وكل طريق برضوا له عقبات...
كل وحده اكيد بينها وبين زوجها مشاكل مهما قالت ومهما خبت
اكيد تسالين وتقولين فلانه زوجها كذا وانا الي عندي كذا هذي زوجها سوا لها كذا وانا لا
هذي زوجها يفهمها وماتغير عليها وانا من خذني مافهمني ولابعد اتغير علي
بقولك اولا لا تصدقين كل شي مو معناه ان كل شي كذب بس عاده بنات حواء يحطون بهارات للموضوع
او يختلقون اشياء مالها وجود من الاساس
احب اقولكم قانون معروف بالفيزياء
((لكل فعل رده فعل مساويه له بالمقدار ومعاكسه له بالاتجاه))
يعني تغيير زوجك مايجي من فضى وبس
يمكن يكون السبب انتي او صديقه او هو شاف شي
ماعلينا الاسباب كثيره
بس بقولك حكمه وانتي استنتجي منها
((انتي الحين عندك رصيد بالبنك يوم ورا يوم كل تسحبين وبعدها تركتي فتره ولا استثمرتي فيه ولاشي وجيتي يوم تسحبين فلوس مالقيتي شي الحساب صفر))
حتى الزوج كذا بالبدايه تعطينه وتحبينه وبعدها تبداين تاخذين تاخذين وتنسين تعطين او بقولها عاميته((تعطين الاساسيات وبس))
يجي يوم تقولين اعطيني المقابل تلقين اصلا المشاعر بداخل زوجك صايره صفر وش تحاولين تسحبين منها
حواء الي المفروض يعرف بالمشاعر والتصرفات هو انتي
بحكم انك كلك انوووثه ومشاعر
والمفروض ان كل حواء تفهم ادم للانها جزء من ادم ماخلقها ربها الا انها تونس ادم في وحدته
فحواء جزء من ادم لتسعده وتونسه وتوقف جنبه وتساعده بوحدته
فهي في النهايه جزء منه
حبيبي حواء انتي...انتي ((مفتاح)) لقلبــ((ادم))
يعني كل وحده تقدر تفهم زوجها تعرفه وتتسلل لداخل قلبه
مافي حواء ماتفهم ادم في حواء ماتبي تفهم ادم في حواء تتهرب من ادم في حواء تطنش ادم
طيب نشوف حواء تشتكي من ادم
مايفهمني مايقدرني صاير عصبي وووو مشاكل مامنهى نهايه
يقولون الرجال من المريخ والمراه من الزهره
فالرجال عايشين بكوكب المريخ ولهم قواعدهم وقوانينهم وتصرفاتهم هناك واحنا يا حواء عايشين ولنا قوانينا وتصرفاتنا وقواعدنا
ويوم اجتمعنا على الارض كل واحد فينا يبغى يفرض قانونه على الثاني ويحط حكمه ونسو انهم من كواكب مختلفه
طيب الزواج هو عباره عن ((تنازلات وقبول وبينهما تسامح))
لاحظي بديت بالتنازل يعني تتنازلين عن اشياء كثيره عشان الزواج
مثلا النوم الطويل الراحه في القعده مسؤليات كثيره
وتقبلين بالطرف الثاني يعني
تقبلين بشكله بتصرفاته بطبايعه بطريقه اكله وبطريقه كلامه
ونحط بينهم المسامحه
يعني مو كل من غلط يمسكه الثاني عليه زله وييعلها فيه ليوم مماته انت سويت وانت قلت ووووو
هذا الي قلته لكم بس نصايح نجي للواقع
ياحبيبتي ياحواء يا الحكيمه يا العاقله
ابي اسال كل وحده فيكم سؤال وابيها تجلس بينها وبين نفسها جلسه صراحه لمده دقيقه بس
ابي كل وحده فيكم تسال نفسها هالسؤال
هل انا احب((زوجي فلان))...؟؟ والا لا...؟؟
اكيد كل وحده بداخلها تقول ايه احبه بس الله يهديه مبعدني عنه كذا او حركاته الي كذا
مافي وحده تكره زوجها كل وحده تحبه
والي تقول جالسه معاه عشان عيالي او امي او ابوي
بقولكم شي
الي تقول هالكلام هي تخبي الحب الي بداخل قلبها عن ادم وتدور عذر
وازيدكم من الشعر بيت
هي ماتخدع الا نفسها بهالكلام الكل يعرف انها تحبه بس هي ماتخدع الا نفسها وتقول احبه عشان عياله
طيب انا بقولكم قصه على اني ماني حابه اطول الموضوع عليكم بس هالقصه راح توصل لكم نصيحه ابيها توصل لكم صح....
