شوفي حبيبتي انا بصراحة اهم شئ يكون للبنت غرفة خاصة خصوصا انها كبيرة والعيال ممكن ينامون بالمقلط يما الله يفرجها

مبروك البيت اول شي ماشاء الله ..الله يعطيكم خيره ويجعله مسكن الهنا بالنسبه لغرفة بنتك خليها مع إخوانها لحد ماتكبر غرف الضيوف وحماماتهم خليها دايما مسكره لاتستعملونها عشان اي ضيوف يجونك فجأة تكون الغرف بالحمامات نظيفه .ومافيها شي إذا استخدموا حمامك اغراضك حطي لها دروج والا رفوف في الحمام بحيث انهم مايقربونها والمقلط خليه لجلستكم عشان الصاله كمان ماتكون محيوسه إذا جوا ضيوف و المقلط ادفى من الصاله هههههوالا ممكن تحطين المقلط غرفه لبنتك وتستخدمون المطبخ زينا ههههه
افرشيه كله والا ع الاقل حطي دعسه في وسط المطبخ واستخدموه لكم تاكلون فيه وكل شي والا إذا غرفتهم كبيره هي واخوانها اقسميها وحطي لها غرفه اهم شي الصاله لاتقسمينها وتخربينها لانها مداخل الصالات ووسع للبيت كمان
والملحق اللي برى استفيدي منه غرفه للغسيل والا للخدامه والا خليه مجلس إذا ينفع والا جلسه لكم بيتك وإنتي أدرى به ..اتمنى أكون افدتك الله ييسر امرك

وإذا غرفة الحريم كبيره لا تخليها غرفه لبنتك لانو بيصير شكلها بايخ

لو تقولي لي المساحات للغرف + مساحه الحوش
راح اساعدك ^_^

شوفي ياعبير الورد الله يعطر أيامك بطاعته
المغسله اللي عند حمام الحريم ومطفشتك دخليها الحمام وسوي المدخل والمرايا اللي بتسويه
وغرفة أولادك سويه غرفه خاصه لبنتك وأولادك سويلهم المقلط غرفتهم لأنه البنت تكون غرفتها جنبكم أفضل عشان ماتخاف
لأنه وأنا صغيره كانت غرفتي مكان المقلط وكنت ما أنام الا وأنا مرعووووبه
وجلستكم بتكون في غرفة أولادك ( المقلط سابقا ) كيف ! أنا أقول لك زوجة عمي بيتها صغير ومخليه غرفة أولادها جلوسهم
جايبه لهم المراتب اللي تنطبق عرفتيها ! يعني تدخلي الغرفه تلاقيها كنب وفي الليل يفردونها وتصير سرر
وحاطه في الركن دولاب صغير تحط فيه المخدات والشراشف يعني بدل ماتنحط كذا بالأرض وشكلها يكون أرتب
والحمام حقك خليه مشترك كلكم أو تخلي لهم حمام الرجال أو الحريم ، وبعدين ترى بكره ان شاء الله يكبروا ماينفع كلكم بحمام واحد أكيد بيستخدموا حمام الرجال هذا المتعارف عليه
والله بالنسبه لنا بالبيت وانتي بكرامه ثلاث حمامات كلها تستخدم
وكل الغرف مفتوحه دااااائما