اكتفاء الف مبروك والحمدلله ع سلامتك


سكره الشنطه شكلها شنطة أطفال ماتنفع للمستشفى صغيره مره حتى الملابس مابتجي مرتبه لان الشنطه نحيفه
اناسويت شنطتي امس حطيت لبسين لي و3 للبيبي طبعا انا عندي يزيد ولا ينقص والوحده ماتدري يمكن تتحول قيصري وتطول
وحطيت لفتين للبيبي ومدس وكففوف وطاقيتين وبطانية بيبي صغيره و طرحه وشنطه فيها الويز وملابس داخليه وموس ومزيل عرق وفرشاه وقلم حواجب


انيقه العموله ذي تاخذها الي تجيب الخدامه وتدخل عندك أسبوع أسبوعين وتقولك مابغى وتعطيها حرمه ثانيه عشان تأخذ 200 ثاني
وكذا يدورون ويكسبون
انا افضل خدامات الساعات وبديت اجيب من الشهر السابع كل شهر وحده تنظيف شامل ويمكن بعدين اجيبها كل أسبوعين والله يسهل


ام التينا جلنار قطرات ندند والجميع الله يسهل عليكم
ام التينا لا تتهورين ب الخروع


ب النسبه للمشد ماينصحونه قبل 3 اشهر او اكثر من العمليه القيصريه انتبهو بنات الا شماغ خفيف

تجربتي
وصلت قبل موعد العمليه بساعه وعلى ماخلصنا اوراق الدخول والتنويم ورحت للغرفه قاسو الضغط والحراره والاكسجين وعطوني اغير ملابسي
وانا بس على لساني القسطره قبل ولا بعد البنج😂😂
بس الحمدالله قالو لي بعد البنج
طبعا انا شايله منطقة البطن قبل اروح لاني ماحبهم يشيلونها
المهم
نزلوني على العمليات وانا بس رجولي تضرب ببعض من الخوف ومن البنج النصفي
دخلت الغرفه لها هيبه مانكر
حاولت ماشوف الطاوله الي جنبي بس غصب شفت لانها اشكال و الوان مقصات ومشارط موديلات طبي وتخيري😂😂
المهم سالوني لاخر مره كنهم مشككين نصفي ولا كامل رجعت قلت نصفي وانا الطم خايفه اندم واحس بكل شي
جلسوني على حيلي وجت دكتورة التخدير
مسحت ظهري بشي بااااارد وحددت الفقره الي بتضرب مابينها وقالت لي ادنق ولااتحرك وممرضه ماسكه يدي تهديني
الحمدالله ضربت الابره وشعور غررررريب فجاءه تثقل وتنمل رجولك كان فيها نمل
وسدحوني
وصار الي كانت خايفه منه نفسي قامت علي ابغى ارجع وعلى طول يعطوني محلول بالمغذي وشي يضربون الابره مباشره بيدي عشان صار عندي انخفاض بالضغط وقمت اعرق كثير نتيجه قلة السوائل والتخدير النصفي يزيد الموضوع وكانو يقولون المفروض قبل تنزلين للعمليات الي بالتنويم يعطونك محلول عشان الضغط
بس الحمدالله تداركو الموقف ووقف الغثيان
علقو الستاره ويسولفون ويسولفون وانا اقولهم تراني احس برجولي يقولون عادي انتي ماراح تحسين باي شي مجرد بتحسين بحركة يدينهم على بطنك وانا لاخر لحظه بتكلم بقول هونت ابي كامل
حطولي الاكسجين مساعد للنفس
ركبو لي قسطرة البول والحمدالله ماحسيت فيها لاني مخدره وذي نقطه مهمه اطلبوها يابنات
بديت احس بيدينهم تتحرك على بطني وشويات حسيت بضغط بيدينهم على اعلى بطني مايالم بس كنهم يمسجونك بقوه وهو اساسا خلاص جالسين يطلعون البنوته
والحمدالله وماشاءالله تبارك اللله يارب على كل شي سمعت صياحها دمعت عيني بهاللحظه يارب ارزق كل وحده ذا الشعور ولاتحرمها
بعدين شالوها وجلسو تبصيم ووزن وتنظيف
وانا طولو طولو بالخياطه حسيت اني طفشت المهم طلبت تجميليه
وطلعوني على الافاقه ومارضو يطلعوني منها لين يخف البنج واحرك رجولي والي جرب القيصري بنج نصفي راح يعرف بكمية العجز الي تصير برجول الوحده ماتقدر تحرك الرجول نهايي شعور يخوف ويخلي الشخص يستشعر النعمه الي هو فيها
المهم شوي شوي لين بديت على خفيف احركها
وطلعوني تنويم
ومن ضمن تعليماتهم مارفع راسي لازم يكون نفس مستوى ظهري
اكل ممنوع. لين اليوم الثاني
الشرب بعد 5 ساعات سوائل فقط
القسطره يفكونها بعد 12 ساعه
ويوم جو يشيلونها مولمه شوي ومزعجه
طبعا بعدها لازم تقومين تروحين للحمام
بس الخوف مليح للحين ماتجرأت اقوم بس بغصب نفسي عشان اقلها اقدر اقوم بنفسي واشيل بنتي لاني اشوفها من بعيد لبعيد 💔😭
ادري طولت وذكرت تفاصيل كثيره
بس حبيت افيد الي عنده عمليه
العمليه فيها الم بس مع المسكنات احسن شوي
والحمدالله على كل شي ❤❤
اعذروني لو طولت
واي سؤال انا حاضره ❤❤

همسات البحر
و
حنين طفله
مشكورات حبايبي ع ردودكم💜💜

يا قلبي ي اكتفاء الله يكتب اجرك حبيبتي
والحمدلله انكم بخير

الله يسعدك ياقلبي على التوضيح
الله من النصب قال عمولة قال 😒😒