بنتي حبيبتي تكرهني ادعولي انه ربي يحببها فيني

السلام عليكم و رحمة الله وبركاته
اخواتي اتمنى تنصحوني او تعطوني حل او عالاقل ادعولي انه ربي يحبب بنتي فيا
من انا صغيرة اموت عالاطفال لاني كنت اصغر وحدة وكنت احب العب مع اطفال اقاربي وكدا بس كنت الاحظ انه الاطفال يحبو اختي اللي اكبر مني بسنتين اكثر ليش ما ادري
ولما اتزوج اخي الكبير وصار عنده طفل كنت امووت عليه والعبه وبرضه كان يحب اختي اكتر وقتها جاني احباط وقلت شكله ماليا محبة في قلب الاطفال وكنت ادعي ربي يرزقني بزوج عشان يصير عندي نونو يحبني
ممكن تشوفو كلامي يضحك بس اللي تحب الاطفال ممكن حتحس قد ايش الموضوع مهم بالنسبة ليا
الحمدلله ربنا استجاب دعائي واتزوجت وجبت احلى بنت وكنت طاااايرة فيها لاني اموووووووت في شي اسمه بنت ومن يوم ولدتها كنت مررررة متعلقة فيها واقوم بكل شي يخصها وما اخلي احد يساعدني لاني كنت باستمتع بكل لحظة في الامومة يارب لك الحمد لدرجة التهبت خياطتي واتخيطت من جديد وشفت الموت بعيني بس كان بالنسبة ليا ولاشي مقابل اني اكون كل شي لبنتي
المهم الان بنتي عمرها سنة ونص الله يحفظها ويهديها وانا موظفة ورافضة اجيب شغالة لبنتي عشان اخاف تاذيها واوديها حضانة واتعب كتييير لاني قايمة بكل شي في البيت وللاسف بنتي مرررة متعلقة بابوها ومررررة ماتحبني ما اعرف ليش
انا ابى بنتي تحب ابوها لانه حلو دا الشي بس مو عارفة هي ليش تكرهني انا قايمة بكل شي لها من غيار واكل وحليب وحضانة ونوم ومرات العب معاها واضحكها لما اكون رايقة طبعا من الضغط اللي انا فيه ما اكون رايقة كتير
ابوها بس يشيلها ويلعبها شوية ومرات قليلة جدا ياكلها وبسسسس
لما نروح عند اهلي بنتي تنساني تصير ماتبغاني ابدا وبس عند اختي اللي يحبوها الاطفال رغم انها ماتعملها شي مفيد بس تدلعها وتشيلها وتاكلها شوكولاته مررة ينكسر قلبي لما ترفضني بنتي واهلي يحسبوني قاسية معاها والحقيقة العكس
احيانا بنتي لما تغلط او ماتسمع الكلام اخاصمها ولو عاندت اقرصها بشويش وبطلت اعمل كدا قلت يمكن كرهتني بسبب دا الشي لكن برضه مازالت تكرهني وابوها مرات يخاصمها بقوة وتخاف شوية وبعدها ترجع تلصق فيه
الموقف اللي خلاني اكتب دا الموضوع انه انا قصرت في حق نفسي من جمييييع النواحي ولاعمري تركت بنتي عند احد ومتحملة المشاكل وكل شي بس عشان اعوضها الحنان ومو مستفيدة شي للاسف على قد تضحياتي
الاسبوع اللي فات جاني ظرف مرررة طاريء وسبت بنتي لاول مرة عند اهل زوجي ونامت عندهم وانا قلبي من جوا يتقطع لفراقها وابوها جدا عادي ولما جينا ناخدها كنت مررررة مشتاقتلها ونفسي اضمها فلما شافتنا صارت تبكي وتجري على ابوها وحضنته وصارت قاعدة عنده ماتبى تسيبه وانا ابكي من جوايا اباها تجي تحضني وتجري عليها مو راضية قعدت اناديها وحاولت اخدها منه مو راضية تجي مرررة وقتها اتمنيت اموووت ولا اعيش دا الموقف
دااايما ادعي انه ربي يرزقني حب بنتي وتطلع بارة فيا بس شكله سندي الوحيد في دي الدنيا تكررررررهههني اتمنى ماتشوفو مشكلتي تافهة او اني حاسدة ابوها بالعكس انا اباها تحبنا الاثنين مو تكرهني وانا امها
اللي عندها حل تساعدني ومارح انساها من دعائي واللي ماعندها حل تدعيلي انه ربي يرزقني حبها