يا عمري انتم الله يرزقكم كلكم و كل المحرومين ان شاء الله ...

وبعدين تعالوا من قالكم ان الي ماتحمل على طول بس هي الي يطلعون عليها كلام ...

انا ماحملت الا بعد سنة و كل من دق علي يسأل حملت او لا ؟ صرت شغلهم الشاغل ...

صار بنتي لها 2 سنة و قررت احمل بس كل الابواب انسدت قدامي ..عانيت معاناة يا بنات ماتصورون حالتس النفسية و الصحية تدهورت .. وصرت اكره الاجتماعات .. لاني عارفة يبي يقولون بنتك حرمة يله احملي وش تنتظرين ؟؟؟

لا بعد لو تشوفون مجتمع المعلمات مجتمع غير انساني و لا يرحم ...انواع الاسئلة وانواع النصائح وانواع القرف والاحراج وكل شهر يسألون (مالك صلاة)؟؟؟كل هذا وما احد سألهم ...يعني كأن رزقي بيدي ..قعدت على هالحالة سنتين وكل مارحت لمستشفى قال مافيك شي و زوجك مافيه شي ..ومن منشط للثاني ومن اشاعة لاشاعة ومن دكتورة للثانية مريت على كذا منطقة ....وكل خلطة بالمنتدى او سمعتها جربتها..ورحت للشيخ اقرى و اخذت زيت و كريمات ..

وكل ماسمعت وحدة حامل بأي مجتمع بطلت ازورهم لاني عارفة هم ينتظروني بفارغ الصبر ...(جتني عقدة):angry2:

شوفي فلانة حملت و بنته اصغر من بنتك ؟؟شوفي علانة تبي تولد وانتي توك ؟؟ ترى الرجال يجيه ضعف !!!

يعني هم الحين اشطر مني ..احيانا اقعد ابكي بمرارة ..كني مسوية ذنب ..سبحان الله الناس ما يقدرون.. والحظ كل ماله يردى ...ورحت لمراجعتي الاخيرة بالمستشفى قالت لي الدنيا حوسة عندك اكياس على المبيض و تحتاجين عملية ..وعندك ضعف في المبايض و الهرمون احتمال زايد ..شوفوا وانا قبل مابي الا العافية ...بس رحت اخرب على روحي عشان اسكت هالعالم ..:09:وانا مابيدي شي ..انسانة ضعيفة ..(طبعا سبب الاكياس احد المنشطات ما ناسب معي و سببها)

بعد كذا .....وش توقعون ضاقت الدنيا بعيني و راحت كل امالي ...وهرج الناس يبي يزود ويبي يفرحون علي ..
لقوا لهم موضوع ...وقعدت ابكي عند امي هالمرة ..رحت لاهلي وكل شي ماله طعم ولا لون ..اشوف الدنيا لونها واحد الي هو اسود ..

حتى المعلمات لاحظوا اني متغيرة نفسبتي ..وهذا الي انا مابيه ...لانهم الله يهديهم يضربون على الوتر الحساس


بعد كذا طنشت كل المستشفيات وكل كلام الناس وحمدت ربي ان عندي بنت ,,وجتني الدورة طبعا ,,ولا اخذت اي شيء لا خرابيط ولا حبوب ولا اي شيئ ,,ولا دخلت المنتدى ...

قررت اني انسى هالموضوع نهائي و اني اغير حياتي .. سافرت نهاية الاسبوع انا وزوجي بعد ما طهرت على طول
وغيرت شكلي كله (كنت ناوية اسوي هالشكل بعد النفاس) لكن ماكتب ,,,وجددت المكان وتمشينا و غيرنا جو
...ورجعت للمدرسة بشكل اخر ..انهبلوا عليه ,,ونسوا سيرة الحمل ...

وبديت اقرأ سورة البقرة بنفس واحد ..كل ما صرت فاضية ...وقبل الجماع كنت امسح على بطني زيت زيتون مقري فيه

من الشيخ ...غير اذكار الصباح و المساء (متعودة عليهم ) والرقية الشرعية بعد صلاتي الفجر و المغرب

ولهيت بعمري و شكلي الجديد و نسيت امر الحمل ,,بالعكس قلت مابي احمل الحين يخرب شكلي ..

