بنت اختي ما تقعد على حيلها شيطانة كيف تتعالج؟

بنت اختي تقريبا عمرها اربع سنوات او ثلاث ونص وشيطانة مرة
كل شي تعفسه وتخربه شكلها عندها مرض نفسي مدري عنها
يعني مثلا اشر الملابس حتى تجف اروح الصالة ارجع القاهم طايحين وجالسة تلعب فيهم
اشغل الغسالة وادخل الملابس فيها فجاة اسمع صوت وحدة تلعب في الغسالة قاعدة تفر ذاك حق الخيارات الي اختار منه قطن وغسيل سريع كله تفره وتلعب فيه مع ان ملابسنا داخل وحتى لو كانت فاضية تشغلها وتلعب فيها وتفرفر في ذاك حق الخيارات
عندنا غرفة للضيوف فيها طاولة رفيعة نحط فيها عطورات ومشوط ومرايات وكذا عشان اذا كنا مستعجلين للطلعة نخلص امورنا فيها او اذا جاونا ضيوف نعطيهم يتعطرون من ذا الاغراض
تجي هي تلعب فيهم تجيب كرسي وترميهم كلهم على الارض من على الطاولة
السجادات وجلال الصلاة تاخذهم وتعلب فيهم
اللمبات تلعب فيهم تشغل وتطفي تشغل وتطفي
احيانا تاخذ الوان اخوانها وتشخبط على الجدار
تدخل داخل دواليب الملابس وتفتح وتسكر في ابواب الدواليب وترقعه بصوت عالي
غرفنا نقفلها ما نبيها تدخلهم دوم تفتح في البيبان وتسكر وان دخلت عفست كل الاغراض
الشيبس تاكل نصه والنص الثاني ترميه وتدوس عليه برجولها وتدبق الرخام والكنب وتروح تلمس في البيبان وتفتح الدواليب وتلمس مرايا الدولاب كل وذا ويدها مدبقة ووسخة من الشيبس
والمشكلة عندها اخت اصغر منها وخايفين تصير مثلها
ندويها مستشفى يعالجونها ولا وش السوات؟