الحمد لله على سلامة اختك ام القمر
شمعة حياتي
الحمد لله على سلامتك ويتربى بعزكم البيبي

جيتكم بالاكشن يا بنات
الولاده تأخرت عن الموعد حسب حساب الدوره والسونار
بس بحسابي ما اعتبر نفسي متأخره
بعد ما عديت الموعد حولوني ع قسم الولاده حتى يعملولي فحوصات
رحت بتاريخ 31/3 وانا حاطه ببالي انه يعطوني اسبوع مهله مع المتابعه
دخلت ع الدكتورة قالت مجرد فحوصات وبتطلعي لأنه اليوم هو أول يوم من التأخير حسب السونار
انا فرحت وخبرت زوجي ينتظرني
سوتلي فحص داخلي الرحم فاتح 1 سم بس .. هذي اول صدمة لي
قلت يالله أهم شي اطلع من عندهم متطمنه كل شي تمام
وقت التخطيط .. تشوف النبض والطلق اذا موجود
النبض الحمدلله زين .. لكن ما فيه طلق ابدا .. وهذي ثاني صدمة لاني كنت أحس بتحجر وطلق جدا خفيف
يللا الحمدلله للحين كل شي تمام وراح اطلع من عندهم
جاء وقت الأشعة .. الرأس تحت وضع المشيمة والجنين تمام ويساعد ع الولاده الطبيعيه .. بس مشكله صغيره (الجنين ما شاء الله وزنه شوي زايد واذا تأخرتي احتمال يزيد الوزن وتتحولي للعمليات)
قلت اها بدأ التحطيم عشان اجلس معاهم
قلتها كم وزنه قالت 3.5
قلتلها الوزن عادي ولادتي الأولى كان 3.4
فرحت انه انا اللي حطمتها الحين وحسيت انتصرت عليها 😝
قالت طيب بنشيك الماء .. أوه الماء ناقص عن الحد الطبيعي .. عاد هنا حسيت اني مستحيل اغلبها وارد
انربط لساني وما عرفت شو اقول إلا أني ادعي ف قلبي
قالت لازم نعملج طلق صناعي وما نقدر نطلعج .. انا هنا خلاص حسيت نفسي ببكي .. قلتلها كم ناقص .. قالت المفروض يكون 8 وفوق وانتي معاج 5 وصعب الجنين يعيش ف هالماء راح يتعب وتتأثر المشيمه
قلتلها تقولي وزنه كبير ما شاء الله يعني المشيمه ما متأثره والطفل يتغذى الحمدلله
قالت محد يعلم لبكرى شو يصير
قلتلها طيب انتي طلعيني وبكرة برجع من نفسي
كتبتلي ورقه انه انا أتحمل مسؤولية خروجي من اليوم لبكرى
وقالت س10 الصباح لازم تكوني موجوده
طلعت من عندها وزوجي استغرب من سكوتي وجسمي يرتجف
قلتله لا تكلمني و أبا اروح مستوصف خاص
قال ليش المستوصف وانتي الحين مسوايلك كل الفحوصات
وخبرته التفاصيل عشان اقنعه نروح
رحنا ودخلت ع الدكتوره وخبرتها بكلام المستشفى
قالت كل شي طبيعي معاج والماء ناقص لانج ع نهاية التاسع أو انج مخلصتنه وبعد حجم البيبي ما شاء الله مأخذ كل المكان فشي طبيعي ما يكون فيه مجال للماء
ارتحت من كلامها لكن الخوف موجود داخلي من كلام المستشفى
قالت انا بسويلك تحريض وبحاول افتح الرحم ولا تخافي من كميه الدم والافرازات وروحي إجلسي ف ماء دافي وحاولي توصليه لداخل ونامي مع زوجج
طلعت من عندها وعندي أمل اني أولد نفس الليله أو الصباح
رجعت البيت وانا مقرره ما اروح موعد الطلق الصناعي وعدا اول يوم

