بسم الله
هذا ياطويلات العمر قبل اسبوع بالضبط ولدت يعني الثلاثاء اللي فات وجبت بنوته تزنن وعقبال اللي يبون عيال والكروشااااات
طبعا انا وحدة لا حملت احب التسدح والتبطح بالمستشفى ولازم اعبر البحور السبع عشان اولد
وطبعا هذا حملي الثاني ومو احسن من حملي الاول وكل واحد قصة
على العموم السالفة الاهم بحملي هذا ابرة الظهر اللي ولدت بدونها لان بحملي ا
لاول كنت ماخذتها ومو دارية عن ربي وين حاطني ولاده سبع نجوم رااااااحه
وقلت لازم بحملي هذا اخذها لان الحريم يختلفون ودرجات في الصبر وانا وحده صبورة بس لما جربت الطلق بحملي الاول استخفيات
والحمدلله على كل حال وطلبتها وتخدرت ولاعاد حسيت بشي وقلت لازم بحملي هذا اخذها
على العموم اول يوم بالتاسع تعبت لاني ظليت واقفه مع ولدي 20 ساعه بالتمام والكمال بالطواري كان تعبااااااان وشلت همه ولاقدرت اصبر
واروح البيت ارتاح واليوم الثاني بعد ماطلع ولدي جااااااني الطلق واطلللللللع من البيت على المستشفى وقالت لي الطبيبه عندك ولادة والرحم 2 سانتي
ورفضت اولد عندها قالت لازم توقعي على مسؤليتك الخروج وقلت عاااااااادي بس اهم شي اخذ ابرة الظهر واطلع من المستشفى بالخرج على العسكري
بالرياض وفعلا وصلت وكان الطلق حامي بالطواري وكتبت لي الطبيبة ابرة الظهر وطلعوني فوق للولادة ودخلت وسووا لي فحص وكان 3 سانتي
وقالوا لازم تخلصي 3 مغضيات عشان مايهبط الضغط لكن للاسف فجأااااااة توقف الطلق نهائيا وهبط عندي الضغط وقالوا خلاص مافي ولادة
ورقدوني يوم عندهم تحت الملاحظه وبعدها مرت اسبوعين وانا طلق بسيط يجي ويروح وبرغم سفر زوجي المفاجئ وحالتي النفسية
وكنت مره قلقانه ما ابي اولد وزوجي مو عندي برغم اني عند اهلي بس هو الغالي ورجع زوجي يوم الجمعه واخذني يوم الاثنين للبيتنا بالخرج
طبعا لي اسبوعين عند اهلي وصرت انظف بيتي ولميت شوية اغراض قلت بحتاجهم بنفاسي وفعلا جهزت كل شي وانا تمام التمام ونمت ذاك الاثنين
وصحيت بدري الساعه 8 الصبح وافطرت انا وزوجي والساعه 10 قالي بنام شوي وانا بصراحه حسيت بنغزات وقلت يمكن اتوهم انه طلق
واخذت لي دش دافي واستشورت شعري وسويت لي قشر قهوة وشربت وجلست اطقطق على النت وبعدها تقريبا الساعه 1 ونص جلست السولف
على التلفون مع خالتي وبدا يزيد الالم ويزيد وصارت الساعه 3 تقريبا وقلت لها خلاص ياخاله بسكر تعبت من الجلسه ودي امشي شوي
لان معي الام وامكن طلق وفعلا بس سكرت ومشيت شوي زااااااااد الالم وزااااااد وصحيت ابو الشباب وفز على حيله الحمد لله كنت
مررررره متصبره واتنفس شهيق وزفير واذكر ربي والله يابنات انه الم صح قوي بس لما اذكر ربي كل شي هان على ياسبحان الله
وقلت لزوجي البس انت وشيل الاغراض اللي جهزتهم للسيارة وشنطة المستشفى وانا بنزل قبلك بمر على جارتي اللي تحت اسلم عليها
