بين البنت وجدتها (علاقة البنت وجدتها)

اولا
مبارك عليكم ماتبقى من الشهر ومبارك عليكم العيد وكل عام وانتم بخير للعيد
كلامي عن فئة جدا غاليه على قلوبنا اللي هم الجدات😢❤️❤️❤️
بين البنت وجدتها
بين البنت وجدتها تصير سوالف نقاشات بينهم غالبا محبة ومودة رغم كل الاختلافات و
مع ان الفرق شاسع وهائل بين جيل الاحفاد والاجداد الا ان فيه امور كثيره بعد متفق عليها منها الدين والاخلاق والحياء وبر الوالدين وحسن الخلق وغيرها
ومن الامور المختلف عليها:احيانا اللبس واحيانا التفكير واحيانا ايضا الجوالات الاجهزه والبرامج والنت
الجده تقول لحفيدتها يابنتي اتركوا عنكم الجوالات اللي مامنها فايده وسولفوا معي والبنت تحس ان الجوال والبرامج جزء كبير مهم من حياتها وتواصلها مع صديقاتها واالعالم الخارجي
ايضا من الامور المختلف عليها
طريقة التفكير البنات اليوم اكثر استقلاليه من قبل
ايضا شغل البيت ومعاهم حق جداتنا يقولون اشتغلوا صيروا سنعات وقرمات واكيد يقارنون ببنات قبل الي كانو يشيلون عوايل
ولاحياة لمن تنادي
وماحنا صايرين بسنع بنات قبل بس نحاول ودايم
يقولون اجلسوا معنا سولفوا معنا وهكذا
فنصيحتي لكل اخواتي البنات:
ترى الجدات يسمعون لك اذا تكلمتي بالعقل والتفكير والمنطق
لاتغثينها بمشاكل اوتحشين باحد ترى الكبيرات بالسن ماهم ناقصين وجع راس يكفي المسؤولية والهموم اللي عندهم
حاولي اذا صارت مناقشة تتكلمين بهدوء وحرص على رضى الجدة
وتحاورينها بمنطقها وتقعدين اذا شفتي انك متعلمه اكثر منها وفاهمه انزلي لتفكيرها ترى هذا من البر وبر الجد والجده من برالوالدين
حسسوا جداتكم بكم قربوهم ضموهم حبوهم حبي يدها كل ماقابلتيها بعد فتره
لاتحسسونهم بفجوة كبيره بينكم وبينهم
حطوا حنا عادية زيهم وتحنوا معهم وحنوهم البسوا ذهب
سولفوا عليهم سوالف الاولين
ترى ينبسطون ويفرحون وتدخلون السرور على قلوبهم
وريهم مقاطع قصص بدو اوقصص الاولين اوشعر اونياق ترى ينبسطون ويفرحووون مره البسي لبس شعبي وفاجئيها
اهديهم بالاعياد
اعزميهم
كل فتره برا اوببيتكم
قللي من استخدام الجوال وخوذي بنصايحهم ترى فيها الكثير من الحكمه وخلاصة تجارب وخبرات لسنوات وسنوات.
صيري سنعه والسنع بيرجع لك بالنهاية مااقول اكرفي نفسك وانسي نفسك بس حسسي جدتك انك سنعه وبنت كبيره
ايه صح نسيت بعضهم تبعد جدتها ام ابوها عشان المشاكل مع امها وهذا غلط لازم تبرينها بالنهاية انتي بنتها🌹🌹🌹
❤️❤️❤️
وسلامتكم
اتمنى يحفظ لنا جداتنا ويطول باعمارهم
ويرحم الميتات ويغفرلهم ويشفي المريضات منهم يارب ياكريم آمين