بنتي صارحتني انها تبي تتزوج :(

اهلا بنات
مشكلة وحده قريبتي تبي تسمع ارائكم


انا متزوجه لي 23 سنه وعندي 3 الله يحفظهم بنتين وولد اكبر وحده عمرها 22 سنه والصغيره عمرها 11 سنه وينهم ولد 19 سنه الله يحفظهم لي
حابه اوضح نقطه قبل مابدأ الموضوع انه انا مربيه عيالي عللى الصراحه معاي وانهم يقولون لي كل شي ويفرغون اللي بقلبهم ويعلموني بكل شي يصير معاهم


مشكلتي بدأت من لمن بنتي الكبيره بدأت تكبر وتصير بعمر الزواج خل ااوصف لكم بنتي اهي سمرا طالعه علي وشعرها مو ناعم وسط وطويله وضعيفه مملوحه
ولكن مجتمعاتنا تعرفونهم يموتون بشي اسمه بياض ويقدسونه والسمرا عندهم مو حلوا المهم رجع لموضوعنا
بنتي من لمن دخلت ثانوي وربعها بدوا ينخطبون وكل يوم تجي تقولي ماما فلانه انخطبت ماما صديقتي هذيك ملكت وهكذا
انا طبعا ضد الزواج بهالعمر ولكن مجتمعي عندهم عمر الزواج للبنت يبدا من 16 وفوق المهم وصرت احس انه البنت نفسها تنخطب وبدت تروح معاي الزواجات والمناسبات
وكل يوم تجي وتقولي عن من تزوج من انخطب في مدرستهم ولكن انا طنشت الموضوع وكنت اعتبرها تسولف معاي عادي ماكنت اتوقع ان في راسها شي
المهم لمن وصلت ثالث ثانوي شفتها يوم متضايقه وصايره مشكله بينها وبين صديقتها فجيت اسألها عن المشكله(طبعا اهي عندها قروب كبير اصدقائها تقريبا عددهم 12 وكلهم اعرفهم حمد الله ويجمعون دايما وعندهم قروب في الواتس اب )المهم قالت لي ماما انا متضايقه انه وحده من ربعي كنا نسولف في تججهيزات الزواج لصديقتي الجديده فجات وقالت لي قدام القروب انتي شعرفك بالتجهيز انتي ماجربتي !
وكل فتره والثانيه تجيني مضايقه ان ربعها يدقونها بالكلام انه انتي صغيره انتي ماتزوجتي انتي ماتعرفين المهم انا كنت اقولها طنشي واذا ماعجبك حذفيهم تقولي لا ياماما اهم صديقاتي من سنين
وتخرجت بنتي من الثانويه وفرحت لها من كل قلبي وربعها اللي في القروب 8 منهم تزوجوا وملكوا وباقي 4 ومعاهم بنتي وتروح لاعراسهم وتفرح فيهم
المهم دخلت الجامعه بنتي ونفس الشي كل شوي تجي تجي تقولي عن مواقف تتعرض لها انه البنات يعلقون عليها انها ماتزوجت وماتعرف وانا كنت اعزز شخصيتها واقولها خلهم يولون والزواج مو كلشي وتوك صغيررره ووووووالخ
وبنتي طول عالفتره مامره انخطبت ابدا لا من قريب ولا من بعيد
جاتني مره قالت لي ياماما انا حذفت قروب صديقاتي وقاطعتهم لاني مليت كلا كلامهم بالزوج والعيال وانا ماعندي شي اسولف فيه وكلهم 12 تزوجوا وماحب اتم بينهم كذا قلت لها احسن بعد
بعد ثلاث شهور من حذفتهم صاروا اصدقائها بنات عمتها وعمها وتطلع وتروح وتجي معاهم ولكن المشكله زادت لمن بنات عمتها انخطبوا كلهم ورى بعض لله يتمم عليهم وصارت تنقهر لمن تشوفهم
