بنتي ماتبغاتعيش معايه

السلام عليكم ورحمة الله وبركاته
السالفه ياحبايب انه عندي بنت عمرها١٢سنه بالغه رافضه تجي تعيش معايه
وحاولت اقنعها ورفضت وحاولت وعدتها وعود تحبها مغريه بالنسبه لها وبرضو رافضه
هي عاشت معايه طول عمرها لما تطلقت كنت حامل فيها وتزوجت وعمرها سنتين ونص واخذتها معايه وكان شرطي اصلا ع زوجي انها تعيش معايه ووافق وماقد قصرت معاها بشي ابدا كل طلباتها مجابه وانواع الحب والدلع حتى زوجي يعاملها زي بنته لما دخلت المدرسه نقل زوجي لمدينه اهلي ساكني فيها وسكنت عندهم فتره ٥سنين بسبب ظروف زوجي وكان يزورنا فترات بس السكن عند اهلي
والحين نقل لنفس منطقتنا ونقلنا شقه مستقله بعيده عن بيت اهلي شويتين وطبعا جهزت لها غرفه مع اخوانها الصغار اثنين
ورفضت انا مره انصدمت
معقوله انا اللي اعرفه كل البنات اللي في عمرها يحبون يعيشون مع امهم كيف ماتبغا
وتقولي لا مستحييييل والله مااجي اعيش معاك ابدا لاتحاولين ولاتزنين ع راسي
هددتها باابوها ساكن منطقه بعيده عننا وقلتلها اجل روحي عيشي مع ابوك مستحيل اخليها تروح عنده بس بخوفها عشن تعقل
قالت لا والله مااعيش عنده
ولاعندك😳ها اجل كيف كذا!!!!


تقول اش اسوي عندك !! مع انها تحبني ومتعلقه فيا وتحب زوجي وتناديه بابا هوا رباها وكان حنون معها
وانا ماقدر اخليها عند امي وابويه كبار في السن في السبعين والستين الله يحفظهم تعرفون ماينفع تقعد معاهم
السؤال
بالله قد شفتو بنت ترفض تعيش مع امها
وليش رافضه انا مره مصدومه اذكر وانا في عمرها لو امي تتركني يوم واحد انجلط وانا اكبر منها ماااقدر ابغد عن امي
كيف هي معقول تغيرو الاجيال ؟
وسؤالي الثاني
كيف اقنعها تجي معايه لاني حاولت مانفع وتركتها شهر قلت ممكن تغير راأيها لما تشوفنا رحنا بس والله ولاكأنه صار شي ولاهمها ولافكرت
طيب عادي اخليها تعيش عندهم ينفع احس هذا الزمن صعبه البنت تكون لحالها مع الانفتاح والجوال والنت ولاحسيب ولارقيب
مين قد مر عليه حاله زي هذي لاني والله اعتبرها اغرب حاله مرت علي وكيف اتصرف مره محتاره ومااعرف اش اسوي معها
اتمنى تنوروني 😢