السلام عليكم
صباح / مساء الخير
انا لي بنت اخت عمرها سنه وشهر ولي بنت عمرها سنه وخمس شهور يعني بينهم اربع شهور بالضبط وكل وحده منهم رضعت بنت الثانيه
اختي حملت ببنتها وعمر ولدها 7 شهور وانا اللحين حامل الله يتمم علي لان المشيمه نازله وخايفه وانا حملي هذا حملت
وعمر بنتي سنه وشهر تقريبا ... بداية المشكله اختي اول ماحملت في بنتها كل الي حولوها حطوا عينهم عليها وقالوا ليش تحملين بسرعه الولد وجبتيه والي قالت اكيد انها غلطه ... وصار الدور علي لان كل الي حولنا يجلسون سنتين و3 سنين
والحين صار العين علي ... انا مااوسوس بس بديت اخاف عقب لان من 3 اسابيع بس اكتشفنا ان بنت اختي مصابه بورم بالدماغ وقالوا لازم عمليه جراحيه سريعه وببريده ماعندنا الا التخصصي ومستشفى الولاده وكثيرين قالوا روحوا لمستشفى التخصصي بالرياض رحنا وتخيلوا اتفقنا مع الدكتور يوم الاربعاء وقال خلاص يجون السبت يصير فيه سرير فاضي طبعا بعد واسطات الدنيا انصدمنا ان يوم السبت الدكتور اخذ اجازه اسبوعين ومافيه سرير وحاولنا بمدينة الملك فهد الطبيه عن طريق الطوارئ وبرضوا قالوا مانقدر نسوي شي الا بعد مايفضى سرير وجالسوا يومين بالطوارئ وعلى مغضي وكانوا مصومين البنت عشان الاشعه والبنت بس بكي ياحياتي طبعا لقوا يوم الاحد بالليل سرير ودخلوها للقسم وبعد الاشعه صار فيه (استسقاء الدماغ) نتتيجة الورم ادى الى ان السائل النخاع الشوكي صار في المجرى حقه انسداد لان الورم صااار كبير الى درجة قال الدكتور انتم وينكم من اول ؟؟؟
بس قدر الله وماشاء فعل .. لان وعمرها 7شهور تقريبا جاها زي التشنج وكنا متوقعين انها اكلت شي من الارض وكشفنا عليها وقالوا مافيها شي ماكنا متوقعين انه بداية ورم المشكله البنت كانت تحاول تمشي وفجاءه انتكست ولاتتحرك الجهه اليمنى والعين اليمنى البوبو تروح لوراء والشرود
الحمدلله سووا لها العمليه وحطوا فيها لي ليسحب المويه الي في الراس وقالوا اسبوع ونشيله كلمتنا اختي ذاك اليوم بالجيل الثالث وكان معنويتها مرتفعه شوي لان العمليه على قولتهم نجحت عد اليوم عالخير .... صار المغرب البنت ارتفعت الحراره عندها والضغط ارتفع وعطوها مضادات ومخفض للحراره ... وبدت ترجيع قالوا لها عادي هذا من اثر البنج تقول اختي كنت اشوف الترجيع اصفر وريحته ريحة دم وشوي شوي صار يغمق الى ماصار دم وتشنجت نادوا الدكتور المناوب قال نقص اوكسجين عطوها اوكسجين وعطوها فجاءه اختي جت تغطي بنتها لان ماعليها شي غير الحفاضه لقيت بطنها داخل لجوا وجسمها لونه بنفسجي والشفايف ازرق .... اثر البنت بادي فيها نزيف داخلي دخلوها العنايه المشدده ودخلت غيبوبه ...
جاء دكتورها الاساسي الفجر شافها انصدم جلس يخانق ليش ماقلتوا لي عالطول .. دخلوها العمليات على اساس حالتها حرجه ... الورم حجمه كبير شالوا نصه وباقي نصه .. لكن المفاجاءه انفجر النص الباقي جزء نزل على العين وجزء نزل على العمود الفقري ... ودخلت غيبوبه من جديد وانقطع عنها الاكسجين نهائي وعايشه لها قريب الاسبوعين عالتنفس الصناعي وقالوا لها الدكاتره شيلي الاجهزه البنت منتهيه مامنها رجاء رفضت تقول لا قلبها ينبض ... (القلب ينبض لان التنفس الصناعي يساعده لكن لو شالوا اكيد راح يتوقف القلب) بين فتره والثانيه يسوون لها تخطيط مافيه أي تحسن او استجابه
اخذوا اشعه للرئه برضوا ماوصل لها الاكسجين وهي تحت رحمة ربي ...
انا لي اسبوعين عايشه حاله نفسيه تعبانه والمشكله اني حامل وخايفه عالجنين وخايفه على بنت اختي ولا اقدر اروح للرياض واذا رحت مااقدر ادخل العنايه ... كنا نلبسهم اغلب الملابس جميع كل مادخلت غرفة بنتي شفت ملابسها جلست ابكي ... اتخيل حالة اختي كيف راح تكون لولا قدر الله ... خصوصا انها اول بنت عقب ولد وتموت عليها ودايم كانت تقول يمه اموت على هالبنت ...
س: هل انفجار الورم يعني خلاص ماافيه احتماليه للشفاء ؟؟
س: هل توقف اجهزة الجسم ككل وتوقف الاكسجين عنه يسمى (الموت الدماغي)؟
س: الموت الدماغي يعني الموت (لان الغيبوبه اهون يغيب عن الوعي والادراك ... لكن الموت الدماغي موت الدماغ )؟
س: هل الورم من العين ... لان 3 مشايخ قروا عليها قالوا البنت فيها عين قوي شي من الانس وشي من اهل الارض؟؟
فعلا هل ممكن اهل الارض يعطون الانسان عين ؟؟
الاول كان عندنا امل لان الدكتور كان يقول اربع احتمالات اما اعاقه او تخلف عقلي او عمى او من ارادة الله مافيها شي
بس الحين ماادري انا جالسه تفكير وهواجيس خصوصا اني لحالي تعبت اهلي عند اختي بالرياض واهل زوجي مسافرين ويوم رحت لهم الاسبوع الي راح فاتحين اغاني وتصفيق ورقص
وانا احس اني كرهت الدنيا ... وانها ماتسوى شي ... حتى ماصرت اهتم بنفسي ولا في بيتي مثل اول وبس اتخيل سديم بكل مكان ... يارب لطفك ورحمتك ... سبحان الله الي قلبنا من حال الى حال
بنات لاتلوموني بس مالقيت احد افضفض له واسولف معاه .. ابي لو بصيص امل انها ترجع
نصيحه اول ماتلاحظون شي على عيالكم صغير او كبير اكشفوا عليهم من كل شي لايهمكم الدكاتره تراهم ماعندهم ماعند جدتي لان اول ماراحت اختي وقالت الاعراض قالوا نقص كالسيوم وحديد حاد ...
يارب تشفي سديم وجميع مرضى المسلمين شفاء لايغادر سقما
أم رافد @am_rafd
محررة
يلزم عليك تسجيل الدخول أولًا لكتابة تعليق.
أسأل الله العظيم رب العرش العظيم أن يشفي سديم شفاءً لا يغادر سقماً
وأسأله أن يجبر قلب والدتها وقلبك ويفرغ عليكم صبراً
آآآآآآآآآآآآآمين يااااااااااااااااااااااااارب
وأسأله أن يجبر قلب والدتها وقلبك ويفرغ عليكم صبراً
آآآآآآآآآآآآآمين يااااااااااااااااااااااااارب
الصفحة الأخيرة
مهما كان بس اللهم اشفي سديم