وشلونكم....وشلون اللي يعز عليكم...عساكم بخير....
والله حنا بخير....وبأتم نعمة....(ماسألناك)...
المهم ...عزيزاتي...مرة من المرارير....سيرت علي القصيمية....وجايبة حقي من العراجين....فهليت ورحبت بمرة أخي...
طرت اجيب القهوة والحلا....وعلى ذكر الحلا القصيمية جايبتن معه حلاو جالكسي....
حطيت القهوة....وهاك سوالف...
قلت للقصيمية بعد ماخلصنا قهوة قومي صلي وانا بدش المطبخ أبسوي حلا لحمولتي...بكرة موعد طلعتنا...
قالت القصيمية لا وش دعوة ادش معك المطبخ وأسوي معك الحلا وبعد ماانخلص نصلي سوا....
بنت نشاما...
دشيت المطبخ ... وبديت اجهز الأغراض للحلا....قالت القصيمية:بكرة حمولتي نبي نطلع حنا وياهم...وودي اسوي حلا (اهب يالنغر)...اثاري فزعتس عن سنع....
قلت خلاص اسويلك زي الحلا اللي انا ابسويه...بس ابشرط اتسبعين المواعين:angry:...قالت: تكرم عينك..
وهذي صورة جماعية لحلا تالا دلع والقصيمية...
هااااااااااااااااه عساه عجبكم......أكيد مادام انه من يديني راح يعجبكم....وأكيد تطلبون الطريقة......راح انزلها بالخطوات المصورة...
أول شيء:
كيك امريكان سسرول...مقطع ويصف بالقاع..
الطبقة الثانية::
علبة ونص قشطة/علبة ونص بسكويت الشاي مطحون/ظرف ادريم ويب/ظرف كريمة
وعلى فطنة نسيت أقولكم ونص علبة حليب نستلة مركز محلى..(نسيت اصورة مع اصحابه).
نخلطهم سوا ونصبهم ع الكيك..
بعدين 2 حبة جالكسي (مذابة في حمام مائي) تخلط مع نص علبة قشطة.
نصبها على الخلطة السابقة..
بعدين نجي للتزيين وهو الأهم...
تكونين طاحنة (بسكوت الشاي ــــ بسكويت أوريو ـــ بسكويت الجوزية)..وتبدئي بالتزيين بهاطريقة..
وهذي هي النتيجة وبالعافية عليكم...
أتمنى تعجبكم..