السلام عليكم ورحمة الله وبركاته
...........
...........
اسعد الله صباحكم بنات
كنت حابة انكم تشاركوني هالعشوة
بس ماتستاهلون << قويه
تراكم عصبتوني وقسم
هالوجبه كان ألذ وقت عندي وأنا آكلها عند منتدى .... << قبل لاأعرف الأسريه بعالم حواء
لكن الحين صارت ماتنبلع
ولا اعرف استمتع بها كسابقا
و صرت اهوجس وادووووخ وماعرف وين ربي حاطني
حتى وانا اطبخ مرة وقسم بغيت افتح قدر الضغط وهو مولع << بغيتوا تسببولي عاهات
افااا عليكم
لا تسألوني ليش
( لحد الحين مااستنتجتوااا ؟؟ )
اقولكم
توكلنا على الله ...
الحين لمن وحده تحط مشكله وتبغى لها حل
ماشاء الله نلقى محللات نفسيات
ونلقى مصلحات ومفسدات وووو
كل وحده تحل المشكلة بوجهة نظرها الخاصة
وتتخيل لو هي عايشت هالمشكلة وش بتسوي
ثم تنصح على هالأساس
_ هنا جزء من المشكلة اللي قاهرتني ،،،
المفروض بما انها مو هي الي راح تتعامل بحلها
انها تنصح بالمعروف
لأن الرسول صلى الله عليه وسلم قال : ( من كان يؤمن بالله واليوم الأخر فليقل خير او ليصمت )
ترى مو شئ سهل لأنك مسؤلة عن كتاباتك وعن نياتك
وتصير عليك جزء من المسؤليه ان خرب بيتها
في حلول تصلح تصير فرديه
وحلول تصلح تصير حلول عامة تنفع لأي مشكله
فإذا كنتي حاسة من اللي جت تشتكي انها مو ذاك الفهم والإستيعاب
فخليك في الحل العام والنصيحة اللي ماتضرها ولا تضر الطرف الثاني وتحقق منفعه اكثر
^^^
ان شاء الله فهمتوا هرجي مع اني مافهمته انا ..
............
ثاني شئ كلامي موجه لكاتبات المشاكل ويبغون حلول
اذا كنتي جايه تفضفضين في منتدى عضواته فيهم اللي مكفيهم
فخليها فضفضة بس << مع اني ماأفضل
ولاتاخذين نصايح تهدم بيتك
او نصايح ماتعرفين تطبقينها زين
البعض هداهن الله
تشوف كلام الأغلبيه
وتجمع الردود المتشابهه وتحس ان هذي هي الصح
ثم طوالي تروح على المتمشكل معه وتبدأ تطبق كلشئ بالحرف والرقم
وتزيد الطين بله
اعرفي ان الفضفضة احيانا تخرررب عليك
ومشكلة انتي عجزتي عن حلها اسألي فيها خبير مجرب
مو انك تسوين استفتاء لأكثر الأراء وتطبقينها بدون وعي ...
او تشوفين المتعاطفه معك اكثر وترضيك هي الصح
ممكن انتي تحكين السالفة بأسلوبك ونحن نجهل اساس المشكلة اوصحتها والحلول تصير غير شكل
مافي احد احرص منك على بيتك
وكل وحده فيها حره من الرجال تحطها في الحل بطريقتها
....
ثم تجي تشتكي مرتن ثانيه وتقول سويت اللي قلتوا وطلقني ولا علقني
انا وقتها ابغى اروح احلل سكر اعوذ بالله
....
انا خلاص
قررت بإذن الله اني آخذ فترة نقاهه من هذا القسم
تدرون وش جاب لي هالقسم ووش سبب لي؟!!! << مافكر يجيب شئ آكله ،، قلة حيا !!
خخخخ
اقولكم سالفة
زوجي كل فترة ياخذ دورات ويختبر فيها
وطبعا يبغالها مذاكره
فمايبغى ازعاج ويقترح اني اروح عند اهلي لحد مايختبر
هالمره قبل كم يوم قالي اختباري الأسبوع الجاي وشرايك تروحين !!
بالعادة اطير من الفرح
هالمرة قلتله وشووووووووووووو ؟؟؟
احلف انك مانتب متزوج ؟!!! خخخخخ
جبتولي الصمرقع
قال انخبلتي وش فيك ؟؟
وانا اقوله لايكثر مالكم امان
فجأة تذكرت اني ماني في المنتدى ياااالهوي
وهضمتها بسرعه
قلت ابشر
....
زين ان ماعند اهلي انترنت
قلت والله فررررصتي اني اطلع برااا هالقسم شوي
مع اني انغث منه بس مادري وش اللي يسحبني له والله مادري ...
............
مدري احس كلامي داخل في بعضه
بس حبيت افضفض مثلكم وانبهكم عاللي ببالي
يلا
بروح أكمل أكلي !!
ابغى اطير الشرود
واعيش يومينيبس عساني اكون على قد كلمتي وتخف الجاذبيه اللي هنا شوي
واتمنى لمن ارجع لكم بعد كم يوم تنحل جميع المشاكل
والقى هالقسم آآمن مطمئن
استودعكم الله
...
يا حليلك
اقول تهني بعشاء ولا ياثرون عليك البنات !!