بنت تبي تستشيركم ولا تردونها بامس الحاجه لكم

كيكفكم يابنات ان شاء الله كلكم بخير وصحه وسلامه وسنه جديده وحلوة عليكم باذن الله
السالفه ومافيها وحده ربي يستر عليها ويرزقها قالت لي اكتب سالفتها هنا وتبي استشارتكم بكم شغله واتمني ماتقصرون معاها
البنت ابوها متوفي من 3 شهور وحالهم جدا جدا ضعيف هم 4 بنات وولد عمره 8 سنين وهي الكبيره عمرها تقريبا 22 الي صار بعد وفاه ابوها تدهورت حالتهم الماديه جدا وراتبه علي ماينزلوه لهم الشؤون يبي له وقت إجراءات وعفسه ممكن ينزلوه بعد شهرين او 3 المهم هي تقول كان بجيب ابوها يوم توفي فقط 1200 ريال هذا كل مايملك واخذتهم وتصرفت فيهم بالبيت وامها من الحزن مو عارفه وش تسوي وصارت تصرف منهم لها 3 شهور تقول مااشتري من البقاله غير جبن وخبز وصامولي وزبادي فقط تقول كل اكلنا كذا واذا تكرمو الجيران رسلو لنا مثلا غدا او عشا جزاهم الله خير تقول انا مو معترضه علي شي والحمدلله عايشين بس تقول اكلنا فقط الزبادي والخبز والجبن واحس اختي الي بمتوسط مستواها الدراسي بدا يتراجع وماتركز شويات تقول ماادري من ايش هل من الي صار وموت الوالد او اكلنا له شغل بالموضوع فالي عندها علم تخبرها هل الاكل اذا ماتنوع ولا صار في دجاج ولحم وكذا ياثر علي الدراسه هذا اول استفسار
ثاني شي هي تبي تشتغل وحصلت وظيفه بمشغل بعيد شويات عنهم لازم سايق والراتب كويس 2200 وهي راضيه بس تقول حارتنا شعبيه وقديمه وممكن الناس تهذر علينا لا شافو سايق يوميا ياخذني من 3 ومايرجعني الا 10 او 11 اللليل فهي خايفه وحيرانه هل تروح تشتغل او تبطل أمها مره متردده وتقول لها لا تجيبين لنا كلام قدام الجيران بكره ماحد يبيك ولا يبون خواتك وهي حيرانه هل تشتغل او تدور غير هالشغله ياريت تنصحوها انا قدمت لها النصح الي اقدر عليه بس تبي تشوف اراء اكثر والف شكر لكم وادعو لهم بالفرج وتتحسن حالتهم يارب