وينكم يا بنات

السلام عليكم يابنات

اليوم ماصمت قلت اباخذ راحه طبعا ماقمت لين 1 الظهر وبالغصب
قمت علطول غسلت وطوالي للمطبخ شبيت عالقهوه وبديت بغداي سويت بروستد طبعا الدجاج مطلعته من الليل بالثلاجه عشان يذوب عنه الثلج عارفه نفسي بتأخر بالنومه
تقهوينا وتغدينا بعدها قمت عالمطبخ نظفته ولمعته وطلعت اصلي العصر
صليت ورجعت تفرغت للفرن ياهو سبب لي حالة اكتئاب واضطراب نفسي
تخيلوا العين الكبيره صاير لونه بني محروق من ايش ماادري من امس ماكانت كذا فرني هذا جديد توقعت انه نازل عليه زيت ومع الحراره قلبت كذا

شلت عيون الفرن كله ونقعته بصابون وكلوركس
ونقعت الفرن بايزي اف بام وتركته شوي بين مامسحت الدواليب والطاوله ورجعت فركته والحمدلله طلع يلمع
وحولت مباشره على العيون فركتها وبالذات الكبيره قهرتني وبيضت شوي بس مو مره >>> تحطمت

وشغلت المروحه وطلعت عشان يجفون
كملت غسيل الغوامق هذي اللي بقت اخر شي كل يوم اغسل لون >>>> هذا وانتي توماتيك يالعجازه
وانطلقت اغسل شماغات رجلي كنت منقعتهم فركتهم وغسلتهم وشطفتهم بمويه ونشا امس قريت هالمعلومه من وحده تقول يصير يشقص ,,
رجلي عقدني انتي مخربه شماغاتي صايرات رخوات ,, ان شاء الله تجيب نتيجه معه
وبعد ماخلصت استلقيت اتابع قناتي المفضله فتافيت وتذكرتكم قلت اشوف البنات وش سووا
شفتوا اني سنعه وطول وقتي شغل بشغل
يالله عساكم تحمستوا تقومون تهجمون بشراسه ؟؟

السلام ..انا قريت موضوعكم امس وحبيت اشارككم..
صحيت اليوم 1 الظهر وامسك لكم الشقه من الى..واغسلها كلها بالعملاق الاخضر وداك برائحه الورد وشوي اريل عشان يكون فيه لمعه شوي
اول شي سويته طبعا غسلت كل الحمامات ونظفتها مررره والمغاسل والمرايات وبعدين المطبخ غسلت المواعين ونظفت الدروج ورتبتها لانها محومه كبدي من زمان بس الثلاجه مالي خلق عليها مارتبتها الا الاسبوع اللي فات بعدين عبيت لي طشت صغير مويه ويالله بديت من غرفة النوم الى مجلس الرجال وغسلتها كلها الحمدلله وشطفتها واخذ المناشف حقات المطبخ واغسلها بالغساله ومسحت الغبار ..بس الجد لا جيت جدارن ولا شبابيك ولا ستاير كان حيلي منقطع خصوصا اني اليوم طابخه وتعبت يعني مسويه خضار وقاليته ومنقطع قلبي <<مالها في امور البيت..عاد الحين حطيت على الفرن موبي ابي انظفه كله مرررره والى الان ماخلصت بس الحمدلله احس اني سويت انجاز ماشاالله ,,,

اي نسيت اقولكم ..باقي لك غرفة الملابس هذي لحالها يبي لها 5 ساعات ابي ارتب الدولاب من اول وجديد بس ماعندي افكار مدري وش اسوي بالرفوف ودي اخلي رف كله بناطيل ولبس البيت وبديهات والثاني التي شيرتات والاخير التنانير ولبسي الرسمي كله مغسلته ومعلقته الحمدلله اما اللي بالرفوف مخليتهم اللبس العادي وزوجي مصرفه ملابسه برفوف من ايكيا معلقتها بدولابه وحاطه البجايم برف و... ...,و....كل شي برف ومرتاااحه مرره

ماشاء الله عليك ياكادي
يالله مابقى غير القليل شدي الهمه وتابعي خلي بكرا ان شاء الله كله للملابس متى ماخلصتيها وارتاحي
انتي نظمي شغلك كل يوم سوي شي وبكذا تخلصين شغلك وماترهقين نفسك بزياده
والله يقويك ويقوينا