تأخر بعد تأخر,,محد بيحس فيني غيركم

السلام عليكم,,

ترددت كثيييير قبل ما اكتب الموضوع لكن اريد حد يسمعني ويحس فيني لاني ما اقدر اتكلم مع احد قريب
مني,,

عانيت من تأخر الزواج وكنت مسنترة في هذا القسم وادعي وأتأمل وابكي وانتوا داريين وحاسين ومافي داعي اشرح لكم معاناة تأخر الزواج خصوصا ان ثنتين من خواتي اتزوجوا قبلي ووحدة منهم حملت,,

والامر والادهى اني بعد زواجي بعد التأخر انتظرت كأي زوجة اني اكون ام لكن انتظاري طال وطال وطال ورجعت لي نفس الهواجس حق معاناة تأخر الزواج وفقدت الثقة في نفسي حتى احس نفسي بشعة وكبيرة كل ما اشوف نفسي في المرايا,,مش عارفة انام ,,مش عارفة اشوف الحوامل,,اختي جابت اثنين وهي اصغر مني بعشر سنوات واتزوجت بعدي بعشر شهور,,اذكر بولادتها الاولى كنت ابكي ابكي ابكي بحمام المستشفى وكنت اتأمل اطلع حامل في نفس هذاك الشهر وسمعت كلام زي السم وشفت نظرات شفقة,,وبعدها بتسع شهور تقول لي امي ان اختي حامل مرة ثانية ومافي داعي اشرح لكم حالتي النفسية خصوصا ان كنت اراجع وقتها عند دكتور قال ان انابيبي مسدودة وهي سليمة ,,ومابشرح لكم عن كل اللي حضرت اعراسهم وكل اللي اتزوجوا بعدي وحملوا,,عملت عدة محاولات وعمليات على امل حصول حمل لكن ماحصل,,تعبت نفسيا وجسديا رغم انه مافي شي يمنع الحمل سواء مني او من زوجي ورغم انه اللي كنت عارفة ان عندهم مشاكل حملوا ماشاء الله من اول شهور,,

اخر شي وانا قريب بكمل اربع سنوات زواج-واللي احس كانها كابوس لاني ماتهنيت فيها ولافرحت-قررنا نعمل اطفال الانابيب وقلت لامي بعد العملية ان الدكتورة قالت انه احتمال في حمل,,وكنت ببكي وانا اقول لها هذا الكلام وكتمت موضوع العملية عن كل الناس وكنت ملتزمة بالادوية والدعاء وانتظر الايام بشغف لغاية ماجا يوم التحليل وانهارت احلامي,,انهار كل شي فيا,,حاولت ما ابين لزوجي كثير واضحك احيانا وابكي بيني وبين نفسي,,كان التحليل قبل دوامي بيوم,,رجعت للدوام وكل البنات اللي اتزوجوا اخر شهور حوامل وكروشهم قدامهم,,حتى اللي اتأخرت سبع سنين حامل واكتشفت بعدها انها قريب بتولد وهي جالسة تقول لي انها في نص الحمل! بدت المدارس وزميلاتي اللي في عمري واصغر مني راحوا معرض يشتروا اغراض المدارس,,اشوف عيالهم لابسين الزي المدرسي وفرحانين بالكتب والاقلام والالوان واشوف زميلاتي يتكلموا عن التربية والتدريس وانا لاهنا ولاهناك دمعتي في عيوني اخاف تنزل وتفضحني,,مالي نفس في اي شي,,حاسة ان دعائي غير مستجاب,,اتوقع اني امر بحالة اكتئاب وافكر اروح لدكتور لكن ما اقدر ومش متخيلة,,اصحى بدون نفس كل يوم,,بلغت بدري قبل كل البنات وتعبت وانا اربي اخواني واذكر ان اختي الصغيرة كانت تقول لي ماما من كثر ماتعلقت فيا لكن اختي الثانية فهمتها انها ماتقول لي ماما لاني مش امها,,انحرمت من كلمة ام حتى لو كانت مزيفة,,كرهت اروح لاهل زوجي لان سلفتي كان معاها ولد اول ماكملت تسع شهور زواج والكل طاير فيه,,حاسة اني ناقصة اني مش انثى وما استحق اكون زوجة ومستحيل اكون ام,,انا اكبر من زوجي بخمس سنوات وصرت اشوفه صغير وشاب وانا اللي الشعر الابيض ملا راسي,,ادخل الفيسبوك حقه الاقيه حاط صور اطفال وعبارات لاتحرم حد الذرية الصالحة,,زوجي اللي يبين لي انه مو هامه الموضوع يجرحني وهو مايدري,,تعبت تعبت تعبت حاسة بغصة في حلقي ودموعي معلقة في عيوني ماتصدق اني اكون لوحدي عشان تنزل,,