تأخر حمل بسبب القيصريه

السلام عليكم ورحمة الله وبركاته


أخبارك ياحبيبات❤️


بدخل بالموضوع سريع ...
أنا ولدت طفلي الاول بعملية قيصريه وتأخر حملي بعدها ٤ سنوات .... طبعاً سويت تحاليل هرمونات متابعة تبويض ،، أشعة صبغه ووووو........ كلها تمام




المهم أخر شي ركزت بنقطه وقلت ممكن ذا السر المفقود !!!، وهو كنت لما أسوي سونار داخلي يطلع شي الاسود في البطانه ماأدري وش ..ماأحد من الدكتورات أعطى الموضوع أهميه ... كانوا يقولوا عادي((مع العلم المنطقه اللي أنا فيها مافيها مراكز مختصه بالعقم كلها مستوصفات عاديه ))،،


المهم نكممممل مره رحت دكتوره مصريه عاديه جداً بمستوصف عادي مو متخصص بالعقم قلت لها عن ذا الشي وأيش تتوقع يكون قلت لها ممكن لحميه قالت لاااا اللحميه تطلع بالسونار بيضاء مو سوداء .... قالت ممكن القيصريه ماتقفلت صح !!!😨😨😨😨وشووووو .. أستغربت أول مره أسمع كذا!!! قلت كيف وش السالفه وكيف أعرف
قالت مالك إلا تسوي منظار رحمي وتعرفي وش ذا الشي لانه مستحيل نجزم بالسونار... المهم وطلعت من عندها
وسافرت الرياض و رحت سويت منظار رحمي في ذريه بالرياض عند الدكتور طارق بغدادي .... ولما خلصت جاني قال عندك ( جيب في القيصريه) 😶 يعني العمليه القيصريه جزء من الجرح اللي داخل الرحم ماقفل صح .. وكون زي الجيب أو الجيب يسمونه( دفكت) بالانقلش ...
ورحت بحثت بالنت وماخليت بصراحه تعبتتتت لانه مافيه أي شي عنه شي شبه غااااااااامض وماحد يعزفه تواصلت مع أطباء سعوديين بالتويتر ،، الانستقرام ،، الكل يقول ذا شي نااااااادر وقليل يمكن ٢٪؜ يصيبهم من النساء اللي يسووا قيصريه ،، وماعليه أبحاث وشي جديد!!!


🔴 وذي زبدة السالفه اللي راح أتكلم عنها اللي هو الجيب في القيصريه ،، المصريين يقولوا لها ((النيش في القيصريه))
طبعاً راح أنبه كل متأخره بالحمل بعد قيصريه ممكن يكون بسبب ذا الشي...


طبعاً ذا الشي ممكن بشكل كبيييير يسبب تأخر حمل غالباً وبعضهم يقول لا بس الاغلب أنه يسبب تأخر حمل لانه يسبب سوائل في الرحم وماتلتصق الاجنه في بطانة الرحم لانها ملتهبه ..وممكن الحيوانات المنويه تدخل فيه وقت القذف وماتكمل رحلتها للتخصيب...


**أعراضها**

*ألممممم في الجماع
*كثرة التبول
*ممكن ألم في الدوره ونزيف
*ألممم في الرحم وأخر الظهر
*نزول كدره أو دم حتى بعد الطهر من الدوره بأسبوع أوأسبوعين وغالباً يكون وقت التبويض .. لان الجيب ذا جمع دم من الدوره ومانزل وقت الدوره فنزل بعدها
........وغيرها كثيييييير تختلف من وحده للثانيه ممكن يكون عندك عرض واحد وممكن أكثر ....




**أسبابها***



*ممكن الخياط ماكان صح وقت الولادة القيصريه
*ممكن ألتئام الرحم غير جيد كذا من ربي
*.....وغيرهاااااا...


**علاجها**

للأسف ماله علاج إلا بعمليه جديده يتقفل فيها الجرح صح ... هو منظار بطني + منظار رحمي ... وأحتمال كبير يتم فتح البطن يعني قيصريه جديده .... طبعاً ينشال اللي حوالين الجرح ويطلع ويرحع نخيط على خلايا جديده ...


**مضاعفاتها**
*ممكن حتى بعد تقفيله مره ثانيه بعمليه ممكن مايقفل صح وترجع نفس المشكله
*ممكن تصير مضاعفات أي عمليه ..ألتصاقات /جرح مثانه ...ألخ الله يكفينا وياكم كل شر
*إذا صار حمل بوجود ذي المشكله سواءً طبيعي أو حقن .. أحتمال أنفتاح الجرح واااارد ...
*لازم تكوني تحت الملاحظه مجرد ماتحملي وعندك ذي المشكله..




طبعاً فيه دكاتره يقولك عادي أحقني زي الدكتور طارق قالي سوي حقن وفيه مريضات أعرفهم لما كنت بفرنسا عادي حملوا مع وجود ذا الشي بس كانوا تحت الملاحظه وولدوا عادي...
وبعضهم يقولك لازم يتصلح ذا الجرح (زي الدكتو بندر العبدالكريم)) لانه ماتثبت الاجنه حتى بالحقن لان الرحم فيه سوائل... ورفض نهائي يسوي الحقن وقالي سوي العمليه وصلحي الجرح وتعالي ..


طبعاً أنا حبيت أفيدكم لانهبعد البحث والتعبببب أخذت ذي المعلومات لانه أغلب الدكاتره السعوديين ماعندهم خلفيه واضحه عن ذا الشي يقولك شي نادر..بس الدكاتره اللي برا زي المصريين والاردنيين يعرفوا ذا الشي وعندهم كثير كذا ..
و بعد البحث أكتشفت أنه أرتفعت النسبه٥٠٪؜ من اللي يسووا قيصريه يصير لهم ذا الشي ...
بحط لكم فيديو حلقه راح يفيدكم مرااا وياليت تقفلووا الموسيقى اذا جت لاني لاأحلل ولاأبي أحمل أثم أحد والله على ماأقول شهيد..






وفي الختام أطلب من الاداره تثبيت ذا الموضوع لانه شيه شي غير معروف وياليت الكل يتوعى بذا الشي اللي أخذ مني سنين حتى عرفته ...
وأطلب منكم ياأخواتي تفيدوني أللي صار معها نفس الشي وأيش سويت لان محتااااره أسوي العمليه أو لا😭😭😭🥺