ثاني يوم الجمعه
1/4
ما فيه طلق
بدأ الإحباط اني أولد اليوم
وبدأ كلام المستشفى يزن ف اذني
تعبت نفسيتي وانسدت شهيتي
كلمتني أم زوجي وقالت اذا هذي نفسيتج فاحسن تروحي لأن لو ما فيج شي راح يصير بسبب هالنفسيه وقل الأكل
كنت محتاره وما عارفه أخذ قرار
وكنت اتحرك بدون شعور
نظفت رتبت غسلت كل شي نظيف ومستعده اروح المستشفى
سويت كل هذا وانا ما اعرف بروح أو لا
وقت الموعد س10 طاف
صليت الظهر ودعيت ربي والغدا ما اشتهيته
زوجي وأمه ينتظروا قراري
صليت العصر وصدر القرار اني اروح ..
سلامة اللي ف بطني أهم شي عندي
خذت كل اغراضي و ودعت ولدي وخليته مع عمته وانطلقنا للمستشفى
وصلنا قبل المغرب بشوي وع طول ع جناح التنويم
لأنه الحين ليل تأجل الطلق للصباح عشان أكون مرتاحه ونايمه
وطول الليل يعملولي فحص الضغط والحرارة وتخطيط الطلق والنبض
وعدا ثاني يوم ع خير

2/4 يوم السبت
س7.30 الصباح جاتني الدكتوره
الرحم فاتح 1.5
سوتلي اول طلق وعندي مهلة مده 8 ساعات
مر الوقت معي طلق خفيف كل خمس دقايق أو عشر وأحيانا ربع ساعه
ومشيت ومشيت ومشيت وآخر ساعه من الطلق الأول زاد الطلق وحسيت أن الفرج قريب
مرن الثمان ساعات
وجاء وقت التخطيط .. النبض تمام والطلق جدا خفيف لا يعتبر وأقول للدكتورة لا الطلق قوي بس يحتمل قالت ما يبين بالجهاز ونحن نروح ع الجهاز
فسوتلي الطلق الثاني .. س3 الظهر .. وعندي 8 ساعات جديده اترقب فيهن الولاده
نص ساعه من ألطلق الثاني والالم صار لا يحتمل خلاص ما قادره أتحمل
جات الدكتوره و فحصتني الطلق قوي لكن الرحم ما فاتح إلا 2 سم
انا هنا خلاص انصدمت قلتلها نوميني خدريني ما أبا أحس بشي
هالطلق أقوى عن ولادتي الأولى ولا أذكر أني مريت بقوة هالطلق
قالت طيب بعطيج ابره تنومج وما راح تحسي بالطلق وان شاء الله تقومي والرحم فاتح 10
انا تحمست قلتها أباها هالابره العجيبه دخيلج بسرعه
ضربتني الابره مرن خمس دقايق وأنا ما نمت والطلق يزيد يا دكتوره شو المشكله عطيني ابره غيرها عشان انام وشوي اسمع شي انفتح ف رحمي وخبرت الممرضه وقالت الماء نزل
والطلق خلاص وصل حده معي بديت اهذي وأكلم زوجي وعمتي معاي ف الغرفه كلام ما مفهوم من قوة الطلق
ربع ساعة مرت من عطتني الابره .. قالت بفحصج .. الرحم فاتح 5
ما صدجت اللي سمعته وبكيت من الفرحه وأحمد ربي واشكره
قررت الدكتوره ينقلوني صالة الولاده س7.30
وصلت صالة الولاده
والطلق يقوى أكثر وأكثر
وصلت مرحله الدفع .. والقابله تقول لا تدفعي واقولها ما اقدر خلاص الدفع يزيد
تقول بعده ما فتح الرحم اصبري
قلتلها خلاص بيطلع وجات تشيك كم فاتح وشافت رأس الجنين وقالت خذي نفس ولما اقول دفعي دفعي
ودفعت مرتين وطلع ولدي للدنيا س8.10 بالليل
والمشيمه من قوة الطلق تفتت داخل .. والقابله دخلت ايدها عشان التنظيف وحسيت الولاده صارت 10 ولادات مع كل مره تدخل ايدها عشان تطلع بقايا المشيمه
لكن وايد خيطتني لأن الطفل شقني
والحمدلله رب العالمين كلها فتره وإن شاء الله هالالم يروح وانسى كل التعب وافرح بحبيبي الصغير
والله يهون عليكم ويجعل ولادتكم سهله يسيره

صباح الخير ..
كيفكم بطريقات وفقمات 😅
معجزات ونبض ..
الف مبروووووك ماجاكم ويتربو بعزكم والحمدلله ع سلامتكم ..


الحمدلله اليوم لي 27 يوم .. ورجعت بيتي من ثلاث ايام ..
ورياني من امس عنده كحه ياعمري يحزن اذا كح 😔
وانا في جهاااد مع ذا الاولاد .. الله يعين عليهم .. ولايحرمنا الأجر ..


الله يهون عليكم مابقى ويسهل عليكم ولادتكم ..