لذيذه بثلاثه انواع من الجبن
الكميه اعطتني صحنين بيتزا واحد صغير وواحد كبير
المقادير
مقادير العجينه
4 اكواب دقيق ابيض
٤ملاعق زيت زيتون
كوب ماء دافي
نص كوب لبن
ملعقتين حليب بودر
ملعقه سكر
ملعقه خميره فوريه
نص ملعقه ملح
رشه بودره الثوم المطحون
مقادير الكشنه
1بصل
ملعقتين صلصه
اربع طماطم
ثلاثه فلفل بارد
فصين ثوم
رشه زعتر وبابريكا
مقادير صوص الاجبان
6 جبن مثلثات
ثلاث ملاعق جبن سايل تشيدر
ملعقه جبن ابيض فيتا
ملعقتين زيت
نص كوب حليب
بيضه واحده
رشه فلفل اسود بسيطه
بقيه مقادير البيتزا الزيتون الاسود او زيتون اخضر
الطريقه
نعجن العجين نحط المويه والسكر والخميره نخليهم خمس دقايق يتفاعلوا ثم نضيف اللبن والملح وزيت الزيتون وحليب البودر والثوم البودره ونخلط بالمشبك اليدوي ثم نضيف الدقيق واذا شفتيها لسه ناشفه ضيفي زيت زيتون واعجنيها وغطيتيها تخمر تقريبا عشرين دقيقه او نص ساعه لما تحسيها تضاعف حجمها
لاعداد الكشنة جيبي الخلاط حطي فيه الطماطم والفلفل البارد واخلطي وشوحي البصل مع فصين ثوم ثم حطي الصلصه والطماطم المعصوره ورشه زعتر وفلفل احمر وخليهم يتسبكوا وخليها تبرد
صوص الاجبان جيبي الخلاط حطي فيه الحليب والبيضه والاجبان الثلاث والزيت والفلفل الاسود واخلطي الخلاط الى ان تتجانس جميع المكونات طفي الخلاط وجيبي ملعقه وحركيهم حتلاحظي الخليط سايل عادي هو بالفرن حتتجمد الجبنه
تمدي العجينه بالصحنين زيما كلمتكم الكميه اعطتني صحن كبير وصحن صغير حتمدي العجينه بالصحن الاول وتسخني الفرن تحطي الكشنه وهي بارده لازم تكون بارده حطي الزيتون ودخليها الفرن من تحت ثم فوق لما تنشف الكشنه خرجيها وصبي الجبن وزعيه ودخليها الفرن مره اخرى لما تحسي اتماسكت الجبنه خرجيه
ودخلي الصحن الثاني
البيتزا لذيذه وزوجي قال كانك حطيتي كرافت ابو علبه زرقاء قلت له لا هذه مجموعه اجبان اعطت طعم الكرافت ابو علبه زرقاء
الجبنه السايله خذي الي مكتوب عليها تشيدر الي لونها سكري وليس ابيض اخترت شركه بريزدن
واذا مامعك خلاص سوي السايله البيضاء
والكشنه بتبقى معك لليوم الثاني يعني ماسويت كل الكشنه للصحنين بقت شويه
احب سمك العجينه بهذا الشكل
