بنتي بسم الله عليها والخوف من الموت

السلام عليكم يا خواتي
بدخل في الموضوع على طول
بنتي عمرها 5سنوات بعدها في الصيف بتكمل الخمس سنوات
خوفتني وايد وايد
البارحه كان ابوها يسولف مع اخوانها الكبار عن أجر صلاة الفجر وما أدري اذا جاب لهم طاري الموت والا لا
المهم فجأه قالت وهي خايفه وتعرفون كيف نظراتها مثل اللي تترجى أحد كانت مثل اللي تترجى أبوها بابا أنا ما اريد
اموت
ما اريد اموت
قام قال لها ابوها حبيبتي كلنا بنموت
علا صوتها شوي وخالطته حشرجه صوت واحد خايف يموت الحين والعبره تخنقها
بابا بس انا ما اريد اموت شوي بتقول لابوها الله يخليك
قام حضنها ولماها لصدرها وهي تواصل في الطلب
بس انا مارايد اموت
وقعدت على هالحال لحد ما نامت على صدره وهو يهدي فيها
ويقول يا ماما اللي يموت يروح عند الله في الجنه وهي مصره ما تبغي تموت بسم الله عليها
وقال لي تحققي من الامر من اخوانها اذا احد خوفها
اخوانها 3 اكبر منها ولد وبنتين
البنتين قالوا اخونا مره قال لها
رحت له قال انا ما قلت الا اللي بيصلي يموت ويروح الجنه
مع اني حاسه ان اخوها كذاب لأن خواته يقولون هو يخوفها بالموت
المهم زوجي رقاها وقرأ عليها قرآن ورقيه وادعيه وهي على حضنه

والله يا خواتي حتى احلامي البارحه كانت كوابيس من الرعب اللي شفته في عيونها
والله كأن ملك الموت كان قدامها ذيك اللحظه
كانت مخنوقه وتردد الطلب برجاء ورا بعض ورا بعض
ما اريد اموت ما اريد اموت
بعد ما نامت رحت لابوها وعصب علي لأني كنت خلال ما هي خايفه اقول لها
ما راح تموتين يا حبيبتي
ما راح تموتين
قال لي ليش تقولين لها هالكلام بالله وكبرت ومات واحد فينا تبينها تنصدم وتنهار
وهي حاطه في بالها ماحد بيموت
قلت له مو لازم هي تعرف الحين بتعرف لما تكبر شوي
هي ما همها احد يموت الحين الا هي قالت انزين انا ما ارايد اموت لما انت قلت لها كلنا بنموت
ما قالت ما اريدكم تموتون قالت انا طيب ما اريد اموت
وبعدين قلت له هي خايفه ومرعوبه
واصلا احس ما له داعي تعرف اي شي عن الموت
دامها خايفه منه

شو رايكم في هالحال يا خواتي
وش الحل مع بنتي وخوفها من الموت كل فتره وكل ما اسمعت طاري قالت ما اريد اموت؟
وشو اشرحلها وكيف اتصرف معاها؟
والله حسيت ملك الموت قدام عينها البارحه وما جاني نوم طول الليل