تاله حبيبتي

السلام عليكم حوائيات
انا اليوم رح احكيكم عن قصه حصلت معي من سنتين وللان مثاره في مع انو الحمد لله مؤمنه بقضاء الله وقدره ولكن مازالت نفسي تتكلم معي وتسالني كثير

انا قبل سنتين بالضبط 2008 في اغسطس ولدت الحمد لله بنتي الثانيه ( تاله) حبيبتي
اكيد تعرفوا معنى تاله اللي هوا النخله الصغيره
كانت الحمد لله كويسه وصحتها تمام مع انو وزنها صغير 2 و 200 غرام بس عايدي اتعودت على هادي الاوزان بناتي كلهم كدا
المهم بعد ولادتها بشهر اكتشفت اني مريضه واحتاج عمليه سريعه ( بواسير وشرخين)
رفضت لاني كنت ارضعها ولاني كنت تعبانه وتوني خارجه من عمليه قيصريه

بعد هادا الموضوع اتخاصمت انا وزوجي زي اي زوجين بس انو الموضوع مره ضايق زوجي فقالي بالحرف الواحد لا تكلميني فتره الين ماارضى لانك انتي من النوع العنيد ولازم تمشي كلمتك
المهم طنشته ( طبعا لازم تعرفوا انو هادا اسلوبي ) طبعا بعدها جلست اعاني في بيت اهلي لعده اسباب رضاعه طبيعيه والم جسدي وضيق في نفسيتي وكمان انو عارفين الهرمونات بعد الولاده كيف تلخبطنا احنا الحريم

بالضبط يوم 18 اوكتوبر نفس السنه كنت جالسه اطل في بنتي تاله واقول انتي يابنتي العوض ان شاء الله
لانها كانت اكثر من هادئه اقسم بالله اهلي موم مصدقين انو في بيبي في البيت من كثر ماهي هاديه

ثاني يوم الاحد 19 اوكتوبر لمن كملت بالضبط شهرين صحيت الصباح وكلمت السواق قلتله لمن ترجع اخواني اليوم من المدارس استناني لاني ابغا اروح المستشفى ( ابغا اطعم تاله)
كانت الساعه 6 ونص الصباح دخل بابا الغرفه عندي سلم عليا وسلم على بنتي وقالي بالحرف الواحد ياحبي لهده البنت
المهم رضعتها وجلست تلعب وبعدين نمنا وصحيت الساعه 11 رضعتها و خرجت من الغرفه ورحت المطبخ سويت لنفسي كوفي وجلست اشرب مع ماما واتصلت عليا اختي من الكليه قالتلي انا عازمتك على الغدا اليوم برا البيت موافقه اعتدرتلها قلتلها بكره لاني انا رح اخد السواق واطعم بناتي ( تولين 2 سنه و تاله 2 شهر)
المهم وصلوا اخواني من المدارس فرحت الغرفه اخد بنتي واختي الصغيره ( 18 سنه) معايا تتكلم معايا وانا رايحه الغرفه وفجاه اول مادخلت الغرفه ( اقسم بالله ) حسيت قلبي مقبوض رح قربت ناحيه بنتي واتفاجات من شكلها كان وجهها ابيض بس حسيت انو مافي روح في وجهها على طول صرخت لاختي افتحي الضوء وانا قربت على فمهها ابغا احس نفسها وعلى طول سرت زي المجنونه ادور على نبض
مااااااااااااافي
وطبعا بحكم اني اشتغلت فتره في المستشفى بحكم تخصصي عرفت انها ماتت
بس جلست اصرخ على اختي اقولها بسرعه جيبوا الدكتور واحاول اعمل انعاش لبنتي
امي جات على صوتي العالي واخوي كمان ( 17 سنه)
والله يابنات ماحسيت بشئ بس كنت زي التائهه ابغا اعرف اش اللي صار بسرعه لبست عبايتي وماما معايا واخويا ( الله يسعده)
ونزلت للشارع وانا اقسم بالله شايلتها واجري في الشارع عقلي مايفكر بسرعه بعد كدا حصل الباقي
خرج السواق وشلنا البنت لاقرب مركز طبي
ودخلنا جري للطؤاري طبعا انا بس اصرخ واقول للدكتور مافي نبض وماتتنفس بسرعه اعمل انعاش قلبي رئوي بسرعه جيبوا الجهاز الكهربائي بسرعه طبعا كل كلامي مع الدكتور بالانقلش
جابوا كل شئ وسار الدكتور يقولي انتي امه اخرجي الان من الغرفه وانا اقوله لا انا عارفه انته اش رح تعمل
قام قال لاخويا خرج اختك الان
وماما جلست مع الدكتور
وانا بره في السيب ابكي والله بدا الناس يتجمعوا على صوتي والدكاتره ساروا يجروا
واخويا يحضني يقولي ان شاء الله انها بخير بس انتي اهدئي وادعي
فجاه ماما خرجت من الغرفه وجات لمن عندي وجلست جنبي وسارت تمسكني بكل قوتها وتقولي
يابنتي الله اعطاكي والله اخد الله عليه العوض اقسم بالله انها كررتها اكثر من عشر مرات وانا ماني سامعه ولا شايفه شئ وعقلي يقول دحين رح يخرج الدكتور ويقول خلاص تم انعاشها

