بنتي والعريس والدراسه

السلام عليكم

خواتي الغاليات


انا لي بنت صغرى بالعشرين من عمرها تدرس بالجامعه وماشاء الله عليها طموحه
تقدم لها شاب نحسبه ان شاء الله والله حسيبه انه طيب سالنا عليه والكل يمدح باخلاقه وهو بمنطقة اخرى تبعد عنا نحو 100 كيلو

المشكله ان بنتي بقى لها سنتين على الدراسه والمعرس يبيها تنقل الجامعه بمنطقتهم
وهي رفضت الفكره لان نظام الدراسه يختلف كليا وممكن تكون صعبه المعادله وووو
وتقول بكمل دراستي بجامعتي
قلت لها طيب تزوجي بعد سنه وبقى لك سنه تتحملين الدوام من بيتك للجامعه قالت مشقه لي وتعب وتخاف مستواها يتراجع
وانا ارفض فكره اني اتركها مخطوبه سنتين

يعني بعد المشاورات قالت خلاص قولي لها مابي اتزوج وانا اخاف نتحسف لانه الشاب طيب حسب ما سمعنا
علمنا بان اختها الكبرى متزوجه وتدرس لكن لانها تسكن قربي وبمنطقتي فلا تجد اشكال واوشكت على التخرج

الان بنتي تقول خلاص قولي لهم مابي اتزوج بعد ماكانت بالبدايه موافقه
وانا منحرجه من جهة انهم جالسين ينتظرون ردنا اكثر من شهر وكنت اقول لهم ان شاء الله خير ومافي مانع بس نسال وكانوا واثقين من الموافقه فالشاب طيب وخلوق
ومن جهة اخرى اخشى اننا نرفضه ونندم انه ضيعنا شاب على بنتا

علما انه بنتي جامعيه وهو خريج الثانويه وعمله متواضع
ووضعنا تقريبا افضل لكن هذه الامور لا تشكل فارق لدينا اهم شي عندنا الاخلاق

الحين وش اسوي احاول اقنع بنتي كمان وكمان لعلها توافق
ام اتركها على راحتها كما يقول ابيها لعل ذلك خيره للجميع

ابي رائكم .....