بنتي تحب جهة اليمين..انقذوني

السلام عليكم ورحمة الله
كيفكم يا امهات

والله الامومه مسؤوليه عظيمه وضغط شديد...كل يوم يطلع لي مشكله الله المستعان
الله يعظم اجر والدينا ويجعل مقرهم في جنات النعيم


السالفه ياطويلات العمر
بنتي الله يهدي قلبها ويجعلها من الصالحات
تحب جهة اليمين..طول الوقت ملتفته عليه
خاصه لما اوقفها يعني ولا العبها مايلفت انتباهها الا اليمين
طبعا هي الحمدلله سليمه مافيها شي وعيونها كذلك الحمدلله
وانا بكريه ما ادري وش القضيه كنت لكن نبهتني وحده ولا ادري هل هو صحيح او لا
قالت انها اذا استمرت على التفاتها لليمين دايم خلاص يصير راسها مايل حتى اذا كبرت
وانو لازم تعدلين نومها بحيث لما تبي تشوفك تصير تلتفت يسار

المهم اني سويت كذا
وعادي تشوفني عاليسار وتلتفت علي مافي اي مشكله
لكن بالتلعيب والتوقيف تلتفت يمين..هل فيه خطر او تشويه لها بعدين او انها بيصير راسها ورقبتها مايله؟؟
كمان راسها او فضختها على قول جداتنا كانت كويسه بس هالشهر قالوا لي تغيرت وانا مدري وش غيرها احس راسها يهبل خخخ لاني اصلا ماعرف ولا اهتم
واسال جدتي قالت اذا قعدت راسها يتكور ويصير وش زينه؟؟
هل هذا صحيح

وفي استفسارات فرعيه
بنتي لها اسبوع في الشهر الرابع وملاحظه عليها باديه تمص اصابعها وانا عادي هالشي اكتشاف لكن هالاسبوعين تمص الابهام وتهدى عليه مره وانا مادري كيف امنعها عنه لساتها صغيره خايفه اسوي شي تقوم تتعلق فيه اكثر ..وش تجاربكم

ايضا اللعبه اللي تتركب عالسرير وتدور وين احصلها
لقيتها في مذركير بس غاليه

وسلامتكم
الله يجزاكم عنا خير الجزاء