بتستنزف كل وقتى وكل طاقتى
لا بلاقى وقت لابوها ولا لاخوها وفى الاخر بحس انها بترد عليه وحش وبتسسبب فى احراجى ومشاكلى مع ابوها
ادعولى ربنا يهديها ويفرج كربى وقولولى اعمل معاها ايه
اكيد نجاربكم هتفيدنى
وفقكم الله لما يحب ويرضى