الين فجاه جات حرمه جنبي وتقولي عظم الله اجرك
اقسم بالله طاح جبل فوق راسي وقمت بكل هدوء ورحت للغرفه والدكاتره متجمعين حولها وقلتلهم بعدوا وجلست على السرير وشلتها بين يداتي وجلست ابكي واقولها والله احبك ياماما وكان ودي يومي قبل يومكم يابناتي
طبعا من الفجعه سرت ماسكتها وانا بس ابوسها واقولها انا ابغاااااكي ياتاله وكل وجهي بكا
واخويا جالس على الارض بس يبكي وامي فرشت سجاده في الغرفه وصلت ركعتين لله
والله يابنات اني افتكر المنظروابكي واني حسيت نفسي ساعتها في فراغ ورجولي ماتشيلني
اتصلت ماما وبلغته بالوفاه واتصلت على زوجي وبلغته
طبعا تخيلو انو انا من يوم ماشفتها في البيت قبل لا نخرج اتصلت بزوجي في العمل في الشرقيه وبلغته
قلتله اني حاسه انها اتوفت
بس ماما في المستشفى اتصلت عليه واكدتله الخبر
فجاه المستشفى كلها اهلي خالي ومرته واخوان زوجي وابويا واختي

خلاص حبيبتي تاله انتهى كل شئ وشلتها للبيت تخيلوا بعد ماتكون انسانه حيه ادخل فيها بيت اهلي وهيا جثه
انتظرنا زوجي جاء من الشرقيه العشاء وثاني يوم الفجر اندفنت
تعرفوا اصعب شئ انك تشيلي طفلك وتغسليه وتكفنيه ( خالاتي وامي والداده عندي واخواتي كلنا نغسلها ونكفنها)
بعدين كلهم خرجوا من المكان وجلست انا وهيا وزجي عندها
سلمت عليها وقلتلها ياتاله انا استودعتك الله الدي لاتضيع ودائعه ان شاء الله يابنتي انك رايحه مكان احسن وعند ربنا الاحن مني عليكي
والله يابنات بعد ماقلت هادا الكلام طحت على الارض وبعد ماشالوها الرجال رحت صليت ركعتين حمد وشكر لله بس والله اني ماني عارفه اش اقول
عارفين يابنات ربنا الحمد لله عوضني بعدها باشياء كثير زي دراسه الماجستير وببنوته حلوه عمرها الان 3 شهور

ودائما اقول لنفسي عندي نخله صغيره في الجنه ان شاء الله تستناني انا وابوها

اللهم اجعلها شفيعه لي يارب العالمين وارحمني برحمتك