بنتي قالت لي ليتك ما جبتيني

بدخل بالموضوع على طول ,
بنتي عمرها 20 سنة , عندي غيرها بنات وعيال , نبذة بسيطة عنها , تدرس بالجامعة , متفوقة دراسياً مرة , اجتماعية ومتحدثة وتحب الناس , مشكلتها انها عصبييية مررة يا بنات , وهذا الشيء ورثته مني , لان أنا عصبيية مرة واعترف بهالشيء , وهي تشبهني بكل حاجة , تصرفات وأسلوب ومع الأسف العصبية ,
ويمكن هذا سبب اغلب مشاكلي معها , صحيح اني قاسية عليها أكثر من اخوانها , وبصراحة سبب قسوتي عليها أنها تشبهني بتصرفاتي , أشوفها لما تعصب , لما تناقش أو تسولف , أنا بس على شكل أصغر , وهذا اللي مضايقني , علاقتها مع أهلي فوق الوصف , تحب خالاتها مرة وهم يحبونها كمان, علاقتهم قوية مع بعض , تسولف معهم أكثر مني ! , لكن إذا رجعنا البيت , كلمة ورد غطاها , ما تحب تسولف معي لا عن الجامعة ولا عن أي شيء ثاني , اعترف اني أعصب عليها كثير , لانها تعاندني يا بنات ماهي نفس خواتها واخوانها , هي عصبية مرة وما تمسك أعصابها , وآخر موقف اليوم ,كانت مبسوطة وراجعة من عند اهلي , صار موقف تافه بينها وبين اخوانها , وراحت غرفتها, رحت لها و هاوشتها بحكم انها الكبيرة بينهم ولازم تطنشهم , وقسيت عليها بالكلام شوي , وهي ساكتة , يوم خلصت , بكت يا بنات و قالت لي جملة ما نمت بسببها ,
قالت أنتي ليه ما تحبيني !؟
, ليه إذا شفتيني مبسوطة لازم تبكيني ؟ " كانت راجعة من عند أهلي ومبسوطة " .
ليه ما تهاوشين فلانة وفلان " أخواتها وأخوانها" زيي؟
دامك ما تحبيني ليه جبتيني يمه ؟ "ليتك ما جبتيني عشان لا تتعبين انتي ولا تتعبيني معك" .
طلعت من غرفتها وتركتها , ونامت بدون ما تاكل ,
بنات ماني قادرة أنام من كثر ما أفكر , جملتها أثرت فيني مرة , أنا مو عارفة ليه أعاملها كذا ؟ هل فعلاً لأنها تشبهني بتصرفاتي فمو قادرة اتعامل معها ؟ ونقطة أخيرة هي ماقد انخطبت , فأنها هالموضوع شاغل بالي وهذا احد أسباب قسوتي عليها , ابغاها تصير هادية وتسمع الكلام لأنها بكرة إذا تزوجت مارح تعرف تسيطر على حياتها وبيتها , العصبية بتدمرها , تعبت معها أرشدوني , كلمتها مضايقتني مرة .