تاخر الحمل - انصحوني !!!

السلام عليكم و رحمة الله و بركاته اخواتي العزيزات...
انا توني منضمة كعضوه جديده للمنتدى , و حبيت اشارككم قصتي و نتعرف على بعض - و اسمع نصايحكم و كلامكم الايجابي 3>
انا تزوجت في نهاية 2017 ... و وقتها كان عمري 27 سنة ... و من البداية ظهرت عندنا مشكله - العلاقة الزوجية مع زوجي كانت غير مكتملة و فيها مشاكل.
يعني في يوم عرسي ما صار شي - و قعدنا بالفندق 3 ايام و بعد ما صار شي...طبعا ما اقول لكم نفسيتي شلون كانت في ذي الفتره / حتى اهوه ...و المشكله ما كانت مني...المهم رحت شهر العسل و كان في محاولات بس مو دايما و ما كانت ناجحه. هاي الشي سبب لنا مشاكل هناك - كان يعاقبني كان على شي ما لي دخل فيه ,,, يعني يتم ساكت او كله بروحه و انا ما اعرف شنو لازم اسوي و في اخر يوم من السفر - و قبل لا نرجع ديرتنا الله كتب و صار الشي - و كانه كان هم على زوجي و انزاح.
و بعدها مرت سنه 2018 و العلاقه كانت مو منتظمه - يعني في الشهر ممكن مرتين او 3 . رحت حق مستشفى متخصص للخصوبة و تاخر الحمل عشان نسوي فحوصات انا و زوجي.
التحاليل طلعت طبيعيه لنا الاثنين و انا استحيت اقول للدكتورة ان العلاقه اللي بيني و بين زوجي قليله, وقتها ما كنت اعرف ان ذي الموضوع له دخل بتاخر الحمل، يعني في مفهومي اذا صار في علاقه يعني يصير حمل ... و ما كنت اعرف اوصل لزوجي ان الموضوع يزعجني او احتاج شي اكثر ، و في ذي الفتره صارت العيون تتجه لنا و الكل يسال متى نشوف عيالكم - خصوصا من صوب اهله و انا ما عندي رد لهم غير (ان شاء الله اذا ربي اراد) و هذي الصح و النعم بالله. و اخوه الصغير في ذي الفتره تزوج و ربي كتب لزوجته و حملت ... ف شنو تتوقعون صار؟ بالضبط ... زادت الضغوطات و الكلام و التلميحات...
المهم ان جربت في ذي الفتره الكلوميد و تفجير البويضات - كان تقريبا شهر 4 من ذيك السنه و كان ذي الموضوع على حسابي - و كنت اتعنى للدكتورة في اخر الدنيا حق الابر و المواعيد و الدكتورة حددتلي يومين للجماع ... بلغته ان هالشي مهم و لانه يومين الموضوع المفروض يكون سهل - و لكن العكس كان صحيح يعني كان صار في ضغط من صوبي عليه و ما قدر يتم الموضوع في و لا يوم منهم ، بس اليوم اللي قبل و اخر يوم ... و ما صار حمل.
انا انهرت يومها اتذكر كنت اصيح من قلب - مو بس على ان الموضوع ما تم - كنت اصيح على روحي و اتذكر شكثر ضغت على روحي و اسوق بالسياره بروحي و ادفع و الابر و الادويه و الالتراساوند ... من صوبي حاولت وايد. و شوي هالفتره صار بينا شويه حزازات على الموضوع. بعد فتره فاتحت امي بالموضوع و قامت قالت لي لازم يروح زوجج حق دكتور متخصص بالمشاكل الجنسيه.قررت اني اكلمه و فعلا فاتحته بالموضوع و اهوه وعدني انه يروح. (وعد) و لكنه ما راح ... كان ياجل الموضوع وايد.
و في مره من المرات تقريبا شهر 10 من سنه 2018 و انا رايحه للدكتوره عشان موضوع الحمل - بحاول مره ثانيه ، فحصتني الدكتوره و الا تقول لي عندج تكيس خفيف - صدمتني ! لاني في ذي الفتره كلها ما قط قالت لي ان عندي تكيس (و كل ما وحده تسالني عندج تكيس اقول لا الحمد لله). من متى فيني؟ متى صار؟ شنو الموضوع؟ قالت لي تتعالجين عنه ؟ شلون اتعالج عن شي و انا ما اعرف انه فيني ؟؟؟؟ بعدين انا ايي لج طول الوقت و انتي دكتورتي - من بيعالجني عنه مثلا؟ ما عطتني شي يبرد قلبي و قررت وقتها اني اغير الدكتوره (مع العلم ان الدكتوره تعتبر ممتازه و عليها ضغط من المواعيد و الدخول لها غالي).
بس انا حسيت انها خذلتني و ما كانت امينه معاي - و هذي كان احسن قرار سويته بحياتي.
رحت حق عيادة تروح لها اختي، هالحجي شهر 12 سنه 2018 ... الدكتورة الجديده كانت احسن بمليون مره - تعطيني تفاصيل و تشرح لي كل شي ...
بينت لي ان العلاقه الزوجيه لازم تكون اكثر عشان يصير الحمل (بكلامها قالت لي اللي يصير بينج و بين زوجج هاي نسميه مانع حمل طبيعي - يعني ما ينفع) و عطتني ارقام حق دكاتره ممكن زوجي يروح لهم و عطتني كلوفاج و فوليك اسيد عشان التكيس - و قالت لي انه خفيف و يروح مع الحمل باذن الله...و زوجي راح للدكتور بعد ما قلت له كلام الدكتوره - حرك شي في داخله و صار الموضوع احسن بفضل الله ...
احنا الحين في شهر 6 من 2019 ...
انا للحين مو حامل
- الحين لازم انظم دورتي الشهريه
- التكيس الخفيف لازم يروح (الوزن الزايد اللي اكتسبته في ذي الفتره من حياتي لازم يروح)
و ربي كريم ... ان شاء الله يرزقني
انا الحين عمري 29 سنه ... ابي احمل صراحه ... شنو تنصحوني اسوي ... احاول اسوي رجيم هالفتره (مع اني فاشله بالموضوع) وزني 74 كيلو على طول 155 سم ... ...و اخذ الكلوفاج مع الفوليك اسيد ... بجرب كلوميد هالشهر اذا ياتني الدورة ...و ممكن الشهر الياي و افكر في اطفال الانابيب على السنه اليايه يمكن ...
جربت القسط الهندي / ما التزمت عليه طعمه مو حلو ... بس ممكن اجربه مره ثانيه (عندي واحد من 2018 / اشتري غيره وله استخدمه نفسه - من الحواج)
احتاج نصايحكم - و شكرا حق وقتكم بنات ...ما قصرتوا