طبيعي يبكون وقت العلاج الطبيعي وما يسكتون اذا كانوا في بدايه العلاج حتى لو اشغلتيهم لان هالتمارين والحركات جديده عليهم ويخافون بس مع الصبر والاستمرار بإذن الله يكون الوضع عادي وتعالجون وهم يضحكون ويساعدوكم بس اذا جاء دور المستوى الثاني او الثالث من العلاج في البدايه بيبكون نفس المستوى الاول لان الحركات زادت وصارت اقوى واكثف الين يتقبل الطفل .....




بنتي كذا والحمدلله على كل حال
1/ إحسان الظن بالله
2/ اليقين بأن الله هو الشافي المعافي
وأن مرض الطفل اختبار لصبر الام
3/ التفاؤل
4/ الصبر والاستمرار
عزيزتي الأم جددي صبرك ستأتي فتره تصابين بالإحباط وعدم رؤيه نتائج بسرعه فهذا مدخل لشيطان ولا تعطينه مجال اصبري كافحي ابذلي جهدك ولا تعتمدين على المستشفى في الجلسات سوي لطفلك جلسات بالبيت
5/ ساعدي طفلك لِساعدك ... اذا سويتي له التمارين اعطيه كلمات مشجعه لاتقولين ما يفهم مع الوقت بيفهم ويعرف سبحان الله الطفال الي محتاجين علاج ومتابعه يتحسننون مع الام اكثر من اي شخص ثاني ... شوفي سعادته كيف وقت الجلسات في المستشفى وسعادته معاك وقت الجلسات في البيت ... يستانس معاك اكثر لانه يحس بالامان وانك مستحيل تضرينه وحتى لو بكى بتتعاملين معاه بهدوء ولين




الله يشفي اطفالنا ويعافيهم ونفرح بعافيتهم
واهم شي التوكل على الله والصبر

جزاك الله اختي الكريمة ،،، كم عمر بنتك وليش ماتمشي؟

جزاك الله خير كلامك منطقي انا الله المستعان يضيق صدري بعض المرات واتنفز الله يعين

وديها عند خبيزه وابحثي بقوقل عن خبيزه وبتدعيلي بإذن الله وربي يشفيها ويخليها لك ويجعلها باره بوالديها وتشوفينها بأتم صحه وعافيه

بنتي عمرها سنه وشهرين ما تمشي ولا تحبي ولا تزحف تو بدت تتقلب ولا تقدر ترجع ... محيط الراس صغير أثر على المخ صغير وعندها ضعف في الاعصاب وأثر على عصب العين وسبب لها ضعف نظر ... كاااانت مرررره رخوه من يومها مولوده تبكي وهي مشدودده ما تحرك اطرافها وصار عمرها 3شهور جاها التهاب في اذنها وبس تبكي قال الدكتور عندها التهاب في اذنها مالاحظتوا تحرك يدها عند اذنها بكثره قلت لا حركتها مرره قليله ومثل المواليد قال طبيعي في اطفال يتاخرون شوي في الحركه ومن بعدها تأكدت ان البنت مو طبيعيه صرت اسوي لها تمارين بالبيت ومن عمرها 3 شهور الين صار عمرها 6 شهور كل ما رحت بها مستشفى قالوا طبيعيه اقول لهم كيف طبيعيه والبنت عمرها 6 شهور ما تتحرك قالوا عادي في اطفال كذا الين دكتوره الله يسعدها جت تطعمها كتبت لها تحويل سريع وضروري لدكتور اعصاب وتحويل للعلاج الطبيعي تقول لا تتاخرين بحالة بنتك باسرع وقت راجعي بها جاها نقص اكسجين وقت الولاده وراجعت بها لتمارين وكانت تبكي وقالت طبيعي الحركات جديده عليها ومع الوقت تتقبل الوضع وتساعدنا والحمدلله تحسنت ودكتور الاعصاب قال لازم تحاليل الوراثيه وما عندنا ويوم رحت للمستشفى الي جبتها فيه قالوا وينك من زمان ما جيتي تاخرتي قلت لهم كل ما جيتكم تقولون لي سليمه ما فيها شي قال ايه الحاله الي مثل كذا ما توضح الا بعد 5 شهور اقل شي قلت جيتكم وعمرها 6 شهور و7 شهور قلتوا لي ما فيها شي بس تبون تخلون انفسكم من المسؤلية ........... واحداث كثيره من هالنوع انهم يحطون الوم علي.....

الحمدلله مع الاستمرار على المساج والتمارين تحسنت بدت تتقلب وتوقف بس ما تطول لان لسى ما توزن نفسها ولما اجلسها في حضني تجلس بس ما تجلس لوحدها


اسفه على الاطاله بس الخلاصه الي مأخرها هو تأخر في النمو وضعف الاعصاب وعندها شد بالاوتار ولازم تمارين عشان ما تتعرض لشد الدائم وما يتعالج الا بالعمليه واحنا في غنى عنها


وما أكدو لي حالتها الا بعد ما نسوي الاشعه المقطعيه والرنين المغناطيسي لان يبون يشوفون خلايا المخ كيف