بنتي والولد

صباح الخير ياحوائيات

خلوني شويه اضحكم زي ماضحكت امس الليل

امس جاء صاحب زوجي وولده ( ولده قد بنتي او اصغر ب 6 شهور) عمر بنتي 4 سنين
المهم جلسوا مبسوطين ويلعبوا وياحليلهم
لمن جاء رايح مع ابوه الا اسمع صوت صريخ وبكاء ( بنتي والولد) وصوت زوجي وصاحبه يحاولوا يهدوا الوضع

المهم بعد ماخرجوا رحت سألت زوجي اش سار ؟
قالي الولد لمن جاء خارج مسك لعبه حق بنتي واصر الا والا يأخدها ( بنتي بغت تموت من القهر ورفضت وبشده)
فأخر شئ صاحب زوجي بالقوه قدر يهدي الوضع واخد ولده وراحوا بسلامتهم

دحين الموضوع المضحك رحت مسكت بنتي واقولها ياماما ليش سويتي كدا وعيب هوا ضيف عندنا في البيت
واكثر من 10 دقائق وانا اكلمها واشرحلها
اخر شئ لمن ردت قالتلي ياماما هادي لعبتي خلاص ياماما لا تزعلي نشتريله هديه سياره بالريموت
( انا يابنات اطل فيها ومدهوله والله حاستها بتستغفلني)

بعدين انا عصبت من اسلوبها وردها فقمت جالسه اعلي صوتي عليها
قامت طلت فيا والله فرصعت عينها عليا وقالت شوفي اقسم بالله مارح اشتريلك هديه ولا لعبه ولا حلاوه
اشان انتي تصرخي فيا

انا انفجعت منها ورديت قلتلها ماشاء الله من فلوسك اصلا الله يخلي ابوكي هوا اللي بيصرف على البيت
قامت مشيت وسابتني
وشويه ماادري الا الاقيها جايه جري عليا وترمي حصالتها عليا وتقولي عندي فلوس كثيره

والله جيل يخوف وبنات كل كلمه لها رد عندهم