بنت عمي ... والمكالمة الثانية بالتفصيل الممل

السلام عليكم ورحمه الله وبركاته

صباااااح الخير ,
اول شي بقول لكم اني اعتذر لاخواتي اللي راسلوني على الخاص ولا قدرت ارد عليهم ( السبب) اني ما اقدر ارسل ولا ارد لحد ما توصل مشاركاتي 50 مشاركة وفي اليوم الواحد محكومة بـ3 مشاركات يعني يبيلي 10 ايام >>> حاسبتها
بالاخص اختي فور روز >>> سا محيني حبيبتي
واشكر اختي فرحة على سؤالها المتكرر عني >> الله ينولك كل ما تتمنين

اللحين بكتب لكم وش صار بالتفصيل بس ابي منكم تركزون معي بكل كلمة قالتها بنت عمي ليا وخلوا جنبكم كوب شاي او نسكافيه عشان تستانسون وما تملون .
وابي منكم بعد تحللون لي شخصية ( ولد عمي ) وهذا الاهم .

اللي ما تعرف عن ايش اتكلم لا تكتب مو فاهمة تروح تشوف مشاركاتي وموضوعي عن ولد عمي وهي بتفهم لاني والله معرف احط الرابط والا كان حطيته .

المكالمة (( هي اللي اتصلت ))
اول ما كلمت ها الحين مشغولة قلت لا قالت طيب وش رايك نكمل اسألتنا قالت اسألت ايش انقلش قالت لا فيزياء وجلست تضحك ( اخوها تخصصه فيزياء )
قبل ما اسأل وش صار على فلان وافقتي قلت لا قالت الله يكتب لك الخير مع اللي احسن منه قالت يللا اسأل مستعدة قلت ليه انا في اختبار قالت اختباااار مصارحة قولي لي وش رايك بفلان قلت لها بثقل (( ثقيلة مرة هههههه) ولد عمي قالت اما ولد عمك تصدقين اول مرة ادري قالت اقول وش رايك في فلان انا بسهلها عليك لو يخطبك توافقين قلت مدري قالت ليه ممكن ترفضين والله لو ترفضين لقطع اذونك والله اخوي حساس لو بنت ترفضه يتعقد من الزواج ويقعد طول عمره عزوبي سكت بعدين قالت انا ازن فوق راسه كل يوم اقوله بنخطب لك وهو تدرين وش يقول يقول بدري يمديني بعدين قالت ترينا مو بس اخوان هو اقرب اخواني لي يعني تقدرين تقولين اصدقاء قلت ماشاء الله قالت اذا تزوجتيه لا تاخذينه مني وجلست تضحك وضحكت معاها قالت عليك بالعافية وجلست تضحك حشا بتتغدينه مو بتتزوجينه . بعدين قالت خلينا نتكلم بجد وش يعجبك بفلان ما رديت عليها قالت عشانه وسيم وابيض قلت لها والله ترين بقفل قالت انا مو زي اختك قلت اكيدقالت طيب ليه تخبين عني قلت ما خبيت شي قالت انا ما ابي احرجك انا ادري انك تعزين فلان ركزي معاي ما بقول تحبينه بقول بس تعزينه وانا حاسه من زمان بس كنت ابي اتأكد وكنت اتمنى انك تقولي لي وانا بقول لك بصراحة انا في البداية كنت اشك ان بينكم علاقة قلت لها اعوذ بالله قالت مو قصدي يشوفك لا بس كنت احسبكم تكلمون بعض قلت ليه طيب قالت كنت الاحظك تسألين عن فلان يعني تسألين عنا كلنا وبعدين تسألين عنه وانتي تحسبيني خبلة الله يهديك وبرضه اخويه فلان كنت اشوفه حزين انا توقعت عشانك هو صح اخوية وصديقي بس ما يعلمني بكل شي لكن بعدين تأكدت ان ما بينكم شي قلت وش خلاك تتأكدين قالت لان اسألتك ما تخلص ولو بينكم شي كان ما سألتيني قلت لها طيب واخوك ما عرفتي ليه هو حزين قالت اكتشفت انه كذا طبعه وبعدين هو يبان عليه يعني انا اوقات اجيب سيرتك الاحظ انه عادي لو فيه شي كان بان عليه او تغير وجهه انا اعرف اخوية .
بس فيه شي مهم بقولك اياه قلت وشهو قالت كل شي قلته لك عن اخوية ترينه صدق وبالذات يوم عرفت انك تعزينه وتضحك تدرين ليه قلت ليه قالت لاني ما ابيك تعزينه يلعن ابو المعزة يا شيخة ما ابيك تعزينه وبعدين تكتشفي انه عكس اللي رسمتيه في بالك .
الحين ذكريني وش كن اقولك عنه قلت مدري نا سية قالت اما عاد بدينا بالبكش قالت بقولك عنه هو يا طويلة العمر حساس تعرفين يعني ايش حساس يعني يزعل بسرعة زعول مرة ومزاجي ولا يتكلم كثير بس اذا تكلم كلامه زي العسل وانا اذكر اني قلت لك انه يحب النصر صح قلت ايه قالت بشكل ما تتوقعينه قالت تصدقين كلنا في لبيت نكره النصر ابوي اهلاوي وفلان ( واحد من اخوانها ) اهلاوي والباقين كلنا هلاليين ما عدا هوه وعنده اشياء غريبة يعني اذا خسر النصر وهو دايم يخسر يطفي نور غرفته وينام وبعض الاوقات ما يتعشى ولا يكلم احد ويقفل جواله , اما اذا فاز شوفي وش يصير بالذات لا صارت مبارة مهمة يعزمنا على العشا برا ووجهم تقولين قمر هو يزعل من كلمة قمر وهلال هههههههه وتضحك والله اكلمك صدق وغرفته صابغها اصفر واللاب توب مغلفه بشعار النصر يعمي اشياء غريبة مرة .
قالت تبين تعرفين سلبياته وش هي قالت مشكلته كسول قبل يومين طلبته وترجيته يوديني السوق رفض بالحيل وقال كلمي ابوي او واحد من اخواني وزعلت منه وقالي اذا تبين فلوس اعطيك بس السوق ما احب روحته يعني هو كريم بس كسول حبتين
الحين قلت لك قصة حياته . واظن انك تعرفين عنه كل شي

انا بكلمه في الزواج وبكلمه فيك وبعطيه صفاتك وايجابياتك وسلبياتك مثل ما قلت لك عنه بالضبط وما اراح اقول ان فلانه تعزك ( بس والله لو عرف انا ما اشوف فيها شي يعني انتي حبيتي ولد عمك مو غريب ) بس تطمني ما راح اقول له انك تحبيه قلت انا ما قلت قالت حب معزة اعجاب كلها مثل بعض .

وانتهت المكالمة .
وش رايكم في اللي صار