*{ بيتزا كاي }* الجــامدة.. والي هيا بطريقتي ، الكل يحبها اتفضلو عزيزاتي

السلام عليكم ورحمة الله وبركاته

متحمســـــــة اني انزل طبخة ليا من ما أذكر اني نزلت قبل كدا (والله أعلم ) خخخ

المهم قصر الكلام، أنا بعمل بيتزا تجنن بكل تواضع والكل يحبها وعن جد نفسي الكل يضبط البيتزا حقته وأهله وأخوانه أو زوجها يحبوها من يدها ..
عشان كدا وعشان الفائدة للجميع حبيت أشارككم بكل الحب طريقتي البسيطة واللذيذة..
راح تشوفون الصورة بس راح اكتب المقادير والطريقة الأول:

المقادير:
العجينة:
3 اكواب دقيق
1 ملعقة خميرة فورية
1 ملعقة سكر
نصف ملعقة ملح
ربع ملعقة ثوم بودرة
ربع ملعقة بصل بودرة
3 ملاعق حليب بودرة
بيالة زيت
وثلاثة أرباع كوب ماي.. أنا احياناً استخدم ثلثين على حسب انتي شوفي.
طريقة العجينة:
حطي المكونات الجافة مع بعض، ثم اضيفي الزيت واخلطيه مع الدقيق، أضيفي الماي واعجني زين ولازم تعجينيها بطريقة الطرق .. يعني ارفعي العجينة واطرقيها جامد داخل الوعاء..اتمنى اني وضحت كلامي ( الغاز ههه)
تكوني مسخنة الفرن شوي بس.. يعني بس تقدري تدخلي ايدك داخل الفرن من دون تحرقك ..وحطي العجينة داخل قدر عادي بغطاء ودخليه داخل الفرن..
الهدف من الفرن: انه نوفر للعجينة بيئة حارة عشان الخميرة تشتغل..
تيب بعد نص ساعة طلعيها واعجنيها ورجعيها . بعد ساعة طلعيها وحتشوفيها انتفخت برضه اعجنيها ورجعيها .. بعد ربع ساعة استخدميها.

ملاحظة:
اضفت الثوم البودرة والبصل البودرة ( تطلع حلوة زي بيتزا هت) لكن لو ماعندك عادي .. احيانا انسى واسويها عادي بدون.

مقاديرالصوص الي فوق البيتزا:
طماطم مقطع قطع كبيرة.. مو مره بس خشنه يعني
بصل مقطع قطع كبيرة
فلفل رومي مقطع قطع كبيرة
كاتشب
زعتر بري (اوريجانو)
ربع ملعقة بابريكا
نص ملعقة ملح وانتي وذوقك
رشه فلفل أسود.

طريقة الصوص:
حمسي البصل والفلفل الرومي ..الين بس شوي يذبل مو زي ما نعمل الإدام لا بس شوي يذبل ضيفي ليه الطماطم و الملح والبابريكا والزعتر و الفلفل أسود بس.. وخلي الطماطم تنطبخ وتذوب شوي كمان مش كثير..
جهزي الخلاط (الكوب) وحطي الخلطة داخلها وضيفي عليها كاتشب انا احياناً ازيد 3 ملاعق.. احيانا أكثر على حسب ذوقك (وحسب قد ايش تبغي فيها الطعم شوي يكون حالي عشان الكاتشب فيه سكر مثل ما أنتم عارفين ياحلوين)
خلاص خلطتي الصوص.. انتي جاهزة دحين..

المقادير الأخرى :
فلفل رومي اخضر مقطع مكعبات صغيرة
فلفل رومي أحمر مقطع مكعبات صغيرة
نقانق تقطع وتحمس مع زيت شوي
جبنة شيدر (المراعي) انا استخدمها ..(احطها بالثلاجة بعدين ابشرها)
زيتون أسود

الطريقة كاملة.
جيبي صينيتي كبيرة وادهنيها بزيت وحطي عليها سميد..عشان ماتلزق (نفس حركة بيتزا هت :42:)
افردي العجينة وحطيها داخل الصواني
ادهني العجينة بالصوص
وزعي النقانق المقطعة فوق
وزعي الخضار (الفلفل الرومي) فوقها
وزعي الجبنة.
وزعي الزيتون

تكوني الريدي مشغلة الفرن وانتي تزيدي المقادير..
دخليها الفرن لمدة ربع ساعة من تحت تكون تشقرت.. وطفي وولعي من فوق لمدة 5 دقائق
وبالعــــــافية على قلوبكم ياحلوين

أتمنى كل من جربت بيتزاتي وعجبتها وأهلها عجبوها تدعي لي انه ربنا يوفقني ويرزقني بالذرية الصالحة المعافاة..

شوفو الصور ( يارب ماتطلع كبيرة مررره )