((انتي متزوجه تزوجتي وبعد فتره من الزواج اكتشتفي ان زوجك عصبي ويخاصم وووو وتقولين طلع متغير علي صار كذا وكذا
بعدها تبدا المناقشات وكل واحد قاعد بكحكمه وتتهاوشون ليل ونهار كانكم قاعدين بانتخابات كل واحد يبي يربح
بعدها يبدى الزوج يشيلك من مخه وفجئه يقولك
ابي اتزوج
ايه بيتزوج ليش لا وش تقولين وليييه على آآآآمتي يخرب بيتك
هانت عليك العشره قلت ماوراك خيييير
ويطنشك الرجال ويجيب الثانيه هنا انتي تشتغلين
لا ما اقعد ابي كرامتي انت هنتني طلقني مالي قعده معاك
وبالطقااااااااااق طلقك وبعدها بـــ5 شهور او 7 شهور تسمعين
ان زوجك هذاك العصبي صار انسان حليكم وحكيم وتغير وتقولين انا كل يصارخ بوجهي
وهذاك الي مايتفاهم صار زين واترقى بعد بدوامه وشلون
صار يطلع ويدخل البيت يضحك وانا كل سب وحناق لي
يجيب المقاضي ويركض فيها للبيت وانتي تقولين وي انا لو كنت اقوله جيب شي واحد قوم الارض علي
اكييييييد بيجي براسك سؤال وهو
وش مسويه فيه هذي...؟؟))
هنا السر ان اختنا بالله الي هي الزوجه الثانيه صارت المفتاح لقلب زوجها
صارت المفتاح وفتحت قلب زوجها وبشويش وبشويش فتحت قلبه
وهنا المفروض تكونين انتي مو هي
طيب اكيد كل وحده تقول وش لون وكيف وتفتح لي ذا العيون
بقولها كل وحده تعرف زوجها انا ماراح اقولك بعد وش هو زوجك وطبايعه بهذا الموضوع
للاني ماراح اكون معك طول العمر
لازم تعرفينه مثلا يعني
الي زوجها عصبي بكل معنى الكلمه
بقولك كلمه الرجال العصبي مثل ماهو له نقاط تعصبه له نقاط تهديه
يعني مثلا زوجك مايحب الصراخ والدوشه بدايه الصباح
تجين انتي وتصارخين قوم يافلان روح لمدرستك يوووه شوف علان ماقام هنا انتي خربتيها
المفروض
تسوين له كووووفي الي هي قهوه الصباح وتقويم عيالك وتلقينهم يقومون بهدوء ليه
للان عارفين ان ((حضره الاسد))
يتمتع بوقته المنفرد وياخذ لحظه السكون والهدوء
هنا علمتي نفسك وعلمتي عسالك انكم كلكم تتفادون نقطه العصبيه هذي
وكل عصبي له نقاط تعصبه ونقاط تهديه
مثلا رجال يحبون المساج يعني اذا عصب على طول خذي يدك ودلكي ظهره وقولي معك حق يابو فلان والله صادق لا تعصب ريح بالك تلقينه فجئه لا شعوريا
لالالا بس فلان رفع ظغطي اليوم
انتي خذيها على الجرح وقولي
ماعليك من فلان دام انا موجوده هنا اقول بس خلنا نطلع نتونس او خلني اسوي لك هذاك العصير الي يحبه قلبك او او...الخ
انا زوجي يحب احد يحك ظهره ومن اشوفه معصب وبدا يفتح ثمه تلقوني مرتزه وراه احك بهالظهر واقول له
وش فيك كانك معصب او متضايق ومتكدر الخاطر
يقول لا بس الدوام اليوم ويخربط ويحط اعذار وخرابيط ما ادري من وين
وبعض الرجال مايحبون المساج ولا شي بعضهم يحبن تقولين لهم
ياعمري ياحبيبي انت او تمسكين بايدينهم وتدلعينهم
كل وحده تعرف زوجها وايش هي نقاط الي تهديه
وصدقوني راح تتفاجئون بانها احيانا نقاط سخيفه وغريبه
