بنتي عمرها سنتين ونص ماتقبل أبد شئ اسمه .........وش الحل معها ؟؟

الكل يعرف إننا الآن على قبالة الشتاء :03:..إذا ماكان بدا فعلاً في بعض المناطق

يعني هالصغار الله يعين عليهم دايم مرضانين ويحتاجون علاجات سواء من المستشفى :43: أو شعبي تسوينه في البيت

عيالي الأولين وش حليلهم :39: الله يحفظهم مايخالفون بأخذ العلاج اللي من الطبيب يمكن يرفضون الشعبي بس مودايم ويتحسنون ولله الحمد

لكن مشكلتي الكبيرة والمزمنة مع الصغيرة منهم وأخر العنقود زي مايقولون:04: عمرها سنتين ونص بس راسها أيبس من الجدار الله يصلحها

المشكلة اللي تبي حل ( إنها لو تموتون ماأشرب الدواء ) :mad: يعني وش مانسوي معها الدواء مايدخل فمها وإن تجمعنا عليها أنا وأحد ثاني يساعدني عشان يدخل الدواء وفرحت شوي ألآقيها تستفرغه وأنتم بكرامة ويطلع كله

والله إنها بغت تروح من بين يدينا مرة جاتها نزلة معوية ووديناها للطبيب وصرف لها علاج وبديت أعطيها واستفرغته وماصدقني أبوها وقال هاتي أنا بأعطيها :arb: ومسكين ليته ماحاول كان واثق جداً من نفسه لكنها جابت العيد عليه
الله لايوريكم عصب وهاوش :mad:بس وش أسوي

تركناها بدون علاج لين بغت تروح منا .... وديناها للطوارئ قالوا جفاف وعلى طول حطولها مغذي وماطلعنا إلا لما اتحسنت شوي وصارت تأكل

هالأيام معها كحة ببلغم شديد أعزكم الله وكالعادة وديناها وصرفوا لها علاج وقلت باجرب يمكن كبرت شوي وصارت تفهم لأنها تجي وتقول لي ماما تعبانه يعني فاهمه لكن سوت نفس الشئ

تكفون وش اسوي معها إذا أحد مر عليها طفل زي كذا وش سوت معه!!!!

الله يخليكم الكحة قوية وأخاف تتطور لشئ ثاني الله لايقوله :44: