راح اقول رأيي بكل صراااحة ولا اطلب منك الا سعة الصدر 
انا اشوف ان تصرفات بنتك طبيعية 100٪ 

وتصرفاتك انتي وزوجك وطريقة تفكيركم الغريبة  .. غلط بغلط 

هي مجرد طفلة وطبيعي انها تكب الاكل وتلعب 

وابوها هذاااا ليه ينزعج منها وانتي توافقينه بعد 
وتضربوا البنت !!! 

شوفي الضرب في هذا العمر ما يسبب الا اذى نفسي للطفل ويصير عصبي بزيادة 

يعني انتي لما تضربيها توصلي لها رسالة ان الضرب هو اسلوب التعامل الصحيح 
وهذا قمة الخطأ 

وخايفة زوجك يهج من البيت ؟؟ عشان بنتك الله يحفظها مزعجة 

تضنون ان التربية سهلة .. انا ولدي يسوي اكثر من بنتك بمرااااحل لما كان بعمرها يضربني ويعضني ويخرمش وجهي وعصبي جداً ودائماً يصرخ ما اقدر اطلع معاه مكان يضرب الاطفال والكبار بعد 

والله اني كنت استحمله ولا اضربه ابداً واقول طفل بكره يكبر ويتغير 
وبعدين عرفت السبب 

وهم اللوز .. ولدي مسكين اللوز كانوا كبااار جداً وفيهم إلتهاب مزمن وعنده حساسية  في الانف 

والدكتور قال ان هذا يسبب له العصبية .. وألم في المفاصل  وادي كان يشتكي من ظهره دائماً غير ان الصديد الي يتكون على اللوز ينزل داخل الجسم وينزل على القلب والكبد ويسبب نزلات معوية في المعدة .
تخيلي انه طفل ويعاني والم في الظهر  وهو ما كمل حتى الثلاث !!! 

انا ما اقول ان بنتك فيها شي لا سمح الله 
لكن تحمليها وبكره تكبر وتتغير وتفهم لساتها طفلة 
حاولي معاها باسلوب الكلام 
تجلسي بمستوى طولها وتخليها تطالع بعيونك وتكلميها بصوت واااطي بس جاد 

صديقيني مرة مرتين ثلاث اربع بعدها بتتغير 

لا تضربيها ابداً وفهمي ابوها ان ما ينزعج منها 
وكل الاطفال كذا 

حبيبتي حرام عليك بنتك صغيرة ليه يضربها

تدرين ليه هي تضرب أختها لأنها تعودت ان هذا طريقة التعامل مع الآخرين

انتي حبيها واحتويها وخلي أبوها يحسسها بحبه واحتوائه عطوها حنان وسولفوا معها

خليها تطلع طاقاتها بألعاب حركية مثلا وجيبي لها سبورة او دفتر تلوين ولوني انتي وياها شاركيها اللعب

هي توها صغيره وتقدر ين تتحكمين بشخصيتها بس يبيلك تثقفين نفسك أول

تناقشي مع زوجك بهدوء عن حلول كيف تتعاملوا مع طفله عنيده وعصبيه وغيوره
بنتك محتاجه حنااااااااااان وكلام حلو وتشجيع طبيعي عندها اخت 5 شهور غيره اطفال لانكم اهملتوها بالحنان طبيعي الطفل يغار خطا تضربيها تعاملي معاها انها كبيره وعاقله وتفهم وخاطبيها اكبر من سنها وابوها وقت مايرجع يذكرها بهديه وهو راجع ويقول لها جبت هديه لانك شطوره اختها 5شهور صغيره ماتدرك ايش يصير حولها حاولي تحضنيها كثير تلعبي معاها رددي عليها انا احبك بنتك غيررررره مافيها غير العافيه وشبعيها اكل قبل ابوها يجي

