بين قريبتي واختي وصديقتي

السلام عليكم ورحمة الله وبركاته

اخواتي انا بحكي لكم عن سالفة اختي وصديقتي وقريبتي
هذي وحده من صديقاتي ماتجيني الا بوقت ماتصير لها مشكله وتبيني احلها وكانت حركتها هذي تنرفزني لانها طول السنه ساحبه علي ، بس كنت اقول مافضفضت لي الا اكيد تثق فيني بس المشكله مو هينا المشكله انها تشوفني انا اللي اسحب عليها
المهم الفتره الاخيره سوت لي سالفه كبيره مع وحده من قريباتي وتطلقت قريبتي هذي ، المهم ان قريبتي هذي قلبها طيب مره ولاعلمتني بهالسالفه الا عقب طلاقها ب 4 شهور
انا انقهرت وانغبت دخلتني بسالفة طلاق يعني مو حي الله سالفه جلست اعتذر لقريبتي عن حكي صديقتي والمشكله اللي سوتها ودخلتهي معها فيها وبريت نفسي واني ابد مالي شغل وقلت اني بتصل عليها قدامك وبخليها تفهمني ليش تدخلني بمثل هالسوالف وتبريني من كذبتها علي قامت قريبتي قالت خلاص سالفه وراحت ولا تحركين المشاكل من جديد

انا ماهدا لي بال رجعت للبيت اتصلت على صديقتي الساعه 2 الليل ماصبرت لليوم الثاني وجلست اهاوش وانكرت كل شيء وانها ماقالت


ماصدقتها سكرت الجوال بعد اسبوعين حذفتها تذكرت انها مصلحجيه وختمتها بسالفه مره حلوه ماشاء الله يعني من زمان وانا مو حابه تصرفاتها "" المهم بعد شهر كيذا دخلت علي بالواتس وتسألني عن اخباري وقبله محاكيه صديقتي القريبه انها مشتاقة لي ومن هالحكي
بس انا ماقدرت اعذرها واضح بحكيها الندم بس قلبي للحين شايل عليها ومتأكده مليونين بالميه لو ارجع بترجع لحركاتها لأني دايم اعذرها

اختي قد دخلت معها فتره وحبتها وقالت لي انتي حقود وماتسامحين ومن هالحكي واختي لها فتره قالبه علي ،، فيه مواقف اشوفها منها بس ماقولها ل اختي يعني صورتها عند اختي طاهره مو زيها عندي مشوهه بمواقفها


السؤال هل اسامحها ولا كيف اقنع اختي انها تسبب لي مشاكل وبس؟
احياناً يأنبني ضميري واحيان اقول ماغلطت هذا شوي من اللي تسويه ،، وتفشلت مره مع قريبتي هي طيبه معي وامها طيبه حطتني بموقف لا احسد عليه وهي اصلاً بينها وبين زوجها مشاكل من قبل بس اتوقع هالسالفه هي سبب الطلاق