بنتي قالت لي ليتك ما جبتيني

الأسرة والمجتمع

بدخل بالموضوع على طول ,
بنتي عمرها 20 سنة , عندي غيرها بنات وعيال , نبذة بسيطة عنها , تدرس بالجامعة , متفوقة دراسياً مرة , اجتماعية ومتحدثة وتحب الناس , مشكلتها انها عصبييية مررة يا بنات , وهذا الشيء ورثته مني , لان أنا عصبيية مرة واعترف بهالشيء , وهي تشبهني بكل حاجة , تصرفات وأسلوب ومع الأسف العصبية ,
ويمكن هذا سبب اغلب مشاكلي معها , صحيح اني قاسية عليها أكثر من اخوانها , وبصراحة سبب قسوتي عليها أنها تشبهني بتصرفاتي , أشوفها لما تعصب , لما تناقش أو تسولف , أنا بس على شكل أصغر , وهذا اللي مضايقني , علاقتها مع أهلي فوق الوصف , تحب خالاتها مرة وهم يحبونها كمان, علاقتهم قوية مع بعض , تسولف معهم أكثر مني ! , لكن إذا رجعنا البيت , كلمة ورد غطاها , ما تحب تسولف معي لا عن الجامعة ولا عن أي شيء ثاني , اعترف اني أعصب عليها كثير , لانها تعاندني يا بنات ماهي نفس خواتها واخوانها , هي عصبية مرة وما تمسك أعصابها , وآخر موقف اليوم ,كانت مبسوطة وراجعة من عند اهلي , صار موقف تافه بينها وبين اخوانها , وراحت غرفتها, رحت لها و هاوشتها بحكم انها الكبيرة بينهم ولازم تطنشهم , وقسيت عليها بالكلام شوي , وهي ساكتة , يوم خلصت , بكت يا بنات و قالت لي جملة ما نمت بسببها ,
قالت أنتي ليه ما تحبيني !؟
, ليه إذا شفتيني مبسوطة لازم تبكيني ؟ " كانت راجعة من عند أهلي ومبسوطة " .
ليه ما تهاوشين فلانة وفلان " أخواتها وأخوانها" زيي؟
دامك ما تحبيني ليه جبتيني يمه ؟ "ليتك ما جبتيني عشان لا تتعبين انتي ولا تتعبيني معك" .
طلعت من غرفتها وتركتها , ونامت بدون ما تاكل ,
بنات ماني قادرة أنام من كثر ما أفكر , جملتها أثرت فيني مرة , أنا مو عارفة ليه أعاملها كذا ؟ هل فعلاً لأنها تشبهني بتصرفاتي فمو قادرة اتعامل معها ؟ ونقطة أخيرة هي ماقد انخطبت , فأنها هالموضوع شاغل بالي وهذا احد أسباب قسوتي عليها , ابغاها تصير هادية وتسمع الكلام لأنها بكرة إذا تزوجت مارح تعرف تسيطر على حياتها وبيتها , العصبية بتدمرها , تعبت معها أرشدوني , كلمتها مضايقتني مرة .
67
22K

يلزم عليك تسجيل الدخول أولًا لكتابة تعليق.

تسجيل دخول

قطرات من فرح
قطرات من فرح
الله يهديها ويريح قلبك💛
ليباليم
ليباليم
قسوتك عليها راح تسبب لها عقده نفسيه وتتعبها بحياتها وكلامها واضح طالع من قلب ومتالمه منك
راجعي حساباتك ولاتقسين على البنت لانها باجمل سنوات حياتها لومالقت الحب والاهتمام والتقبل من امها من مين بتلاقيه!!
الام شي عظيم بحياه البنت وانتي واصح انك قاسيه عليها احتوي بنتك قبل لاتكرهك
الكلام الي قالته يقطع القلب وواضح انها تعبت منك
اتقي الله فيها واحتويها وحاولي تخففين من قسوتك عليها واذاهي عصبيه خلاص هذا طبع مايتغير خليك قريبه منها قربيها لاتنفريها واكسبيها لاتخسرينها وتخسرين حبها لك
مكنسه سريعه
مكنسه سريعه
سبحان الله البنت مهما ....تعصب وتعاني وووو و مع الوقت تكبر وتعقل . الحين تعتبر صغيره بعقله...احتويه كوني صديقه له فقط تحتاج صبر على 25 وفوق ناضجه ....
🌺baby face 🌺
🌺baby face 🌺
اعتذري منها منها موعيب طيبي خاطرها واحتويها اصعب شي تنزل دمعة بنتك بسببك .. ضميها قوليلها أنا آسفه اذا عصبت ضميها وقوليلها تعوذي من الشيطان حبيبتي .. شبعيها حنان وبوس وأحضان واجبري اخوانها يحترمونها كونها ماتسولف معاك اكيد تحس بحواجز بينك وبينها خليها تحبك وحسسيها بحبك .. كونها الكبيره مايبرر لاخوانها يغلطون وتسكت اجبريهم يعتذرون منها ويحترمونها حسسيها بقيمتها عندك وخلي لها ثقلها في البيت وقدام الناس .. لاتنام وهي زعلانه روحي طيبي خاطرها وخليها تاكل لقمه من يدك لا تنام جوعانه نيميها بحضنك والعبي بشعرها هذي حبيبتك ووردتك واميرتك لاتخسريها .
bero_o
bero_o
عادي زي ما انتي عصبيه وصار نصيبك واتزوجتي هي باذن الله بيجي نصيبها ...وعصبيتها تخف مع الوقت زيي ماهو صاير معاك اما انك تعامليها بقسوه حاولي تخففي لانه شكلها من النوع الكتوم وانتي خليتي فجوه بينك وبينها كلميها قولي ..ابغاك تقوليلي اللي بخاطرك ...ليش ماتجلسي معايا اجلسي قولي اذا فيه شي مضايقك مني كلميني ..مو مشكله مافي انسان يغلط وانتي اللي تقولك عليه حاوليه تسمعيها وحطي نفسك مكانها وغيري من الصفات اللي قالت انها مضايقتها منك ودحين عندها اختبارات فالبنت مضغوطه ..بللاش تضغطي عليها