بنتي تتشنج

السلام عليكم ورحمة الله وبركاته
ماعرف وين القسم المناسب للموضوع لكن بطرحه هنا والمشرفات ينقلونه للقسم اللي يشوفوه مناسب
اسفه موضوعي طويل شوي


انا عندي بنت الان عمرها سنتين وشهرين في عمر سنه تقريبا جاها التهاب باللوز وارتفعت حرارتها واتشنجت وهذي اول مره تتشنج فيها لكن في هالمره اتشنجت مرتين مره بالبيت ومره بالمستشفى وصار يتكرر عليها التشنج كل مالتهب اللوز وارتفعت الحراره والمشكله الحراره ماتكون عاليه مره يعني مجرد ماتوصل 38.5 او 37.8 تتشنج والمره الاخيره تشنجت 5مرات وتنومنا بالمستشفى 24ساعه وفي المره الاولى تنومت 4ايام وكل مره فحوصات وتحاليل وكلها كويسه عدا ان عندها نقص فيتامين د من الولاده وحديد
وديتها مستشفى الاطفال وصرفت لها اخصائية عامه علاج كيبرا لصرع وقالت تستخدمه لمدة سنتين وقالت لازم كل 6شهور تعمل تحاليل لوظايف الكبد والكلى واعطتنا تحاميل تنحط بعد مرور 3دقايق على التشنج تقطعه
قبل شهر تشنجت وكنا ودينها بالتشنج اللي قبله لطبيب في عياده خاصه يعالج اللوز فعالج لها اللوز ومع ذالك ماكملت اسبوعين والتهب اللوز واحتقان بالجيوب الانفيه والدكتور قال هذا تشنج حراري ولاتعطيها علاج لكن لما تشنجت المره الاخيره اتصل عليه زوجي وقاله انها تشنجت 5مرات خلال24ساعه قال على كذا ابدى بالعلاج ووقتها كنت مستخيره بالليل هل نعطيها العلاج او لاولما جاء زوجي من برى كان توها متشنجنه فما تحمل وقال هاتي العلاج بعطيها وكان خلاص بيعطيها لكنه مو متاكد من الجرعه وكان متردد
فلما شافني ابكي قال يالله على المستشفى مع انه كل ماقلت له بنوديها المستشفى يقول وش بيسوون لها مفس كل مره حافض ومضاد قلت احسن من نخليها ويصير لها شي المهم رحنا وزي ماقلت اتنومت 24ساعه وسووا لها تحاليل وحتى ابرة الظهر عشان ياخذون عينه من السائل الشوكي كنا رافضينها لكن هالمره وافقت نسويها لاني تعبت وصرت على طول بقلق وحاولوا ياخذون عينه ولعب فيها الدكتور بالابر وماطلع معه شي وعصب عليه زوجي وقال خلاص لاتحاول مره ثانيه
ولما وريت الاستشاري العلاج حق التشنجات قلت له اني مابداءت فيه قال كويس انك ماعطيتيها اولا لان اللي صارفه مو استشاري مخ واعصاب وثانيا لان لو بدءتي فيه لازم تلتزمين فيه سنتين وله اثار جانبيه بعدين كيف يصرف العلاج قبل عمل التخطيط ومعروف ان العلاج ياثر على التخطيط حتى لو فيه شحنات ماتبين والتخطيط في شهر رمضان قام عطانا وصفة تحاميل اللي تجهض التشنج لو حصل وكتب لنا تحويل مستعجل لمستشفى الاطفال اللي بدال مايقبلوا التحويل المستعجل حطوا لنا موعد ابعد من الموعد اللي كنا حاجزينه قبل يقولوا هذا نظامهم مافيه شي اسمه مستعجل الله المستعان


وانا الان عايشه بقلق لان مناعتها ضعيه وبسرعه تتاثر وانا من اول تشنج ماعطيها شي من الثلاجه واحاول ادفيها وحتى في الجو الحار مانشغل المكيف اللي نكون عنده عشان ماتبرد
سؤالي من مرت عليه نفس الحاله يعني الطفل يتشنج تشنج متكرر مع الحراره
وهل هذا يدل على ان بنتي عندها بؤره صرعيه لان الدكتورة سعوديه اللي في مستشفى الاطفال واللي صرفت لها علاج التشنج قالت لنا هذا يعتبر صرع وخفت لان كل ماسالت احد قالوا نعرف التشنج الحراري لكن مايتكرر باليوم 5مرات
علما ان بنتي طبيعيه وذكيه ماشاء الله
ياليت تريحوني وتقولون لي اذا فيه حالات مثل حالة بنتي وراح التشنج بعد ماكمل الطفل 5سنوات ولا هذا صرع زي ماقالت الطبيبه؟