بنت الجيران طلبت مني حبوب منع الحمل كيف اتصرف😁

مساالخير بنات اليوم العصر وانا جالسه في امان الله يدق الباب مين وازي وليه الا هذي بنت جيراننا وبعد الترحيب والسلام والذي منو تدخل بنت ابوها وامها وتتربع في صدر المجلس وانا كأي امرأه سنعه اجيب المويه والعصير والبسكويت ونجلس قلت اكيد طفشانه بنت الحلال بتدردش شوي وتقضب الباب ومن سالفه لي سالفه تسألني عن الحبوب اللي ماتخلي الدوره تنزل قلت وش تبين فيها قالت ابيها عشان اصوم يوم عرفه واعدل جلستي ويبتدي برنامج سلامتك واقعد انصح يابنت الحلال ماتصلح قالت ابيها بتضرك الله يهديك قالت ابيها بتخرب عليك خاصه وانتِ بنت قالت ابيها تقول دورتها منتظمه كل شهر تجي 9،8،7وهي ودها تصوم يوم عرفه قلت الاعمال كثيره في يوم عرفه غير الصيام سبحي استغفري اقري قرآن قالت هذا فيه تكفير سنتين وابغى اصومه قلت طيب استغفري وادعي وان شاالله تصومي الله كريم يمكن ماتجي في موعدها قالت الا بتجي المهم يابنات قالت اشتري لي الحبوب وباخذها الين اصوم واتركها قلت لاماينفع إذا جبتها لك استخدمي الشريط كامل وبعدين لي تركتيه تنزل دورتك قالت خلص بأستخدمه كامل قلت طيب يمكن تضرك قالت ماعليك بتحمل كل النتائج وماطلعت من عندي الا بعد ماقلت لها خلص ب اشتريها لك فكرت آخذ لها جنيرا هي خفيفه وبإذن الله ماتضرها بس يابنات انا خايفه البنت هذي إذا حطت شي في راسها تسويه اخاف اشتري لها الحبوب وتجلس كل سنه عليها ومع الوقت تسبب لها اذى خاصه انها ممكن تتعود عليها في رمضان وبعد يابنات جارتي هذي غشيمه ممكن ماتسمع الكلام تاخذ تسع حبات تصوم عرفه وترمي الشريط قلت مالي بعد الله الا بنات حواء يشورون علي اشتري لها الحبوب مثل ماطلبت والا اطنش وبعدين اعتذر منها مع انها ممكن تطلب من جارات ثانيات طيب الحبوب ممكن تضرها والا عادي ملحوظه ترى جارتي هذي مستحيل تطلب من اهلها هذا الشيء لأنهم مايعرفونه اصلاً لكن لو شريت لها ممكن تحتفظ بالشريط وتسير تشتري عليه انتظر ردودكم ودمتم في رعاية الله وصل اللهم وبارك على نبينا محمد وعلى آله وصحبه اجمعين ماذكره الذاكرون وماغفل عنه الغافلون ملاحظه يابنات البنت هذي اطهر من الطهر وانقى من النقاء فلا يروح تفكيركم لبعيد الله يرضى عليكم لكنها متدينه جداً ومحبه للخير ورجاء خاص للمشرفات لاتنقلون الموضوع الله يسعدكم لأنه هنا سيجد من يقرأه دوناً عن كل الاقسام 🌹🌹🌹