او نقول مثلا وحده زوجها مايقضي لها المقاضي
اكتبي له المقاضي بوره حلوه ومعطره ومرتبه
((نبي قشه مثل طعم خدودك
وسكر مثل طبايعك
كاتشاب مثل لون دمك
ووو...الخ))
مو تسوين مثل كذ
والي زوجها مايطلعها ابد
صارحيه وقولي له انا طفشانه ودي اطلع متضايقه بخاطري طلعه
انتي اتحركي وغيري الجو وغيري من نفسك جهزي الفحكم والشاهي المدخن ونقعي دجاج من البارح بالبهارات وقولي له قوم ياحبيبي خلنا انا وانت نجلس بالبر لحالنا نسهر
صيرو روميو وجوليت الصحراء
واذا زوجك مايحب البر يابوزغط متطور قولي له قوم حبيبي عازمتك على كوفي على حسابي
او اعزميه بكورنيش بمطعم اي مكان
او اعزميه على مكان هو يحبه اتدخلي بهواياته
في وحده زوجها مايحب يطلع يوم اكتشفته وجلست تدرس زوجها اكتشفت انه يحب الفروسيه والتطعيس بالبر((يعني التفحيط بالبر للي ماتعرف))<<<يالهوي
المهم قلت له قم يابوفلان قال على وين قالت على نادي الفروسيه مسوين عروض هناك وعرضه تقول والله ماهقيت اني انبسط بس طلع الجو فللللله وروعه ما تصورت اني انبسط مثل كذا خاصه يوم شفت زوجي وهو راكب الخيل اغراني بقوه
وتقول اجرت وانيت من هالوانيتات وقمنا نفحط بهالبر تقول والله لف راسي لف وفجئه قالي وش رايك تسوقين قلت له من صدقك يابوفلان انت ترضى لي اسوق قال والابتسامه شاقه وجهه ايه
تقول قمت وسقت ودورت ورجيت راسه وعلمته فن السوااااقه عدل
خلاصه هذا الكلام كله
ادرسيه افهميه وتفادي اغلاط ممكن تقعي فيها صيري مفتاح لقلبه وصااااارحيه
يعني افهميه وش يجي بباله وانحاشي عن قنابله وصارحيه اذا ماعجبك شي اهم شي المصارحه مو تقولين بصبر او راح اتقبل غصب عني لا برضوا لنفسك حق صارحيه قولي والله يابو فلان ماعجبني فيك كذا مو تقولين انا صبرت عليك او انا تنازلت وتغيرت وانت ولا شي او لازم تتنازل وتتغير
لا بكل انوثه وطبعا مايحتاج اعلمكم الانوثه بعد
كلمه اخيره
اتمنى واتمنى واتمنى ان بعد كل هذا كل وحده اذا بخاطرها موضوع او ودها تتناقش بقضيه عن الزوج او مشكله تبي تلقى لها حل تكتب هنا
واذا ما اخذتو المايك راح انا احط مشكله اغلبكم يعانون منها ونلقى وندور لها حل ونذكر تجارب
واتمنى اشوفكم انتو تكتبون مو انا الي اكتب
ختاما
اتمنى
تدعون لي بالتوفيق في حياتي وبزواجي
ويرزقني الذريه الصالحه
منقوووووووووووووووووووول :)ولاتنسوني من دعواتكم :)
مشكوره عالموضوع الدسم وكله نصايح
لاكن اسمحيلي حبيبتي اقولك ان الكلام سهل والواقع صعب جدا
والحياة الزوجيه مره وحلوه لاكن اذا غلبت المراره تفقدين حلاوتها بانواعها
واذا عاملتي زوجك بكل مايرضي الله ولاكنه جاحد سيصيبك نوع من الانهيار والاحباط
وتشعرين بانك جاريه ولستي زوجه
لخدمته وطلباته فقط
ولاكن حقوقك مهضومه ومهمشه حتى ابسط الامور في التعامل
وهي الاستماع لكي ولمشاكلك ولارائك لاتجدين فيها اي اهتمام
ساعتها ستكون حياة بلا طعم
اعتذر عن الاطاله