وصاروا يدقونها بعد بالكلام وصارت تجي تقولي ياماما اهم صاروا يشوفوا روحهم علي مع انهم اقل مني ماديا واهلهم حاكرينهم بس تزوجوا وانفكوا صاروا يدقوني بالكلام واقولها عادي وطنشي وتوك صغيره عالزواج ووووالخ
المشكله تفاقمت وكبرت متى ؟! لمن اختها اللي اصغر منها ب 10 سنوات صارت بمتوسط طبعا اختها بيضااااا وشعرها ناعم وجسمها حلو وصارت تطلع وتجي معاي وتعرفون مجتمعنا هذا المواصفات اللي يبغونها فصاروا يخطبونها مني! قدام اختها الكبيره :( وانا الاحظ انه الكبيره تنقهر وتنحرج ولكن انا اصرفهم واقولهم صغيره
وكل عرس اروح ولا مناسبه اخذ معاي بناتي يخطبون مني الصغيره وطول العرس بس يسألون هذي بنت مين والاحظ انه بنتي الكبيره تنقهر بس مابيدي شي
هالسنه بنتي الكبيره ببتخرج من الجامعه الحمدالله وتقديرها عالي وانا فرحانه فيها ولكن صار اللي ماتوقعته !
مره صار نقاش بينا حاد انا وبنتي الكبيره على شي سخيف وماشفتها الا انفجؤت بكا وجلست طلعت اللي بقلبها لي
تقولي (ياماما انا منقهره انه كل ربعي تزوجوا وجابوا عيال وصاروا يستنقصوني وبنات عمي وعمتي يجلسون يتريقون علي وكلا يسألوني كم مره انخطبتي وانا استحي اقول لهم ولا مره وانا مليت منهم ولكن ياماما انا صرت انقهر الحين اكثر لمن اختي اللي اصغر مني ب10 سنوات وانا اللي ربيتها صارت تنخطب ! وانا ماحد طل بوجهي عشاني سمرا واهي بيضا والكل يمدحها والكل بس تدخل مناسبه يمدح لبسها وشكلها وانا ماحد يعطيني وجه والناس صارت تقارن بينا وانا انقهر شنو اسوي وانا ابغى اصير مثل باقي ربعي واتزوج واجيب بيبي ويصير عندي بيت مثلهم وانا خايفه ياماما انه اختي الصغيره تتزوج قبلي والفرق بينا كبير وووووووالخ )
طبعا انا هنا دوروني ماتلقوني مامره توقعت انه بنتي متضايقه لهدرجه وعندها رغبه بالزواج وماعرفت شنو ارد عليها وهديتها طبعا وحضنتها وجلست معاها اكلمها انه اللي الله كاتبه بيصير وانه الجمال مو بالبياض وانه مجتمعنا متخلف ووالزواج مو كلشي ووووووالخ


من قالت لي بنتي هالكلام وانا قلبي يعورني مو عارفه ايش اسوي خايفه تدخل الغيره بينها وبين اختها وخايفه انه حقيقي اختها تتزوج قبلها ومو عارفه اتصرف بهالمشكله ابد :(


للعلم ( انا انسانه منفتحه ومعطه بناتي حريتهم واثق فيهم وماقصر عليهم ماديا وسرفات وروحات وجيات ويلبسون احسن لبس وياكلون افضل اكل ولا انا من الامهات اللي تمنع بنتها وكل شي بعد الزواج بالعكس انا احب بناتي يستانسنون في حياتهم ويدللون قبل مايتزوجون )
لكن ماعرف ايش اسوي بهالمشكله وانا احاول اعزز دايما ثقتها في نفسها واحاول ابين لها انها صغيره عالزواج وتو الناس لكن خلاص البنت كبرت وصارت تفهم وتحتك بهالمجتمع الغبي اللي يقدس الزواج ويعتبره انجاز :(


اللي عندها حلول من اي ناحيه تفيدني وربي مو عارفه شسوي