بيني وبين الجنون شعره أمهات التوحد وفرط الحركه ادخلوا

مساء الخير
انا سجلت بالمنتدى مخصوص عشان هالموضوع اللي شاغل بالي وحمل ثقيل ع قلبي
بنات انا عندي ولد عمره ثلاث سنوات بقولكم عن طفولته من ولادته والولد طبيعي ويناغي ويضحك ويلتفت إذا ناديناه
وكان يضم امي وينام بحظنها بعمر السنتين تقريبا كنت رايحه أطعمه سألته الممرضة وش اسمك مارد
انا انتبهت طبعا من كلامها والا اول ماكنت منتبهه أن ولدي في شي
طبعا زادت اسئله الناس ليه ماتكلم إلى الآن وكنت انحرج من الاجابه
طبعا بالهالفتره يتكلم كلام مو مفهوم إلى الآن
اللي لفت انتباهي الناس بدت تتضايق منه
هو حركته كثيره مره وانا تعبت معاه كثير
بديت اقتنع أن ولدي فيه شي من كلام اللي حولي يقولوا توحد أو فرط حركه
انا وسوست صرت أراقب حركاته
وزادت مخاوفي وشكوكي
اقول معقوله كلام الناس صح اللي خلاني أخاف أكثر
انو أهل زوجي يتضايقوا منه وصاروا يقولوا لزوجي الولد مو طبيعي
ليه يأكل اللي بالأرض وليه مايرد اذا ناديناه
وليه حركته كثيره
وكمان اهلي صاروا يتضايقوا منه واخواني واخواتي صاروا يخافون من ولدي ع عيالهم
اول كان يدف ويعض بس بعدين ماعاد يسوي كذا
اللي يحز بنفسي لو وحده فقدت ولدها أو بنتها ع طول تقول ليكون فلان عندها وتجري تشوف صاروا يخافون ع عيالهم من ولدي
الشكوى لله شي فوق طاقتي ماعاد أحتمل
حاليا اللي زاد شكوكي
انه يزعل لو أحد خرب شي عليه أو يأخذ منه شي يبكي ويصرخ وبالقوه يسكت ولو قدامه شي يرميه ع الأرض بقوه أو يقفل الباب بقوه
في السوق يجري ومايبي أحد يمسكه طبعا من خوفنا عليه نمسكه ويبتدي يصرخ ويرمي نفسه ع الأرض ويبكي ومايتحرك يضل يبكي ونحاول نهديه يزيد
لما كان عمره ست شهور تقريبا كان في حركه يسويها يكون في وضعيه كانوا بيحبي وبعدين يتحرك للإمام والخلف وهو ثابت بمكانه أولادي اذا شافوه كانوا يقولوا ياماما هو وش يسوي يتمرن
حاليا أي شي مرتفع يجي فوقه ويجلس أو يوقف
بدأ يعبث بالثلاجه يرمي الخبز ويفك الجبن
واللي خوفني أكثر صار يلعب بالأدوية
ومتعلق بلعبته تقريبا أغلب الوقت معه وخاصه اذا نام
طبعا في وقت النوم قصه ثانيه لازم يضرب رأسه بالمخده لحد ماينام
طبعا كلماته محدوده أحيانا لو بغئ شي يجيني يضمني وينادي ماما
إخوانه مايلعب معهم وماعمري سمعته ينادي اساميهم
بس انا اذا لعبت معه ينبسط ويتفاعل معي وتواصله البصري معي اذا لعبت معاه يكون مركز
يحب يسمع القرآن وأغلب الأناشيد حفظها
نقوله طرف الأنشودة يكمل الباقي بكل وضوح
اذا يبي شي يمسك يدي ويعطيني اياه
واذا قلت له يالله الغداء او العشاء يجي
اذا غبت عنه يفقدني ويدور علي
يخاف اذا كان لوحده ويزعل مني ويضمني
اذا ابوه خرج وهو شافه يبكي بتخرج معاه
يعرف يدق الباب ويقول افتح
لاحظته أن حفظه سريع لو علمته كلمه يحفظها
بس مايقولها إلا إذا شافها قدامه
مره فتح الثلاجة وشاف الطماطم قدامه مسكها بيده وقال طماطم
حاليا هذا اللي لاحظته أي اسئله أو ملاحظات قولوا لي
بالنسبه لأبوه رافض يوديه نف*** يقول الولد صغير وانتي مكبرة الموضوع
شوروا علي شكي بمكانه أو الناس أثرت علي