واخذ منها شوية اغراض لي وفعلا انزل بسرعه وبس فتحت لي الباب صادني الالم اقوى والسبب الدرج واخذت اغراضي
رحت اولا لدكتورة في مستوصف خاص قلت بتاكد ولاده او لا سوت لي فحص وبغت تنجن قالت بسرعه على المستشفى لا تتاخري
وياليت تروحي عسكري الخرج قلت لالالالا انا ابغى ابرة الظهر لازم بالرياض وكان 4 سانتي وطلعتني الممرضة لزوجي وقالت
لازم تعدل مقعد السيارة وحاولي تنسدحي على جنب عشان يخف الالم وقلت طيب وفعلا طلعت من الخرج وهو ياذن المغرب ووصلت
الرياض بعد ثلث ساعه ومن دخلتي للرياض الين المستشفى نص ساعه يعني الوقت كله ساعه وزوجي كاااااان مسرررررع ودخلت
الطوارئ وهنا صار الالم اقوى واقوى لدرجة ماقدرت اغير ملابسي فجات دكتورة سعوديه غيرت لي ملابسي والممرضات اللي عملت
التخطيط واللي ركبت المغذي وقالولي الرحم 5 سانتي وصرت اقول ابرة الظهر لان اذا وصل 6 سانتي بعدها مايعطون لان مفعولها
يخف وفعلا طلعوني قسم الولادة وقالولي لازم تخلصي 3 مغذيات وخلص الاول ولما ركبت الثاني جات امي الله يطول بعمرها وصارت
تذكرني بربي وماسكه لي الاكسجين ويدي وتحبحب فيها وانت قويه وكل شوي تقول للممرضة يالله حطولها الابره بنتي ماتتحمل قالت
الممرضة اول اسوي فحص بعدين الابرة ولما سوت الفحص قالت 8 سانتي انا انهبلت معقوله 8 وماصار لي نص ساعه في كشك الولاده
قالت مافي ابرة ظهر وحاشني الخوف وضعف الحيلة ووكلة امري لله ثم لامي بوجودها خففت عني الكثير وفكة موية الراس وسبحان الله
نزلت الموية والبنت معاها ماشاء الله تبارك الله ووالله ساعه وحده بس صح كان فيها الم بس وربي هانت وصح معنوياتي كانت زيرو
بس ربي سهلها وربي يابنات اسال زوجي اقول متى بشرتك اني ولدت قال بعد صلاة العشى يعني بالضبط ساعتين ساعه وانا بالطريق
وساعه وانا بالولادة والله تذكرت طول فترة حملي وانا اقول اللهم استودعتك هون الطلق وفعلا ربي ماخيبني وولدت بدون ابرة ظهر
والكل انصدم معقوله تحملتي الالم وبدون ابرة لان اللي حولي شايفيني مررررره ماتحمل شي واولهم ابوي الله يطول بعمره يقول لو
ماتاخذ الابرة بنتي امكن تموت والساعه 8 دقيت على جارتي وقلت لها اني ولدت وانصدمت قالت لي الساعه 4 ونص كنت عندي انت
تلعبين على ووالله ماصدقت الين رجعت اكلمها تقريبا الساعه 12 بالليل وسمعت صوت البيبي وصدقت
وهذي قصتي بدون ابرة ظهر والحمد لله والله يخلي لي عيالي وزوجي يااااااااارب وعقبال كل الحوامل يارب
حبك عوض غيابك @hbk_aaod_ghyabk
عضوة نشيطة
يلزم عليك تسجيل الدخول أولًا لكتابة تعليق.
الف مبروك على البنوته
والحمد الله على سلامتك يابنت ديرتي والله فزيت وانا اقرا الخرج
لبى العرب بس
والحمد الله على سلامتك يابنت ديرتي والله فزيت وانا اقرا الخرج
لبى العرب بس
الصفحة الأخيرة
اسأل الله يرزقني ولادة ميسرة بحولة وقدرتة