خلينا ننبسط والي كاتبه الله يبي يصير ..(ما احد ميت الا اخذ كل رزقه ) هذي الحكمة عاجبتني .. و دايم حاطتها قدامي تنسيني كل همومي ...يعني بديت اوسع صدري و اشكر ربي ليل و نهار ..(الحمد لله على كل حال )

تصدقون يا بنات الدورة الي بعدها ما جتني .....قلت انا اكيد لخبطة هرمونات و لا تأخر زي العادة ,,
وصبرت بس ماجت ..قلت مابي اعطي نفسي امل ..ان جاء شيئ ولا فرج الله قريب !!!

يوع تعدت اسبوع عن وقتها ..قلت ابشتري الفحص ...بعدين خليته بالدولاب (ياما خسرت منهن)

بعد يومين كرهت الاكل الي انا كنت احبه ..بس هذي بعد اعراض تاخر الدورة ..
بعد يومين رحت اسويه ...وياللمفاجاة صار خطين .. وطلعت لزوجي و الشريط معي (شف شف خطين ):42:

وما صدقت رحت للمستشفى و حللت عندهم ,,وقالت مبروك (هاميل) واخذت التقرير منهم ..

ورحت للاستقبال و قلت هذا وشو ؟؟؟ قالت هذا حمل فيه بيبي ....:icon28:.

مع اني مدرسة ُE واعرف اقراه وادري انه بوزيتيف يعني حامل بس ماني مصدقة ,,,

ذيك الليلة من احلى الليالي ...وبشرت امي من بكرا ..وقلت ماني مصدقة يا عالم يا ناس ...( ربك ما ينسى أحد )سبحانه ...

تصدقون جيراني تعرفت عليهم بنفس السنوات الي ما حملت فيهم ..وبعد ما حملت ..قالوا سبحان الله كنا نحسب لونك اسمر ...والحين صرتي بيضاء ...(طبعا هم مايدرون عن السالفة ) بس ابين لكم دور النفسية على الشخص ..


يارب لك الحمد و لك الشكر

اللهم في هذه الساعة المباركة كما فرحت قلبي ففرح قلوب أخواتي وفرح نظرتهن و قر عيونهن بالذرية الصالحة ... يارزاق يا كريم اكرمهن بالحمل ولا تحرمهن يا ارحم الراحمين ....


آآآآآآآآممميييييييييين

والله يابنات عبرتي بعيوني


الله يرزقنا يارب العالمين



انا صح ماكملت سنه بس كل اللي تزوجوا معي كروشهم قدامهم الا انا



و زوجه عمي اللي متزوجه بعدي ماشاء الله تبارك الله عندها ولدها الله يحرسه لها ويكبره ويخليه لها يارب




وزي ماقلتوا اذا فيه خبر وحده حامل على طول يطالعوني يشوفون نظرتي



والا اذا شافوني اطالع الصغار على طول يطالعوني






المشكله اني من قبل لا اتزوج وانا احب الاطفال

يعني مو عشاني متأخره



الحمدلله رب العالمين



كل جلسه اجلسها مع حريم كل السالفه عالجتي ماحملتي الله يرزقك وغير نظرات الشفقه والرحمه اللي اكرهها


حتى شغاله عمي تقول ان شاء الله انتي في بيبي مدري وش درّاها :)




بس الحمدلله صرت لله اقرب


وكل شئ مكتوب من عند ربي فوق



الله يرزقكم يابنات ويرزقني يارب العالمين





<-- تعبت :(

انا صار لي 11 سنه ماحملت والكل يدقني واهل زوجي قطعوني مره وحده حتي جاريني معاد اشوفهم
من كثر الدق الي جاني حتي حرمة اخويه تقول لي البيت الي مافيه اطفال ماتدخله الملائكه قدامي والله اسوي
ياااااااااااااااااااااااااااااااااااااارب يصبرني ويصبركم يااااااااااااااااااااااااااااااارب

:o
نعم نعم خير ان شاء الله من وين جابت هالفتوه البيت الي ماتدخله الملائكه بيت الفساد والتماثيل والمعاصي ياكثر البيوت العامره بذكر الله ومافيها أطفال وربي تخسين بالسكون عندهم و الروحانيه وما ودك تطلعين من بيتهم وياما بيوت فيهااطفال بالدرزن وماتقدرين تجلسين فيها 10دقايق :06:من الأخلاق والتربيه والنفوس الزفت ,,, ترى هادي اسمحيلي يا غبيه :hahaha:ياخبيثه وفي الحالتين ربي يعينك ويرزقنا بالي يشرفون دين ودنيا ياااااارب...