تدرين المشكلة مو في بنتك (المشكله في البيت كله)
تدري ولدي كان مثل بنتك والسبب الرئيسي هو انا وانتي والاب عارفه كيف
والله اانا كنت مجنونه اطفال قبل الزواج حتى اللي بالشارع يوووه انهبل عليه ولازم ابوسه وكل بزر
اشيله والاعبه بجنون والكل ملاحظ هالشي بس تعرفين من جبت ولدي صرت عصبيه مدري
جاني اكتثاب النفاس او حسد والله أعلم والله الكل يقولي وش فيك صرتي مجنونه عصبيه حيل
قسم بالله اوقات ابكي ابكي لما اتذكر ولدي كان صغير وكنت اصرخ في وجهه واشد شعري زي المجنونه
ونطط من مكان لمكان
فاهمين كيف انتم قاعد تتخيلوا وانهبلتوا أكيد طيب كيف بطفل عمره 7 شهور أو اصغر وقاعد يشوف امه
بهاذي الحاله اكيد انصدم كبر ولدي وصار عنيف وبس يصارخ علينا ولما يسمع صوت قوي
مثلا عند اهلي واحد صارخ لو من بعيد على طول يهرب للزاويه وامي تقولي جنني الولد
كنت طيبه وحنونه عليه لكن الاغلبية اكون عصبيه
آآآآآآآآه بس مو بيدي في شي كان فيني
كنت اقراء قرآن وتروح الحاله بس تخيلوا ايش صار اذا خفت معي تنتقل لزوجي
زوجي اللي كان يموت في ولده وطول الوقت
يقولي انتي عصبيه عليه ويحميه مني الآن لما بديت اعالج روحي في القران انتقل له المرض هنا تأكدت انه حسد
توكلت على الله وبديت اقراء قران لكن مو محافظه مره
ومره صار موقف ماانساه بعدها بكيت بشده ورحت كتبت في قوقل
حكم ضرب الطفل وطلع حرام لانه صغير ولا راح يتعلم ولا راح يفهم
وعلى فكره الحسد والعين كذا تبدا في واحد فيكم وتنتقل للثاني لمن تعم البيت بالكامل
وقفت مع نفسي وقفه وقلت خلاص انتهى لازم اعالج نفسي وهذا الحكم طلع حرام اضرب طفلي ومو من حقي
الا لمن يكبر ويفهم وعند التأديب والصلاة فقط
مو على اي شي تافه نضربهم
المهم
الحمدلله بديت اسمع ايات العين والحسد وبدا قلبي يحن على وليدي واكتشفت اني
1/ كنت اشوفه و اعاملة معاملة كبار كأنه يفهم اللي اقوله ولو ماسواه اصارخ عليه
الآن الحمدلله والشكر رجعت زي ماكنت رجعت ذيك الانسانه الحبوبه اللي تحب الاطفال علشان
قربت من ربي ودعيته بحرقه يبعد عني هالاذي ويحنن قلبي على ولدي
حاولت قد مااقدر اعوضه عن اللي كان يشوفه مني وضمينه وبوسته وخليته يسوي كل شي نفسه فيه
هو في البدايه مو مصدق وكنت اراقبه اشوف الفرحه بعيونه وبنفس الوقت اشوف الخوف
يمكن 4 ايام كذا
عطيته الثقه زودت الحنان زودت الدلع ولما يقول ابوه شي ادافع عنه عكس قبل كنت
فاهمه التربية غلط كل شي اقوله لا خليه يتعلم
تبينه يتعلم احرميه الدلع الماصخ لكن لاتحرميه الحنان ومافيه مانع من الدلع الحلو بدون قلة الادب
وهناك فيه فرق اللي ماكنت اشوفه
الحمدلله صار ولدي يضحك بكل ثقه قبل كان مأخذ شخصيتي بس عصبي ويصارخ وحواجبه مرفوعه
الحين يضحك بكل قوه وتحسينه مطمن يارب تدومها عليه وتحفظه من كل شر
وصار يستهبل علينا
مع بعض قلة الادب احيان يجي يعطيني كف فجأه كذا لكن وقتها اضحك وابوس ايده لاني استاهل هالكف
احسه يقولي ليش تسوين فيني كذا انتي اللي علمتيني الضرب


ادري قرقت عليك كثير بس والله لما دخلت موضوعك تذكرت نفسي ممكن اللي فيك نفس اللي كان فيني
قربي لربك ارقي نفسك واولادك وبيتك كامل يمكن تلاحظين اول يومين هدوء وبعدها واحد فيكم راح يعصب
لكن استمري على القران لاتتركينه أبد أبد
وبالنسبه لبنتك انها تضرب اختها شي طبيعي لانه معنفه منكم راح تحط حرتها في اختها لكن لما تشبعونها حب وحنان
بكل الوقت اكيد انتم تحبوها وتدلعوها لكن اقول طول اليوم عامليها ك طفله شيليها لاعبيها واتركي الصغيره على جنب دامها ماتفهم

ولما تضربها امسكي يدها بهدوء وشيليها وروحوا للالعاب والعبي معها او اعطيها الاكله المفضله عندها
الطفل لما تهاوشيه عن شي خلاص راح يفهم انه يرفع صغطك وراح يبدا يسويه لكن انتي خليك ذكيه
واسحبيها لموضوع ثاني بسرعه راح تنسى

حبيبتي انا تخصصي رياض اطفال واعرف زين حركات بنتك

بنتك بكل بساطة تبي لفت نظر

عشان تتجنبين حركاتهم عطوها اهتمام بوقت هي ما تطلبه

مثلا قبل لا تبدا تشد السفره و تحوس الدنيا سولفوا معها وامدحوها و خلكم طايرين بها

مره عن مره بتقل كثييير حركاتها

اما اسلوب الضرب والحبه موب جايب نتيجه ابد