بيتي على وشك الانهيار ... يارب سترك مالي بعد الله غيركم

السلام عليكم ورحمة الله وبركاته
اخواتي بنات حواء تحية حب لك منتسبه لهذا الصرح الكبير ..
انا بصراحة اول مره اكتب واشارك بالمنتدى لكن لي سنين متابعتكم ... وعضوة جديدة للاسف ما قدرت انتسب وانضم لكم الا في هذا الوقت العصيب ...
حبيت افضفض لكم لاني احس اني بانفجر وما عندي بعد الله غيركم تشاركوني همي وتنصحوني وتدعون لي .. اذا قريتم معاناتي ادعوا لي لاني محتاجة لدعواتكم في ظهر الغيب ..
انا انسانة متزوجة وعندي اولاد ولله الحمد كنت اعيش مع زوجي حياة طيبة ولله الحمد و كنت راضية وسعيدة ومبسوطة في بيتي .. اولادي كانوا متفوقين في دراستهم وكانوا من اسعد الاولاد في حياتهم ابوهم مدللهم طلعات وجيات ملاهي وفي المدرسة كانوا من الطلاب المتميزين في كل شي .. ( آه اكتب والدموع اربع اربع ) ...
والحين شوفوا حالتي انقلبت 180 درجة والسبب كفالة زوجي لواحد من اصحابه دخل بسببها السجن سنة كاملة ما عاد شفنا زوجي ، ايوه زوجي كفل صاحبة وكان عارف انه لو صاحبه ما سدد المبلغ اللي عليه هو اللي لازم يسدد بداله وزوجي عارف انه يادوب يقدر يمشي امور بيته ورغم كذا كفل صاحبة في مبلغ مالي فوق الخمسين الف .. وهو الحين بالسجن لازم يسدد المبلغ كامل علشان يطلع ..
المشكلة ان زوجي بالسجن قاعد يدفع ثمن طيبته ونخوته وفزعته لصاحبه .. واحنا تعاقبنا معاه اهلي اجبروني اقعد عندهم بالبيت وعاقبوني انا وعيالي بذنب ابوهم وزادوا الطين بلة صرت اهل الدمع اربع وعشرين ساعة حسرة على اللي صار بي انا وعيالي ممنوعين من كل شي ، وعايشين معاهم ولا احنا عايشين الله المستعان ..
على نهاية الترم الثاني كان عندي امل يطلع من السجن لانه سدد ثلاثة ارباع المبلغ وصرت احلم واجهز نفسي لرجعتي لبيتي واقول الحمد لله هانت على اساس بنرجع نكمل الترم الثاني ببيتي لكن ما مداني افرح لان بقية المبلغ بيتسدد اقساط من راتبه على مدار ثلاثة اشهر وهو بالسجن .. وهذا الشي مو لصالحي واخاف ان اهلي يعندون ما يرجعوني له لو طالت المدة اكثر من كذا واحتمال بعد يخسر عمله .. وزيادة على كذا ديونه اللي تخصه بتتجمع عليه واخاف بعد يشتكون عليه يعني همومي فوق طاقتي والله تعبت ..
اول مره يسيطر عليه اليأس والاحباط احس اني عاجزة مو قادرة اسوي شي وكلماته امس وهو يقول تكفين ساعديني تون باذني كل ما قمت وقعدت .. وهذا غير اني خايفة يخرج لنا محرول لانه ما عاد صار عنده قدرة يتحرك من الم ظهره وكتوفه ( مسوي حادث وعملية قبل يدخل السجن )
واللي يقهر انه يقدر يطلع سلفة من البنك ويسدد كاش بدل ما يقسط الدين وهو مسجون لكن !!! امر الشديد على القوي .. وانا ما قدرت ادبر له اي مبلغ ..
سامحوني طولت عليكم ويمكن اتعستكم معايه لكني والله محتاجه افضفض ..

بالله اللي تقرا قصتي تدعي ان ربي يفرج كربتنا باسرع وقت