بنزل لكم وصفتي الخاصة للبيتزا و وصلت لها بعد تعب و محاولات عديدة كل مرة احاول اظيد او انقص او احط اشياء جديدة لين ما ظبطت معي
جربوها و خبروني
المقادير
خميرة م كبيرة
باكينج باودر ملعقة صغيرة
سكر ملعقتين كبار
حليب بودرة ملعقة و نص كبيرة ممسوحة من السطح
خل مقدار نصف غطاء علبة الخل
زبادي ملعقتين كبار
بيضة واحدة مخفوقة بالملعقة (اختياري ) و بقولكم ليش
زيت 3 ملاعق
ذرة ملح
نشاء ملعقة كبيرة (غير ضروري)
الدقيق مبدئيا 2 كوب كبار و نصف حنزيد عليها في العجن
الماء مقدار نصف كوب للخميرة و راح تزيدي فيما بعد للعجن اذا احتاج
نجي للطريقة
حطي الخميرة و ملعقة سكر واحدة في كوب و املي نص الكوب ماء و اخلطي بالملعقة لين يتغير اللون
اذا حبيتي تنتظري لين تطلع الرغوة و تتفاعل الخميرة تمام اذا ما حبيتي مو ضروري لانه بكل الاحوال انا اخلس العجنة تقعد لين تخمر على راحتها لمدة ساعة و نص
ملعقة السكر الثانية نص منها يروح مع المكونات الجافة و تص منها يروح في الصوص
تحطي المكونات الجافة كلها سوا و شي مهم لازم تنخلي الدقيق و المكونات اللي معاه يخلي العجين لين
و تحطي معه معاهم الزبادي و الزيت و الخل و البيض اذا تبغي وظيفة البيض يخلي العجنة كلها قطعة وحدة و ماتمسك ابدا بصينية الفرن بس مو ضروري اذا كثرتي من الزيت اللي تمسحي فيه الصينية يكفي
بس مو زيت كثير يعني امسحي طبقة اولى و عيدي عليها امسحي طبقة ثانية فهمتو
المهم كل المكونات حطيتيها الحين العجنة لازم تطلع من يدك ما تمسك فيها حطي دقيق و زيت و مويت الثلاث عناصر هي اللي تتحكم في العجنة لو حسيت تمسك العجين في اليد زيدي دقيق و اذا كان جاف زيدي زيت شوي قليل جدا و هكذا
اعجني لمدة عشر دقايق هو سر العجنةالمزبوطة خخخخ
الحين اتركيها تخمر لساعة و نص
لما تطلعيها افرديها بارتفاع قليل جدا هذا سر المطاعم ما يسوونها مرتفعة مافيها عجين كثير مثل الخبز و اذا تبغيها ما ترتفع اثقبيها بشوكة في عدة اماكن
الحين نجي للصوص جيبي ملعقة صلصة و قليل ماء يدوب تذوبي الصلصة ملعقة ماء و حطي اوريجانو و فلفل اسود
و النص الثاني من ملعقة السكر تذكرونها و خلطي المكونات بالملعقة و اذا تحبي بدل هالصوص اشتري صوص بيتزا جاهز وزعيها على العجنة من فوق
و حطي خضار انا احب احط طماطم و فلفل اخضر بارد و بصل ابيض حلقات و زيتون و فلفل حار اخضر اقطعهم كلهم على شكل حلقات ما عدا الطماطم قطع صغيرة
و من فوق اخر شي السر في جبنة الموزوريلا ما ابشرها اقطعها عدة شرائح خفيفة بالسكين و اوزعها من فوق على البيتزا ترى هي معمولة على شكل مثلث لسبب مو عبث لانك لما تقطعيها شرائح تجي مثلثات على شكل البيتزا المدورة ما ادري ليه ما انتبهتو
المهماني احطها على البيتزا من البداية ما احطها بعد ما تنضج البيتزا
اخر شي الفرن تولعيه من قبل ما تدخلي البيتزا ب 10 دقايق على درجة 250 لمدة 20 دقيقة و بالهناء و العافية
ملاحظة الخضار تقطعينها من بدري ما ينفع تحطينها بمويتها و هي لينة تخرب البيتزا او حاولي تحطيها في ورق تنشيف
