صباح الخير
اول بنتي عمرها سنتين وثلاث شهور مجننتني بس تبكي وتصيح وعنيفة مع الأطفال وتضرب اخوها الي اصغر منها والي اكبر منها وماتسمع كلامي ابد لو اموت عندها مستحيل تسمعني اتعبتني حيل والله معاد اطلع زيارات ولا بيت اهلي ولا عند اهل زوجي بسبب البكي والصياح الي ماله حل
وانا طبيعه تعاملي مع عيالي اذا قلت غلط يعني غلط اخوها ماشاء الله يسمع كلامي وهي مستحيل
انا مادري الغلط فيني ولا فيها وناس كثير تقولي بسبب اسمها غيريه لها وابوها رافض اني أغيره
اسمها إيلاف
تكفون اقلها دعوه حلوه تسعدني
ملكه جوري @mlkh_gory
عضوة فعالة
يلزم عليك تسجيل الدخول أولًا لكتابة تعليق.
مو الاسم ولا شي هذي خرافات بس تلاقينها غيرانه وحاسه بعدم اهتمام اذ عندك طفل اصغر منها .. ويمكن تبي اهتمام وتلفت النظر والله اغلم اسالي استشاري اطفال
الصفحة الأخيرة
التربية يا الغالية تبغى لها صبر وطول بال .. الله يكون بعونك ..
وفي الحقيقة عيالنا هم اللي يربونّا ويجعلونّا نغيّر عاداتنا معاهم ..
لذا يا عمري .. اصبري وما صبرك إلاّ بالله .. وبإذن الله مأجورة ..
وبالنسبة لبنتك .. صغيرة .. يا حبيبتي ..
- أعتقد من رأيي اسمها ما له علاقة بالموضوع إن شاء الله .. ويمكن عدوانيتها ترجع لــ ..
- يمكن لما كنتِ حامل بها كانت نفسيتك متوترة ..
- أو غيرة بنتك من اللي حولها .. وخاصة إذا كانت مدلعة سابقا ..
- أو بنتك تحتاج تركّزي عليها من ناحية العاطفة والحنان .. والأطفال يختلفون .. ولا تقارنينها بأخوانها .. يمكن تكون أكثر ذكاء منهم بسبب كثرة حركتها وطاقتها .. اسم الله عليها .. الله يحفظها ..
- أهم شيء أنتِ لا تصارخين عليها .. ولا تعنفينها حتى ما تزودي الأمر سوء ..
- أنزلي لمستواها وكلميها بكلمات تفهمها .. ووضحي لها إنك ترفضين أنها تضرب غيرها .. بحيث تجيبين اللي ضربته قدامها وتقولين لها .. قولي .. آسف .. وتطلبين منها تبوسه .. بحيث تعرف إنك ترفضين أسلوبها ..
- لابد تعرفين إن الطفل بعد السنتين يبدأ بإبراز نفسه ويوضح للجميع إنه موجووووووود .. عشان كذا يتصرف بالعناد .. وهو ما يعرف العناد ويعتبره استقلالية ..
- انتبهي توصفينها بصفات سيئة وخاصة وهي تسمع .. مثلا أنتِ شقية أو ما أحد يحبك أو أخوانك أفضل منك .. لأنك تزيدين الأمر سوء .. انتبهي ..
بالعكس دائما امدحيها إذا عملت حاجة صح وشجعيها .. وإذا عملت حاجة خطأ .. قولي .. أنتِ حبوبة وجميلة والكل يحبك ولكن عملك هذا خطأ .. بحيث يترسّخ بذهنها فيما بعد .. إن شخصيتها محبوبة ولكن تصرفاتها منبوذة .. وتعملي على زيادة الثقة عندها .. وامدحيها دائما وهي تسمعك عند أبوها وأخوانها وأهلك ..
- لا تصارخي عليها بتاتا لأنك بهذا الوضع راح تزيدي الأمر تعقيد وأكيد انتِ القدوة ..
- حتى لو ضربت أحد .. أجلسي جنبها وامسكي كتفها بحنان وناظري بعيونها وأسأليها ليه ضربتيه ..؟؟ .. حاولي توضحي لها إن الضرب خطأ .. ولابد تحرميها من شيء تحبه إذا أخطأت .. مثلا أحرميها من لعبتها .. أو اتركيها تجلس بروحها وامنعي أحد يلعب معاها .. ساعة على الأقل .. ولا تكلميها إلاّ إذا هي طلبت منك تكلميها .. وانتبهي تمدحين أحد حتى لو كان أفضل منها .. حتى ما تزرعي الغيرة والكراهية بقلبها ..
- شجعيها لو بكلمة وبوسة وحضن كبير .. لما تتصرف تصرف سليم ..
- بنتك اسم الله عليها عندها طاقة .. حاولي توجهيها للألعاب الحركية والجماعية مثل مراجيح ونطيطات .. واشتري لها الألعاب التعليمية ذات القطع الكبيرة وأهم شيء تعزز جانب المشاركة .. وياليت أنتِ تشاركيها اللعب لو ساعة في اليوم .. وتحاولي تقربيها منك .. ودائما احرصي على حضنها واحتوائها .. ودائما حسسيها بحبك لها ..
- اشتري مرة هدايا لأطفالك .. واجعلي كل واحد يقدم هدية للثاني ..
- كــــــــــــــــــوني حازمة ولينة في نفس الوقت .. وتذكري قوله تعالى ( ولو كنت فظا غليظ القلب لانفضوا من حولك ) .. وقوله تعالى ( اذهبا إلى فرعون إنه طغى فقولا له قولا لينا لعله يتذكر أو يخشى ) .. فالكلمة اللينة تعمل مفعول السحر في الكبار فكيف سيكون الحال مع الصغار بمشيئة الله ..
- أسلوب القصص من أساليب التربية .. والأفضل تذكرين أبطال القصة بأسماء عيالك وخاصة بنتك .. وتوصفين البطلة بالصفات الحلوة اللي تحبيها في بنتك .. وراح تشدّي انتباهها بإذن الله ..
..
أسأل الله بمنّه وفضله وكرمه لكِ التوفيق والسداد ولأبناءك الهداية والرشاد .. آمين ..