بنت وماتزوجت تعبانة ليه ؟!! .. هنا السبب

مساء الانوار عليكم
عندي موضوع بناقشه معكم اخواتي عن نفسية البنت الي ماتزوجت
وكيف تقلب حياتها نكد وهم بسبب عدم زواجها وحصولها على رغبتها التي خلقها ربي
عليها ..
يابنات انتم كيف تلومون البنت على نفسيتها وفوقها تعيبون عليها
لو تدرون الزواج وش يسوي بالبنت اذا حصلت رغبتها وحصنت نفسها
قريت عن بنت كانت تعاني سقوط شديد بالشعر وحساسية بالجلد ودايما معصبة
وتفكر كثير وكلها حاطها دوبها دوب الخلق وممكن توصل لمرحلة انها تاذي الناس
كلها هذا بسبب تعطيل الفطرة الي جبلها الله عليها وهي زواجها ..
هذا غير بعضهن يعاني نقص بالاحتواء العاطفي وطبيعة الاهالي غالبا
معاملة خشنة شوي ومافيه تعاطف كبير معها فتعلق الآمال على زوج المستقبل
وتشوف فيه كل شي من حب وجنس وانسان يفهمني وافهمني يعطيني وجه
ممكن احد من اهلي مايعطيني وجه ممكن مايقدرني كانسانة
ممكن مايحترمني لانني صفر .. وعاطلة باطلة ..ووجودي عالة عليهم وووو اشياء كثيرة
والمجتمع من جهة ثانية يلوم البنت اذا كبرت وماتزوجت ويضعون فيه العيب
لان نصيبها تاخر وممكن هو المتسبب بتاخير زواجها ابتداء من محيطها العائلي والبيئة الي
جايه منها ..
قريت موضوع الاخت الي كاتبه اختها (اختي النفسية المتخلفة) بصراحة ماالوم الثنين
كل وحدة مظلومة الاولى تعطلت مصلحتها الفطرية وهي الزواج واسلوب تعاملها
مع خواتها يعكس كذا والثانية تنجرح وتعرفون البنت طبيعتها
عاطفية وتحب تتدافع عن كرامتها الي انجرحت وتلوم اختها ولاتعرف ماهو السبب
الحقيقي ورا تعاملها كذا ..
واشره على المتزوجات الحسودات اعذروني على هالكلمة الي اخذت كل شي بفضل ربي
واستمتعت وراحت وجت وجابت عيال وتعاير البنات وتسميهم عوانس
لقصد التجريح والتكبر على خلق الله واذا زوجها بغى يتزوج عليها
ثارت وهاجت ..ولو كتب ربي انها زوجها يتزوج عليها بيتزوج غصب عليها وهي مهي براضية بعد
فيه بنات تفكر تنتحر فيه بنات يجيهم امراض ونفسياتهم تتعب وممكن المسكينة تظلم ولاتحس
على نفسها انها تظلم
ولاتدري ان هذا بسبب تعطيل الزواج عنها وتاثير ذلك على جسمها ثم على نفسيتها وتكوين اسلوبها
وتعاملها مع الاخرين ..
ماابرئ احد لكن هذا جزء من المشكلة الي تحصل لها ..
والبيئة الاجتماعية المحافظة بعد ساهمت في تكوين الصورة الذهنية
ونمط التفكير للبنت ..لكوننا مجتمع محافظ .
شاركوني آرائكم ..