بيتك دورين ؟ماعندك شغاله ؟ادخلي بليز

ياقليبي انا مثلك بيت دورين و4 اطفال اكبرهم باول واصغرهم 5شهور وما عندي شغاله كانت عندي وراحت صراحه تريح

بس النفسيه قلق لما راحت تعب صح بس راحه نفسيه حاليا ما افكر اجيب وما يجين احد زيك الحموله من السنه لسنه

الله يعيننا بس

ريحي راسك وجيبي شغاله والله ياقلبو ماترتاحين بدونها

اولا الله يعينج ثانيا ياختي انتي يمكن مثلي انا اكره الخدمات ومابيهن يدشن بيتي مدام انا بعافيتي


بقولج قصة شغالتي الي جبتها لما كنت حامل كانت اتخلص شغل البيت بساعه كل شي يلمع اول ماتقوم تحط الملابس بالغساله وتخم البيت كله وتمسحه واتغير ع الملابس وتروح اتغسل الحمامات وتنشف الملابس واتشرقهم وترووح واتغسل الغاز والمطبخ كانت بس تخمه وتمسحه بفوطه مبلوله بديتول وبعدهاا تروح اتمسح الدولاب والتلفزيون والمراياا واخر شي غرف النوم ترتب السراير وتخم الغرفه وتفتح شباكها وتسكرهاا


وتخلص كل شغلهاا بساعه وحده وكلنت بعد الغدا اتغسل المواعين وتقعد تكوي الملابس وتبقى طول اليوم فاضيه والبيت بس يلق واخذتها قاعده عندي وفعلا قمة اسوي مثلهاا وصرت فاضيه اغلب الوقت



بما انج في بيت دورين لازم وضروري اتقفلين الغرف الي ماتستخدمينهااا مثلا مجلس الرجال وصالة الحريم ومغاسلهم وحماماتهم هذا يتسكر اذا فيه مكان للجلوس غيرهاا

خلي لج جلسه لج ولعيالج تكون عذي جلستكم ماتغيرين ولاتخلين كل البيت مفتح والغرف مفتحه


بعدين اذا انتي ماتبين شغاله مالج الا انج تساعدين نفسج بالتكنلوجيا الي اهي طبعاا


غسالة مواعين


تحطين فيها اصحونج وتغسلهم بدالج


وغسالة ملابس اتوماتيك اتغسل الملابس واتغير عليهم واتنشفهم وانتي جالسه

ولازملج جدول يومي تسوينه تاخذين لج ساعتين من وقتج اترتبين بيتج فيه وافضل وقت يكون بعد مايروحون عيالج للمدرسه

وبالنسبه لصعوبة الصعود والطلوع فوق واحمل اغراض التنضيف معاج من المطبخ لدور العلوي فيجب عليج اتحطين سله اصغيره بالحمامات المستخدمه ويكون فيها جميع المنضفات الضروريه لتنظيف الحمام والمراي وخليها خاصه بهالحمام الكل حمام سله وتكون فيه دايماا

وبالنسبه غرف النوم ياختي لازم اتعودين بناتج وعيالج انهم يرتبون اغرفهم عشان يتعودون حتى لو ماينضفون عدل ع الاقل ماتتراكم عليج وخلي كل يوم تنظيف شامل لغرفه من الغرف مدتهاا نص سااعه
وبالنسبه للحوش فخليه غسله مره بالاسبووع او بالاسبوعين اذا ماعندكم غبار

واخيراا اختاري لج وقت مناسب لتنظيف يكون فيه مزاجج رايق ياما تختارين لما ينامون العيال او لما يروحون للمدارس وافضل شي لما يكونو بالمدرسه.

اذا ما تقدرين تجيبين خدامه .. احسن شي تسوينه

قبل لا تنامين تقولين سبحان الله والحمد لله ولا اله الا الله والله اكبر .. 33 مره

ترى لها مفعول مثل السحر

تشوفين نفسج تشتغلين بدون ماتحسيت بتعب

وثاني شي عليج بقومة الصبح يعني لا تتأخرين بالنوم .. تنامين بدري وتصحين بدري

لان الوقت الصبح فيه بركه .. تشتغلين وتخلصين شغل وتشوفين الساعه الا تو الناس في وقت طويل عندج

وحاول الشغل ما تكون خطواته كثيره

مثلا غسيل الحمام لا تسكبين الماي والصابون وتفركين وبعدين تمسحينه ... خليه خطوه وحده

المغسله والمراحيض اغسلينهم بالصابون وديتول

والباقي مجرد مسح بفوطه مبلله ماء وكلوركس او ماء وديتول .. وتشطيب سريع

والارضيه تفرشين الفوطه على الارض وتجيبين العصا الممسحه وتمسحين الارض بالفوطه .. بدون ما تسكبين ماء ولا تفركين

بهالطريقه بدون تعب ولا راح تخربين الارضيه ;)

الله يساعدج ويوفقج :)

كأنك تتتكلمين عني انا بعد مثلك دورين و4 اطفال الله يحفظهم والكبيرة في ثاني متوسط والصغير في الحضانة ....وحالك احسن مني لأني اشتغل .....يعني دوام / ارتباط ... الله يعيني ويعنينك ... الله كريم