لا تحرمينها تماما لان هذا بيخلها تدور في مكان غير عند الاهل او الاصدقاء
الانترنت هالايام لا بد منه و فيه المفيد كما فيه الطالح
لكن
خليها تحت عينك ثرى الخلوة مع الشيطان ليست سهلة لكن في مكان عام مهما كان الحياء موجود
انا أولادي عندهم لابتوبات (مشتركه بينهم) لكن ما تروح غرف النوم في الصاله و بس يكون فيها ناس رايحه و جايه فالشيطانما يقدر يلعب لعبته

انا رايي من راي الخنسا الله يجزيها خير
لاتحرمينها منه نهائيا وامنعيها عنها فتره
واحنا الكومبيوتر مشترك بين الكل وفي غرفه خاصه تابعه لغرفتي
وعطيها فرصه ثانيه
لكن افضل اذا اساأت التصرف مره ثانيه لابد من اخبار الاب ولاتتهاونين في الموضوع

تصرفك حلو بس تكفين لاتخاصمينها ..حسسيها بالحنان هي محتاجة لك والله في هالفترة خصوصا

انها حاسة بغلطتها ..انتو الكويت مجتمعكم منفتح شوي يعني اشوف حتى البنات الصغار يعرفون كل شي

لكن خليها متأسسة في البيت ومتأصل فيها الشي ..خلاص حسستيها بغضبك رجعي كلميها وحني عليها

صااادقيها صادقيها صاحبيها ..وبعدها فهميها الغلط والصح ..اعطيها اللاب توب بس قبلها فهميها الصح والغلط ..قبلها خزني لها مواقع زينة فيه ..علشان تحب هالمواقع وتنلهي فيها

وشكلها بنتك ماشاء الله عليها مؤدبة ..وماتتكلم كثير وخجولة ..فعلشان كذا انفتحي معاها وتكلمي
انتي معاها بدال لاتنفتح مع صاحباتها اللي يسولفون معها عاادي ..وقولي لها لاتصاحب اي احد ولاتسمع كلام اي احد

قعدي معاها قعدات مطولة بالساعتين ..قربي منها

الله يخليها لك ويهديها يااارب ..ويجعل ذريتك صالحة ..وزين انك ماراح تقولي حق ابوها علشان تحس معاك بألأمان ..تحس انك صاحبتها ومافتنتي عليها ..علشان تحس انك سترتي عليهاا

وحذااري تعيريها في يوم من الايام..ترى بتنسى فضل سترك عليها إذا عيرتيها

الله يساعدك ياارب على تربية اولاادك التربية الزينة

تحياااتي

حبيبتي اكبر غلط انكم تعطون الصغار لاب توب

المفروض كمبيوتر دسك توب ويكون في مكان واضح بحيث انكم تشوفون وشو في الشاشه ولايمكن اخفائه

في هذه الوضعيه ،، بتكونون وفرتوا لهم اللي يبونه من البدايه
ووضعه في هذا المكان من البدايه بيخليهم يخافون ايشوفون شي غلط
وفي نفس الوقت مايحسون انكم تشكون فيهم


انا اقول ماترجعين لها لاب توب

تعطينها تستخدم لاب توبج

والمفروض ماتسهر عليه ؟ يعني بنت 12 سنه تسهر على لاب توب ليش؟

اذا كانت تلون وترسم ففي اوقات معينه مو يكون الوقت مفتوح

والله ايعينج ويستر على بنتج وعلى بناتنا

اختي انا لي راي آآخر..
اشوف انك مااحسنتي التصرف .
هذي قسوة والقسوة عمرها ماكانت هي الحل مع البنات انتبهي ياختي .
البنت عندها حب استطلاع وهذا شي طبيعي يمكن سمعت من زميلاتها عن بلوتوث معين وحاولت تبحث عنه.
وبطريقتك هذي تعينين عليها الشيطان المفروض تحتوينها.
تراها في بداية المراهقة لاتعاملينها كأنها شخص بالغ وفاهم .
12 سنة صغيرة بنتك وماشالله عليها باين عليها فيها خير.
وبما انها ماشالله تبارك الله خجوله ترى انا احذرك باسلوبك هذا ممكن تسوين لها عقدة نفسية صدقيني ترى البنات يتأثرون بسرعة ماتتخيلينها.
يعني ردت فعلك هذي قاسية جدا جدا جدا نظرا لشخصية بنتك يعني يمكن ودها تموت ولا تعرف انك كشفتيها وفقدتي الثقة فيها !!!
انا لو منك طبعا بتكون صدمة لك اللي شفتيه ومالومك لو ضاق صدرك .
بس لو انا منك اذا شفت اللي شفته ابتماسك وافكر وش افضل اسلوب لمصلحة بنتي مو اني اشفي غليلي وبس.
ابناديها وابقولها يابنتي ياحبيبتي انتي تعرفين الدنيا فيها الزين والشين ....الخ .
.يعني اعطيها موعظة باسلوب بسيط واحذرها وانبهها واقوي الوازع الديني عندها واخليها تقتنع انها تحافظ على نفسها وسمعها وبصرها .
ومع ذلك اراقبها يعني لازم تكون تحت عيني دائما الى ان تعدي المرحلة بسلام .
وبكرة ان شالله تتزوج وتفرحين فيها يااارب
اسأل الله العظيم رب العرش العظيم ان يبعد عنا وعنكم اصحاب السوء ويسترنا جميعا دنيا واخرة.



كلام الاخت ما عليه غبار