بنتي والنكد وزوجي

السلام عليكم
بدخل بالموضوع
عندي بنتين وحده عمرها 3 والصغيره2
اللي عمرها ثلاثه الله يصلحها نكديه جدا ومخصوصا بالسفر
وانا والله بعض الاحيان اكنسل السفر او اتعذر اذا طرح علي زوجي نغير جو يومين بسبب بنتي الله يصلحها
اول شي
بالاسواق والبقالات اثناء السفر كل شي تمر من عنده تنسدح بالارض وتبكي بصوت واحد وعالي ومزعج وتجلس ترفس بالارض وكل اللناس يطالعو فيها ويصير شكلها محرج وتحرجنا الله يصلحها
تبي لعبه او فستان او اي شي مرت من عنده وشافته اقسم بالله بكل سفره ظروري نمر محل اللعاب تشتري لعبه عشان ماتبكي ومايمر يوم الا وتشوف لعبه ثانيه وترمي اللي بيدها وتبكي تبي جديده وتسوي نفس الحركه اللي فوق تنسدح وترفس وتبكي
جربنا نطنشها ماتسأل فينا وبمكانها ماتتحرك وجربنا ننصح ماتسمع وجربنا كل الطرق
ودايم تسوي ذا الحركه بالمطار بالسوق الحر تاخذ لعبه او عطر او اي شي تطيح عليه عينها وتبكي وتزاعق وترافس
غير كذا بنتي ماتتحمل السفر ودايم نفسيتها زفت وبس تبكي وغير كذا بالسياره ماتتحمل ساعات طويله يجيها دوار السياره وتستفرغ عكس الصغيره ماتقولون خوات هاديه حبيبه تسمع الكلام من جبتها ماعمرها بكت تبي شي رغم انه اهتمامنا بالكبيره اكثر ومدلعينها اكثر تدرون البكر
الزبده بالموضوع
جالسين نجهز السفره مدته 14 يوم شرق اسيا
وانتم تعرفون تصرفات بنتي البكر
واخر سفره كانت جده 6 ايام نكدت علينا نكد عجيب تقولون متقصده بالمطعم بصوت واحد ترافس وتبكي جنب الطاوله اللي جنبنا شافت مع بنوتتهم لعبه وتبي تاخذها رغم انه علمناها عيب هذا حقها انتي عندك لعبتك وترمي لعبتها وتقول ابي حقت البنت الدرجة اهل البنت قالو خوذو لعبة بنتنا اهم شي تسكتون هاالازعاج واضطرينا نطلع من المطعم عشان مانزعج الناس واحنا مااكلنا شي واكتفينا بنواشف بالبيت ههههه
اكيد تقولون ليش مااجلسها عند اهلي خصوصا ان بنتي عند اهلي تصير شخص اخر وكل شي سمعا وطاعه ومافيه احسن منها بشهادة اهلي بس بشرط اكون موموجوده اذا كنت فيه تصير نكده بس اذا طلعت مشوار وخليت بناتي عند اهلي تصير مافيه أأدب منها ..
بس زوجي رافض ولايحب يجلسون عند احد اذا سافرنا ويقول اطفالك انتي مسئوله عنهم اقوله اطفالي على العين والراس بس اذا مثل الصغيره هداوه وأدب اما نكد وقلق ينعاف السفر ومافيه وشولة اسافر وتنكد بنفس الوقت السفر للوناسه والفله مو للنكد
والمشكله ليته يتحمل مسؤليتها اذا بكت انا اسكتها اذا اخذت لعبه من محل انا اجلس اراكض ارجعها اذا استفرغت تستفرغ علي مايتحمل شي ولا قد جاه منها شي
اخر مره بكت بنتي تبي لعبه يوم نروح جده وخليتها ومشيت وجاء زوجي يهديها ورجع معصب ويقول ينعاف السفر انتم ماتستاهلون الواحد يسافر فيكم وش هذا نكد قلتله حسيت الحين بشي بسيط من اللي اتحمله
المشكله الحين كيف اقنع الرجال مايخذها والله ورب الكعبه مالي خلق اسافر عارفه بتنكد واتعب معها خصوصا انها مسكينه صغيره وماتستانس ولا تستمتع وكله بكاء واستفراغ غير لما تكون عند اهلي خواتي مو متزوجات وفاضيات يدارونها ويوسعون صدرها عجزت اقنع ابو الشباب والله تعبانه من التفكير والهم ومابي اسافر وبنفس الوقت متحسفه
ولاتقولون خذيها وجيبيلها دفاتر تلوين واللوان ومدري ايش حاولت بكل الطرق اسليها بالسفر ماقدرت حتى شريتلها ايبود صغير وقت السفر اطلعه لها فيه اللعاب واناشيد ويشغلها بس ماينسيها اللعاب والنكد والصياح وبنا بنا اذا مرينا محل اللعاب بتبكي تبي لعبه ورب الكعبه ترجع من السفره شاريه 5 لعبات شي مبالغ فيه ومو بس الالعاب تبي عادي اي شي شكله غريب تطيح عليه عينها عطر قلم جزمه رجالي بلوزه نسائيه ممكن تبكي ساعات تبيها ههههه مررره بكت تبي طقم مواعين والله جلست ساعه اهدي فيها
انا مشكلتي الحين مع ابو الشباب كيف اقنعه يخليها احسه مستكثر علي استانس وخصوصا انها بتجلس عند امي وخواتي مو احد غريب وانا متأكده انها بتستانس عند اهلي اكثر من سفرتها اللي بتتعب نفسيتها فيها
وبالنهاية ادعو البنيتي بالهدوء والادب والله يصلحهن يارب ويخليهن لي ويقر عيني بهن